تصفح
دخول
تسجيل
نسيتها؟

[USMLE STEP2] تجربتي بالفشخة التانية


[USMLE STEP2] تجربتي بالفشخة التانية

سلام
أول شي بس بدي نوه انو الدراسة كانت متقطعة + معظم كتب الستب قاريها خلال السنين تبع الكلية+ في اقسام كنت قاريها على الاقل مرتين خلال ستاجات اميركا متل الدم والقلبية.
السنة الماضيةو قبل الستاجات, عملت وش باطنة قبل ما اطلع عالستاجات (طلعت بالشهر السادس) , الوش كان عبارة عن: كل باطنة: (كابلان وفيديوهاتو, ميدستدي وفيديوهاتو, والUW ).
بعدين وقت رجعت من اميركا (الشهر 12) درست االاطفال والنسائية والتوليد والباطنة (مرة اخرى ولكن هالمرة كابلان فقط وفيديوهات+UW ). بعدين عملت اكتر من شغلة تانية فما لحقت خلص الوش الاول واجا الوطني باذار, قدمت وطني وبعدين بلشت الدراسة الجدية. خلصت بعدها النفسية والجراحة والاحصاء والوقائي والحباشات (أو الاقليات برواية اخرى, وهنن العينية والطوارئ و الجلدي والاشعة , يعني نهاية الكابلان تبع الباطنة).
بعدين بلشت حل شباب , مع الوش التاني, الوش التاني عدتن وعدت الUW مرة اخرى, اخد الوش التاني حوالي الشهر ونص . عملت فيه المواد نفسها بس الباطنة عملت فقط كابلان وطبعا بدون فيديوهات. بعدين كان بقيان شي 20 يوم للفحص , عدت فيه بعض المواد يلي حسيت بدها اعادة متل التوليد والاطفال +عملت الUW الجديد اون لاين +FA QA . الفحص كان بشهر7, 26.
هاد كان بشكل عام بس مخطط زمني .
التفصيل.
1-الباطنة:
الكابلان هو الاساس بشكل عام , بالنسبة لي, عدا الكلية. الميدستدي فظيع وممتع جدا , لكن السؤال الذي يطرح مفسه: هل يستحق التعب ؟ برأيي اذا الوقت محدود, يعني حوالي ال5 اشهر فمو ضروري ينقرا , اذا اكتر فاشجع على ذلك .
الغدية: الكابلان جيد. يجب دراسة ال Lipids وخاصة ال ATP3 من الشحوم بالغدية , تبع ايمتى بتبلش المعلجة بالادوية وايمتى فقط Life style modification., هدول بيجو منن شي سؤالين او 3 بالفحص .
فيديو الكابلان: جيد. فيديو الميدستدي: عادي.
الرثوية: الكابلان جيد. في اخر صفحة من الMedstudy تتحدث عن الاربطة والBursitis واشياء لم يغطيها الكابلان ولكن تتم تغطيتها بالUW , فمحبذ الاطلاع عليها من هناك. بالنسبة للعلاج الامراض الرثوية فقط اعرف المخطط العام (مثلا الرثياني اول خط هو الميتوتركسات), يعني فقط بشكل عام , اما التفاصيل وخاصة الواردة بالميدستدي ف low yield . الشي الهاي يلد هو مثلا التأثيرات الجانبية لهي الادوية+ شو الاضداد المترافقة مع كل مرض.
فيديو الكابلان:جيد جدا. الميدستدي: سيء

القلبية: الكابلان جيد جدا . يجب الاطلاع على الCHADS score سواء من الميد ستدي او من UTD . الموضوع كتير هام للستب وللحياة العملية. بالنسبة للمخططات غالبا بتجي سهلة (في اكسبشنز, بس قليلة) .(معظم المخططات اللي بتجي SVT, V.Fib or V.Tach, normal EKG, WPW ).
فيديو الكابلان: الجديد سيء جدا مقارنة بالقديم تبع ال2001, انصح بانو ينشاف القديم مع الاخذ بعين الاعتبار الاشياء اللي تغيرت. (اهم الشغلات اللي تغيرت هي الEndocarditis prophylaxis ,هاد المضووع اكتر المواضيع يلي بخبصوها في الطلاب والكتب !! انصح بقراءة الفقرة من الUTD او من ال2007 guidelines , from the original paper).
فيديو الميدستدي: فظيع للستاجات, شفتو 3 مرات, بالنسبة للستب مو كتير هايلد. بس متل العادة بريّح.

