تصفح
دخول
تسجيل
نسيتها؟

تجربتي مع Step 2 (كمان شوية أمل)


تجربتي مع Step 2 (كمان شوية أمل)

بسم الله الرحمن الرحيم، رح احكي عن تجربتي المتواضعة لدراسة الستيب 2 بعدما الحمدلله طلعت علامتي وكانت 99 ( على النظام القديم ) عالنظام جديد بيعطوك رقم بخوف ( بالتمانينات ). ورح خليه الثري ديجيت لنفسي.

أول شي الحكي تبعي هون رح يكون لشخص قدم ستيب 1، وللدقة أنا قدمت ستيب 1 ومن ثم وطني ومن ثم مباشرة ستيب 2، بمعنى إن أنا ما كان في هالفراغ الكبير بين الستيب 1 والستيب 2 ولذلك ما أخد معي أكتر من 4 شهور وطبشة.

حبيت شارككم بتجربتي المتواضعة، أنا كنت شوي مضغوط واضطريت احذف شغلات قد تكون مهمة أو غير مهمة من خطة الدراسة وغيرت ببعض الأمور على حسب شو كان يجي عبالي، والحمدلله كانت العلامة مرتبة نوعا ما بس مو خارقة، للاطلاع على احدى الخطط الخارقة للستيب 2 خطة المعلم أبوحمزة النووي:
https://www.hakeem-sy.com/main/node/44003

مصادر الدراسة:

الباطنة:
كتاب كابلان باطنة فقط. بس أنا قريت كتاب Step Up Medicine جبتو من الرياض.
كنت اطلعت سابقا على كتاب كابلان بالباطنة وقريت عن هادا الكتاب شوي وتوكلت على الله واشتريته، وحبيتو بصراحة أكتر، مرتب أكتر كاسلوب.
حسب ما شفت كإن في نسخة 2011 نزلت جديد من كتب الكابلان.
يستحسن تشوف كل الفيديوهات، أنا ماشفت غير المواد اللي حسيت حالي ماني متمكن منها.

الجراحة:
كتاب كابلان جراحة.
بس أنا ما قريته، قريت نوطة مكونة من شي 30 صفحة لقيتها بين نوط قديمة فيها اعادة كتابة لكتاب الجراحة تبع كابلان بطريقة أسلس وأكتر تنظيما وأسهل للحفظ، اسمها ملخص الجراحة بتلاقوه بين دورات 2008 يمكن، أنا واحد من الشباب عطاني اياها الله يجزيه الخير.
في عالم شافت الفيديو وعالم ما شافته، أنا ماشفته.

النسائية:
كتاب النسائية كابلان، أو هاي ييلد.
أنا قريت الكابلان، أنا من أعداء سلسلة هاي ييلد ببساطة Smiling مابحب هالسلسلة بتاتا، والشي اللي المهم إن اللي كاتب الكابلان واللي كاتب الهاي ييلد هو شخص واحد ( ساكالا ) لذلك ما اتوقع في فرق كتير، بس يمكن كابلان أحسن مشان تمشي معه الفيديو.
الفيديو عجبني كتير شفت فقط فيديوهات من الجديد، ماشفت شي من القديم.

الأطفال:
كابلان أطفال.
بس أنا ما قدرت اقرا هالكتاب الغليظ، بلشت فيه ولقيت إن في كتير معلومات بلا طعمة وقرفني عيشتي قمت تركتو، ودرست للأطفال فقط USMLE World: UW ولازم تراجع FA bio and immuno
الفيديو مالو طعمة برأيي.


النفسي:

هاي ييلد نفسي أو كابلان.
ماقريتها من أي كتاب، فقط راجعت FA: وحليت UW.
ممكن تشوف الفيديو، أنا نقيت المواضيع اللي أنا ضعيف فيها وشفتها ( ما أكتر من 10 فيديوهات ) أو مواضيع مو مغطاية بالستيب 1.