الهضمية: الكابلان جيد.
فيديو الكابلان:جيد. فيديو الميدستدي: جيد.

الكلية: الكابلان سيء جدا . الميدستيدي فظيع جدا. تدرس من الميدستدي شرعاً.
فيديو الكابلان : عادي. فيديو الميدستدي: عادي.

الخمجية: الكابلان جيد.
فيديو الكابلان: جيد
فيديو الميدستدي: فظيع جدا , مرة اخرى مفيد للستاج اكتر.

الصدرية: الكابلان منيح. في قسم يتعلق بالمنفسة , UW بغطيه منيح. ال ASTHMA +COPD يفضل ينقرو من الMEDstudy , especially the step-up and step-down of ASTHMa Tx
فيديو الكابلان: عادي. فيديو الميدستدي: اقل من عادي.
بعدين بكتاب الكابلان بيجي الحباشات (باستثناء العصبية): بالنسبة للحباشات الكابلان جيد وما بدنا شي اضافي.
العصبية: كابلان كافي. الفيديو كابلان: جيد (القدامى احسن بكتير).

2-الأطفال:
بالوش الاول قرأت من كابلان اطفال. الكتاب سيء جدا من حيث العرض, بالنسبة للمعلومات فيه معلومات ولكن لعرض سيء جدا. بعد ما عملتو من افا ايدي,. قريت ال(MTB) Peds from Master the Boards وكان احسن . بالنسبة للطفال في عالم بفوتو الفحص بس بالUW , وبتصور كافي تقريبا.

3-النسائية والتوليد:
قرأتها من الHigh yield .+ MTB . الهايلد جيد وخاصة الحالات اللي بتجي بعد كل تشابتر.

4-النفسية: قرأتها من الHY ايضا , جيد جدا الكتاب.
5-الاحصاء والPreventive medicine :
بالنسبة للاحصاء انا قرأت القسم تبع الاحصاء من الFirst aid step 1 .
Ethics: كمان موجود بعض الاشياء في الFirst aid , والباقي متذكرو من الستب 1 وقت قريت الConrad Fishers 100 cases in ethics. جيد جدا الكتاب ممكن الاطلاع عليه وما بدو غير يومين وبكون خالص بالكتير.
Preventive medicine: القسم من كابلان غير كافي لذلك بالاضافة له عملت الpreventive medicine from general medicine in Medstudy . + فتحت موقع الUSPSTF من الرابط التالي:
http://www.uspreventiveservicestaskforce.org/uspstopics.htm#AZ
واخترت الاشياء اللي بتنسأل كتير , متل ال screening of C cancer, Breast, Dexa, lipids, etc.. وقريتها من هنيك.

6- الجراحة: كتاب الكابلان جيد. الفيديوهات برايي كتير اساسيات , الدكتور بفركو الواحد انو سيء اول شي ولكن هو فظيع كتير , طبعا لازم ينشاف مسرع عال2 مشان ما يرتقع الضغط كتير  لانو بارد جدا.
الكتاب مقسوم الى قسمين: القسم الاول عبارة عن علم فقط ,معلومات ورا بعضها , كثيف جدا عبارة عن 80 صفحة تقريبا. القسم التاني هو تكرار لنفس مواضيع القسم الاول ولكن على طريقة Clinical Vignettes . الدكتور بالفيديوهات بيشرح القسم التاتي فقط. مرة اخرى بريي الفيديوهات كتير مناح بهي المادة خاصة انو امادة جديدة علينا!!!
استراتيجية الدراسة الممكنة هي/ قراءة البحث الاول مثلا من القسم الاول , ثم فيديوهات مع القسم التاني. وهكذا لكل تشابتر.

ملاحظة هامة , أهم من كلشي حكيتو فوق: الستب 2 فحص يختلف عن الستب1 كتير. بالستب 2 , الدراسة للفحص كتير تعتممد على تراكم المعلومات , يعني انو وقت نقول انو مثلا النسائيةة من الهيلد لا يمنع ابدا انو فقرة قريتها من الهيلد انو افتح واقرا عنها بالانترنت او الUTD. ال UTD كان الو كتير دور اساسي خلال الدراسة للستب2, كنت افتحو كتير , وخاصة عندي ازمة ثقة مع الكتب , فلذلك اشجع جدا انو الUTD ينفتح للاسئلة المستعصية ولقراءة الاشياء صعبة الفهم وايضا لقراءة المواضيع اللي مالها مغطاية بالكتب او مختلف عليها : من المواضيع يلي مو مغطاية منيح بالكتب : Pain management ,Carotid artery atherosclerosis:when to do drugs and when to go in and open it(big time for step2), Breast mass (The neverending disagreement on what the next step is ).
امر اخر: USMLE world هام جدا جدا جدا. برايي هو الاساس. والشي الجيد بالنسبة لالكن وهاد حيخفف الاعتماد على الUTD لانو تم سحب الUW الجديد 2012 .
بالنسبة للUW , كنت حل البوك بعدين روح على نوطة مجاهد وفسفرها , مشان بعدين راجع منها . وهي جيدة جدا, عبارة عن ملاحظات الUW مجمعها احمد (الله يجزيه الخير) وحاططها سوا.
امر جيد ايضا انو الواحد يسجل الاسئلة يلي مخربطها عجنب , مشان بعدين وقت بدو يحل مرة تانية يعرف بشو كان مخربط.
ايضا التعيير على الوقت مهم , اذا الواحد استطاع ان يمتلك ذلك بالنسبةة للUW فممكن بعدين يحل مفرق بدون تعيير.
بالنسبة للتعيير بشكل مشابه لوقت الامتحان من حيث الطول, فالUW هو اقصر من الامتحان وال sample هي الافضل للتدرب على التوقيت . ممكن الحصول عليها من الموقع الرسمي تبع الUSMLE .
باقي بنوك الاسئلة (ممكن التفكير بالرجوع اليها عند الانتهاء من الUW مرتين!):
First Aid Qustions and Answers: عادي . فيه كم خطأ!
QBOOk : سيء .
Q bank : عملت منو كم بلو وما كملت .
MKSAP : هو بالاصل لامتحان البورد تبع الباطنة , عملت منو كم شغلة الشي المفيد لقيتو للستب2 هو الgeneral medicine.

الفحص بحد ذاته: الفحص تجربة شخصية , فانا تحدث عن تجربتي, كان طويل ومرهق, وبالنسبة لي اصعب برياحة من الUW (بالعادة بقولو انو اسهل من الUW بس اطول) . الدورات مفيدة في التوجه وقد تتكرر, ممكن يجيك دورة كاملة وممكن ما يجيك غير كم سؤال. بس مهمة مشان الواحد يعرف شو المواضيع يلي بتنسأل.
من جديد, بعد ما انا قدمت, صار في نموذج جديد للاسئلة , متل رفيقي قلي انو في بلوكات اجاه فيها بس 32 سؤال بس يا دوب لحق بالوقت!! فشو التغيير بفحوى الاسيئلة صراحة ما بعرف , ولكن نزلت sample جديدة على الموقع الرسمي بتغطي هالشي. فيرجى اخذ ذلك بعين الاعتبار.
واخر شي , الستب 2 احلى من الستب1 بمراحل والواحد عميدرس اخر شي مشان المستقبل اضافة للعلامة.
الحمد لله اللي اكرمني , والله يكرم الجميع وبالتوفيق.
اذا في سؤال او شي مو واضح انا جاهز للاجابة . سلام

mbs2380's picture
by
بعد التخرج


UW=USMLE World
UTD= Uptodate

mbs2380's picture
mbs2380
بعد التخرج


ان شاء الله منو لأعلى المراتب Surprised

Dr.H.A.A
السنة السادسة


موفق حكيم بحياتك .. وشكرا كتير على المعلومات .. وبنرجعلك عن قريب Smiling

محمد الرفاعي's picture
محمد الرفاعي
السنة السادسة

Dr.H.A.A wrote:
ان شاء الله منو لأعلى المراتب Surprised
Ahmed.AlHalabi's picture
Ahmed.AlHalabi
معيد


السلام عليكم

متل ما قال mbs كل شخص عنده تجربة مختلفة بالدراسة وبالامتحان، فالأفضل انه الواحد يطلع على تجارب عدة أشخاص ويطبق على نفسه التجربة الأنسب لإله.