الجلدية والعينية والطوارئ وهالحباشات الصغيرة كلها UW.
شوف الفيديو إذا معك وقت.

ماقريت احصاء، كان لازم راجع الاحصاء من FA وما قدرت لان كنت مخليها لآخر يوم، وحتى مالحقت حل الـ UW تبع الاحصاء.
السلوك: لقيت تلخيص لكتاب فيشر تبع السلوك بين أوراق عطاني اياها رفيقي فقريتها.

عملت كتاب Step 2:Master The Board تبع فيشر كاملا، أنا كتير حبيتو للكتاب، في أفكار كتير ظريفة واجاني منها كم سؤال، وأهم شي فيه هو كتير بركز على most accurate test and initial test يعني الكتاب مكتوب لفحص الستيب 2.

عملت كتاب Step 3:Master The Board بس مو كاملا، وانما المواد اللي ما قريتها متل الأطفال، الجراحة، الحباشات الصغيرة، النفسي.

الـ USMLE World :
هادا أهم شي للفحص، أنا حليتو بالوجه التاني وكنت طابع نوطة مجاهد وأبو الحمد ( الله يجزيكم الخير ويوفقكم، من أحسن الأمور اللي انعملت للستيب 2 ) وكنت حل ونزل الاضافات اللي تعجبني وتكون ما منزلة على النوطة، النوطة تقريبا ماشية مع نسخة الوورلد اللي معنا بالترتيب.
وبس خلصت حل عملتلها وجه قبل الوجه التالت، وعملتها وجه بالوجه التالت.
يعني ما حليت الوورلد كحل نظامي غير مرة واحدة، لان الوورلد أهميته بالمعلومات اللي فيه، فينك تعلم الأسئلة الخطأ وتعيد هدول فقط، انا عملت هيك بالأول بس بعدين ما هاد لحقت وبس عملت النوطة.

شباب:
حليت كم نوطة من الـ 2010 وكل الـ 2011 ، أسئلة الشباب مهمة متل الستيب 1 لان في معلومات ما رح تلاقيها غير هنيك.

Qbank:
عملت منه حوالي الـ 10 بلوكات قبل الفحص بكم يوم لان هو أحسن شي مشان التدريب عالوقت، بس طبعا في أسئلة فضائية كتير وصعبة.

الـ Sample :
حلو ضروري كتير، يمكن اجاني منو سؤالين، جبت بأول بلوك 91% تاني بلوك: 89% التالت:90%.

كيفية الدراسة:

الوجه الأول:
امرق على الكتب مرور سريع مع تلخيص.
شوف الفيديو ونزل الاضافات على الكتب.
دائما راجع كتاب الـ FA.
تسلى بشوية أسئلة شباب.

الوجه التاني:
احفظ الكتب
راجع FA
حل شباب منيح
حل UA ونزل الاضافات على نوطة مجاهد وأبو الحمد.
اعمل MTB الـ 2 والـ 3 ( كل ما بتخلص من حفظ مادة وحل الوورلد تبعها بامكانك تقلبها من هدول الكتب، رح تاخد معك الباطنة الواحدة بأحسن الأحوال ساعتين ).
ممكن تعمل بآخره الـ NBME أو تأجله للوجه التالت لما تحس حالك جاهز.

الوجه التالت:
10 أيام: راجع الكتب ( ماضروري تراجع كل المواد، أهم شي تمر على الباطنة والنسائية )
بأسبوع: راجع UW ( كتاب مجاهد ) وفينك تحل إذا فضيت بعض الأسئلة اللي مخربط فيها.
أسبوع : حل شباب
حاول تمرق كل يوم خلال الوجه التالت الـ FA.
كل يوم حاول تمرق Qbank بلوكين فقط، حتى تتم عم تحل أسئلة خلال فترة المراجعة للكتب.
آخر كم يوم خليهم بس حل أسئلة ومراجعة دفترك اللي رح تكون عم تجمع عليه ملاحظاتك الشخصية والمعلومات اللي بتخربط فيها دائما.

ملاحظات من هنا وهونيك :

* إذا كان عندك آيبود أو أيفون البرامج التالية كانت بصراحة أكتر شي ساعدني خلال دراستي: Medcscape - Harrison (from lexi ) - color atlas of family medicine أي معلومة بدك اياها كانت تطلع معي خلال دقيقتين وخاصة إن ما كان عندي نت بآخر فترة لما كنت بسوريا.

* الستيب 2 عبارة عن حل أسئلة فقط، يعني ممكن يكون عندك ذخيرة معلومات منيحة، بس إذا ما بتحل أسئلة كتير وخاصة الشهر الأخير، مارح تعرف توظف هالمعلومات لتحل فيها أسئلة، المعلومة النظري شكل ولما بتكون خلال قصة سريرية شكل، ومشان تعرف كيف بيتظاهر المرض الواحد بأكتر من طريقة.

* الفحص شوي طويل ولكن بيمرق بسرعة، وكالعادة مو مقياس شو انطباعك لما بتطلع، أنا فتت عالفحص بدون همة أو أمل ومتدايق نفسيا بسبب استشهاد أحد أصدقائي بمجزرة الخالدية بحمص واللي كان ساكن معي بالبيت سابقا، وطلعت من الفحص متدايق، وآخر كم يوم كان لازم اقرأ الاحصاء وراجع الملاحظات الشخصية وراجع اسئلة شباب وهادا كلو ما عملتو، هالشي مو rationalization بس بصراحة هادا الشي كان الو أثر كبير عليي وعلى نفسيتي وعلى فحصي والله ينتقم منهم.

* تقريبا ما حليت ولا سؤال من النظام الجديد بالفحص من تبعوت abstract and drug adds وهالحكي ( إلا الأسئلة البايخة ) وكلو شلفتو بصراحة وكمان ماحليت غير سؤالين احصاء كان مابدهم قوانين أو معلومات بديهية.

* المشكلة الأكبر بالفحص هو إن تقدر تجمع معلومات من القصة الطويلة بأسرع وقت ممكن لتطلع بتشخيص معين وتقدر تجاوب على السؤال.

* أسئلة الشباب لازم تنحل متلها متل الستيب 1، يمكن يتكرر شوي، ويمكن ما يتكرر بنوب، نسبة التكرار أقل من الستيب 1 ولكن لازم تحل لتفهم شلون عم تجي الأسئلة ويمكن تتكرر أسئلة قديمة وإنت ما تكون قاري كتير، المهم حل شو بيطلع بإيدك.

* لتتغلب على مشكلة الوقت لازم لازم لازم تحل شوي من Qbank لان الوحيد اللي أسئلته قريبة من طول الفحص وصعوبة الفحص، بالأول رح تلاقي حالك ماعم تلحق لاتخاف، المهم إن توصل لمرحلة يزيد معك بين الـ 5 والـ 10 د وطبعا مو قاعدة لان بيمرق عليك بلوكات شوي صعبة وفي شي شوي سهل.
أنا بالفحص تقريبا كلشي خلصت عالوقت وفي بالأول كنت خلص قبل بشي 5 د بس ما اتدايقت غير ببلوك واحد شلفت فيه سؤال بدون ما اقدر اقراه.

* حاول تحصل نسخة أسئلة شباب تكون محلولة ومدققة من شخص مرتب، كتير بتوفر وقت أحسن ما كل واحد يدور على الأسئلة لحالو، طبعا إذا في شلة بكون أحسن مشان المناقشات ولكن أنا وكم شب كل واحد درس لحالو وما كان في مشكلة بتوقع.