بالنسبة إلي فأنا بلشت دراستي بشهر تنين وقدمت الفحص بآخر شهر سبعة بنفس يوم mbs ووقتها غششته بكتير من الأسئلة (عم بمزح Very Happy ). طبعا أنا عامل ستيب ون وقبل ما بلش دراسة الستيب تو كنت قاري الأقسام التالية من كابلان مع فيديوهاتن لأني عملت فيها ستاجات (هضمية، خمجية، دم، قلبية).

بالنسبة للكتب أنا قريت الباطنة والجراحة الأطفال والنسائية والتوليد من الكابلان. النفسية قريته من هاييلد لأنه عندي معلومات منيحة من الستيب ون. الإحصاء عدته من الفيرست ايد للستيب ون. تفرجت على كل فيديوهات الباطنة والنسائية والتوليد تبعوت الكابلان. كتاب الجراحة قريت بس اول سبعين صفحة وما قربت عالكيسات حسب نصيحة أب جهاد (تحياتي).

في مصادر ثانوية للمعلومات كنت استخدمها لما احتاج دور عمعلومة معينة او لما حب استزيد بموضوع معين او لما حب اقرا عن موضوع معين مو جايبين سيرته بالكابلان وهي: Toronto notes (تحياتي لحبوب)، بوكيت ميديسن (الكتاب الأخضر -غير تبع القذافي- الذي يجب على كل شخص شراؤه وحمله في الستاجات)، ابتوديت، موقع http://www.aafp.org (شكرا حبوب مرة أخرى).

بالنسبة لبنوك الأسئلة فحليت ال USMLE WORLD كله، وحليت معظم ال NBME (أنصح به وبقوة) وحليت حوالي نصف MKSAP for Students [[هاد غير ال MKSAP اللي حكى عنه بسام. اللي حكي عنه بسام هو للمقيمين أما تبع الطلاب فمستواه مستوى ستيب تو وبنصح الجميع بحله.]]

بالنسبة لخطة الدراسة فخطتي كانت فايتة بالحيط !! كنت عأساس بدي اعمل تلات وجوه (3 شهور أول، شهرين وش تاني، وشهر وش تالت) ولكن انتهي بي المطاف اني عملت وشين بس بسبب الملل والاكتئاب (وش اول 5شهور تقريبا ووش تاني شهر لأربعين يوم !!!! Shocked ). خلال الوش الأول قريت الكتب وتفرجت عالفيديوهات وحليت الوورلد وكنت نزل المعلومات الزيادة عالكتب. بالوش التاني عدت الكتب (مع الاضافات اللي منزلها من الوورلد ومن المصادر الثانوية) وحليت أسئلة السامبل والnbme وال mksap for students.

بالنسبة للفحص فالحمدلله كنت مرتاح فيه على الرغم من قلة نومي بالليلة السابقة وكان الوقت كافي جدا. عامل الوقت مهم جدا ولازم تدربوا عليه منيح قبل الفحص. في شخص قدم معنا بنفس اليوم وكان للأسف ما عم يلحق شيي سبع أسئلة من كل بلوك لذلك تدربوا منيح. طبعا انتبهوا لموضوع انه تغير بنك الأسئلة متل ما حكى mbs.

أنا ما بفوت كتير عحكيم فإذا حدا بيحب يستفسر عن شي يا ريت يبعتلي عالايميل، وهذا إيميلي (مو هويتي)

السلام عليكم وبالتوفيق للجميع

Dr. Agha
بعد التخرج


شكرا دكتور ام بي اس.. ان شاء الله بتمتش بأحسن جامعة بأميركا Very Happy

never_give_up's picture
never_give_up
بعد التخرج


أول شي ..إن شاء الله ألف مبروك ..وربي يكتبلك النجاح والتوفيق بالخطوات اللي جاية ..اللهم آمين
بس بدي اسئلك سؤال دكتور إذا سمحتلي ..أديش كانت علامتك بالستب2 ؟؟
لأنو بصراحة اكتأبت لما قريت تجربتك ..مابعرف بس لازم على دراستك هي ماشاء الله تكون جبت 3DIGT !
تحياتي Smiling