* الفكرة من حل الـ UW بالوجه التاني، هو إن إنت لو حليتو بالوجه الأول رح تنساه كاملة لوقت الفحص، لو حليتو بالوجه التاني أو أقرب ما يكون للفحص، رح تكون متذكر كتير منه والأهم من هاد مارح تتضطر تعيده لاحقا، وانما بتعيد فقط نوط أحمد مجاهد، أما لو حليتو بالوجه الأول بصراحة يمكن لازم تعملو وجه حل قبل الفحص مشان تتعود على حل الأسئلة.

* لو رجع فيي الزمن كنت مادرست للستيب 2 ككتب غير MTB step 2 + step 3 برأيي المعلومات النظري اللي فيهم بتكفي وبتوفي، والزيادات اللي بكتب كابلان أو غيره هي معلومات إنت أصلا رح تنساها وما رح تقدر تراجعها قبل الفحص، أو غير مهمة.

* كل ما بتقدر تلخص بكون أحسن، بالفترة الأخيرة الوقت رح يكون كتير ديق ودراسة شي إنت ملخصه بسهل عليك كتير. يعني أنا بتذكر كتاب النسائية كنت ملخصوا كلوا على الجوانب تبع الصفحات، نص الحكي بكون علاك، لذلك وفر على حالك جهد قراية هالعلاك بالوجه الأخير عن طريق إنك تلخص على جوانب الصفحات مثلا.

* بإمكان تقسيم الدراسة لفترتين منفصلتين كليا، الفترة الأولى هي بالوجه الأول ( أول شهرين ) إذا حبيت تعمل شي اعملو هون، متل شوفة فيديوهات أو هيك شغلات، بالوجه التاني كل همك إنك تحل الوورلد وتظبط شوي شباب، إذا في فيديوهات ما شفتهم خلص ما ضروري تشوفهم، لان مارح تكون مهمة متل إنك تلحق الأساسات تبع الوجه التاني، والفيديوهات هون بكونوا شي تكميلي.

* ماقريت ولا شي من الـ Medstudy ولا كان عندي اياه أصلا، وحسب ما فهمت إن المعلومات الزيادة الموجودة بالـ medstudy موجودة بالـ UW.

* خلال دراستك ما بس تعتمد الكتب، يعني إذا لقيت شي سؤال عن شغلة ما موجودة بالكتب افتح عالنت أو على كتب غير اللي بتقراها طلع المعلومة وممكن تكتبها على دفترك وتضفلها كم شغلة ممكن يكونوا برأيك هامين.

* اعمل يوم متل يوم الفحص تماما، خود ليلتها المنوم إذا كنت ناوي تاخدو، وفيق من الصبح متل الفحص وحل 8 بلوكات Qbank مع تعيير وقت وكلشي متل كإنك بالفحص.

* ماحليت NBME بس يمكن لازم تعمله إذا مانك عرفان حالك جاهز والا لاء، بس أنا كنت مضغوط بالوقت مشان الستاجات ومضطر قدم عالحالتين.

* المركز تبع عمان تغير محله وصار بمنطقة اسمها وادي عبدون، مشان الفندق فينك تاخد بالليوان إذا ما حابب تغير، وخود تكسي الصبح على المركز، المركز صاير بمنطقة اسمها وادي عبدون، قلو لسواق التكسي وادي عبدون بالشارع اللي بمر من تحت الجسر المعلق، المركز صاير لحالو بهادا الشارع متل برج شي 5 طوابق وكلو قزاز أزرق، يستحسن يجيله من ناحية دوار عبدون، لان بكون صار المركز قدامك تقريبا من الطرف التاني من الشارع، المركز بس تشوفو لحالك رح تعرفو إن هادا الأميديست وفي ساحة كراج سيارات حواليه. يستحسن تروح عالمركز قبل بيوم صباحا واحكي مع نفس سواق التكسي يجي ياخدك تاني يوم عالفحص، أنا هيك عملت.