Noor Alsaid's picture
Noor Alsaid
السنة السادسة


257

mbs2380's picture
mbs2380
بعد التخرج


ال UW 2012 بتكفي ؟ ولا كمان 2010 ؟

Dr.H.A.A
السنة السادسة


Is there UW 2012? I didn't find them

Angel Anas's picture
Angel Anas
السنة الثالثة


امبلى في .. أخدتهن من رفيقتي من شي شهر تقريبا

Dr.H.A.A
السنة السادسة


إذا بتحب بظن فيني ابعتلك ياهن عالنت .. النت عندي سريع

Dr.H.A.A
السنة السادسة


Dr.H.A.A ..إذا فيكي تبعتيلي ياه بتكوني فضلتي على راسي ومابنسالك هالمعروف..

ومشكورة سلفا"..تحياتي Smiling

Noor Alsaid's picture
Noor Alsaid
السنة السادسة


انا انصح بال2012 اكيد. ما في هالعدد الكبير من الاسيئلة الجديدة, قلال. ولكن المهم هو انو في update عالinformation. يعني عالاقل يعمل على تقليل العودة الى الUTD.

mbs2380's picture
mbs2380
بعد التخرج


السلام عليكم ..
نداء الى جميع الزملاء ..اللي عندو يوسمل 2012 مايبخل علينا في (وهذا ظنا فيكون)

وسنكون له من الشاكرين..

تحياتي Smiling

Noor Alsaid's picture
Noor Alsaid
السنة السادسة


الفيديوهات* أم الكتب؟
--
*: قمت بتحديث رابط الفيديوهات

Ahmed.AlHalabi's picture
Ahmed.AlHalabi
معيد


ما شاء الله نشالله لأعلى المراتب
في عندي سوال
انا سنة سادسة بلشت من شهر ستيب 2 و خلصت نسائية وش اول
بس تفاجئت باغلب المنتديات انو الكل ما بيفضل ال 2 قبل ال 1
فما بعرف برايك أكمل و أتوكل عالله الا بوقف و ببدى ستيب 1
مع العلم اني مخطط للطلعة ل اميركا و بشكل جدي ( دراسة من اجل الاختصاص في اميركا و ليش للفائدة من اجل الفحص الوطني ) ؟؟

أبو العلاء المعري
السنة الخامسة


السلام عليكم

شكرا حكيم بمشاركتك بهل التجربة وانشاء الله لاعلى المراتب وبلتوفيق للجميع...............

بس الي طلب صغير اذا في مجال تتكرمو علينا وتحطولنا رابط لل USMLE WORLD 2012 مشان تعم الفائدة او اي لينك ممكن نحمل منو ...

مشكورين جميعا

محمد تيزيني


ابو العلاء: الحصول على ستاجات صعب حتى مع وجود الستيب 1 (اللي بتطلبه كتير جاماعت) فمابالك بدونه, اذا ناوي تطلع ستاجات قبل التخرج ستيب 1 منطقي اكثر بكثير, واذا ما صرلك غير شهر واحد بانا بنصحك تقلب على الستيب 1.

محمد تيزيني: ال UW بحوالي ال150 دولار فيك تشتريه من الانترنت اذا بتحب, الشباب عادة بياخذوه من بعض او يمكن تلاقيه بالنفق او بتنزله تورنت. بس الحصول على 2012 صعب شوي ببلاش, اذا بتلاقي تبع ال 2011 بيمشي حاله.

.b's picture
.b
بعد التخرج


ياجماعة لو سمحتو ممكن التعقيب مشان موضوع الامتحان الوطني هلسنة يعني جد الاسئلة عم تجي فلكية فلموضوع انو جماعة الستيب يلي ممكن يقدمو الامتحان قبل الوطني بفترة معينة شو النصيحة يلي لازم يعملوها مشان اجتياز الوطني انشاء الله يعني القصد انو يحلو دورات ولا يجيبو ا ملخصات معينة

مشكورين

محمد تيزيني
ابق على تواصل مع حكيم!
Google+