* رحنا عالاردن وكانت كل الفنادق بمافيها الليوان مليانة بسبب الاخوة الليبيين اللي عم يتعالجوا بالأردن، وأخدنا بشقق مفروشة كان مستواها وسط ومابنصح حدا يروح ينام ليلة الفحص بمحل ما مجربه قبل بيوم.

* المعلومات الواردة أعلاه هي تجربتي الشخصية، مافيني انصح أي حدا يعمل متلي، ولكن أنا غيرت وتحملت مسؤولية حالي.

إن شاء الله كون اقدرت فيدكم بكم معلومة من تجربتي المتواضعة واللي عنده سؤال أنا جاهز.

بعرف إن الفحص الوطني قرب لذلك يمكن تسألو لاحقا بس تخلصوا فحص.
بتمنالكم التوفيق جميعا، وبتمنى الحرية لوطني، وان شاء الله من شوفكم عن قريب.

" تذكروني عندما تحتفلون بالنصر "

الشهيد هادي الجندي.

http://www.youtube.com/watch?v=9hkBE3L-Two

Dr.mTm's picture
by
بعد التخرج


مبروك زعيم وعقبال التمتيش

anooosa's picture
anooosa
السنة الخامسة


الله يبارك فيك معلم.

ملاحظة: الـ First Aid اللي عم احكي عنه هون هو نسخة الـ step 1 . تبع الـ 2 سيء جدا وناقص.

Dr.mTm's picture
Dr.mTm
بعد التخرج


ألف مبروك و عئبال الماتش

kandy's picture
kandy
بعد التخرج


ألف مبروك وعقبال الماتش ، والمعلومات حلوة كتير شكراً

بس ممكن كام سؤال ....

Quote:
الباطنة:
كتاب كابلان باطنة فقط. بس أنا قريت كتاب Step Up Medicine جبتو من الرياض.
كنت اطلعت سابقا على كتاب كابلان بالباطنة وقريت عن هادا الكتاب شوي وتوكلت على الله واشتريته، وحبيتو بصراحة أكتر، مرتب أكتر كاسلوب.
حسب ما شفت كإن في نسخة 2011 نزلت جديد من كتب الكابلان

.
هلأ الميد ما بيلزم أبداً ..؟ لأن في كتير عالم بيقولو الميد دراسة اسأسية ، ولا هاد الحكي بس ليلي بدو ستيب ٢ بعد ١ ؟

Quote:
* لو رجع فيي الزمن كنت مادرست للستيب 2 ككتب غير MTB step 2 + step 3 برأيي المعلومات النظري اللي فيهم بتكفي وبتوفي، والزيادات اللي بكتب كابلان أو غيره هي معلومات إنت أصلا رح تنساها وما رح تقدر تراجعها قبل الفحص، أو غير مهمة.

بالنسبة لل MTB ، عفواً بس شو هاد ؟

وبالتوفيق مجدداً .

black_black
السنة الخامسة


مبروك Very Happy
الله ييسرلك يلي فيه الخير ويسلمون

ETERNITY's picture
ETERNITY


مبروك عبودي... عقبال الشو اسمو هداك Eye-wink

Dr_Hero's picture
Dr_Hero
طبيب مقيم


شكرا عبود عاللتحربة الكول . وان شاء الله الف مبروك وعقبال ما تكتبلنا تجربة شوية امل تبع الستب4 Eye-wink

Quote:
هلأ الميد ما بيلزم أبداً ..؟ لأن في كتير عالم بيقولو الميد دراسة اسأسية ، ولا هاد الحكي بس ليلي بدو ستيب ٢ بعد ١ ؟

الحكي تبع عبد الله لستب1 وبعده 2. بالنسبة للتفصيل فعنده .
MTB=Master the boards

mbs2380's picture
mbs2380
بعد التخرج

Quote:
عقبال ما تكتبلنا تجربة شوية امل تبع الستب4

أغري...
شكراً غزيلاً أبو ناصر..

Ahmed.AlHalabi's picture
Ahmed.AlHalabi
معيد


الف مبروك عبود Very Happy Very Happy Very Happy

Quote:
شكرا عبود عاللتحربة الكول . وان شاء الله الف مبروك وعقبال ما تكتبلنا تجربة شوية امل تبع الستب4

Laughing out loud Laughing out loud

Inspector's picture
Inspector
السنة السادسة


مبارك ... لكم تسرني نجاحاتكم أسمع عنها سنة بعد سنة تعيد إلي نشوة الشباب و سعادة الإنجاز.. اللهم تمم بالخير للجميع

ABIM's picture
ABIM

Quote:
. بالنسبة للتفصيل فعنده .

بالنسبة للميدستدي: طبعا الكلام عن ستب2 بعد ال1 هو انو النزعة الحالية هي انو ما ينقرا لانو هو اصلا مستواه اعلى من الستب2 , بس قرايتو اكيد بتريح الاحد بالفحص وحتى وقت يحل Uw وهالكلام خاصة بالرثوية في شغلات ما مذكورة بالكابلان بس متل ما قال عبد الله انو مغطاية بالUW. المهم في 3 اتجاهات:
الاتجاه الاول:يلي عندو وقت زيادة ممكن يقرا الميدستدي والسلسة خيلة , يعني تقرأ وبقوة اذا الواحد عندو وقت.
الاتجاه التاني: انو تنقرا شغلات معينة فقط من الميدستدي: متل الكلية مثلا والصدرية وشغلة تالتة نسبت شو هي.
الاتجاه الرابع انو ما ينقرا ابدا وهاد اللي عميعملوه معظم العالم هلأ ومنهن عبد الله
بالتوفيق.

mbs2380's picture
mbs2380
بعد التخرج


ان شاءالله الف مبروك حكيم...وعقبال التمتييش Smiling
بس بالنسبة لنوطة مجاهد وابو الحمد وين بقدر لاقيها ...
مبروووووك مرة تانية

_________________________
I added cool smileys to this message... if you don't see them go to: http://s.exps.me

Syrianheart2's picture
Syrianheart2
السنة السادسة


ثكراً جزيلاً بو ناثر

abooofaroook
بعد التخرج


دكتورة kandy، حبيب القلب أنوس، معلم Phantom، دكتورة black_black، معلم ETERNITY، حبيب القلب عمورة، بسامو الوحش، أبو حميد الغالي، الصديق الصدوق خلخول، دكتور عمر ( مرورك بشرفني )، أخ Syrianheart2، العزيز abooofaroook ( حرام لاتقلدو لهالكلب )
الله محييكن اخواتي جميعا، والله يبارك فيكم وعقبال الجميع.

بسامو جزيت خيرا عالاجابة وكفيت ووفيت وما عندي اضافات عاللي حكاه بسام

Quote:
عقبال ما تكتبلنا تجربة شوية امل تبع الستب4

طولي بالك لسا في السي اس والستيب 3 و ال Eye-wink downing system ( الله يستر ما يطول Sad ) وبعدها الستيب 4 فور، بس ملاحظة مهمة مشان الستيب 4 إن لازم تبلش تطبخلو عالهادي من بعد الستيب 2، والله يستر ما تحترق الطبخة ونزلكم الموضوع بعد فترة بعنوان:

تجربتي مع الستيب 4 ( بس هالمرة مافي أمل ) Laughing out loud Laughing out loud
الله يستر Laughing out loud

-------------------------------

رأيي الشخصي مشان موضوع الـ medstudy هو إن الكتب حلوة ومفيدة بس المعلومات مرصوصة رص، وتكتير معلومات بدايقك بالمراجعة وما بتكون قادر عالاستفادة من المعلومة بسبب إن ما تقدمت بصيغة سؤال.

مافيني لحدا لاتقراه، بس برأي لو حدا حابب يعمل اللي عليه وأكتر ومانه صحبة كتير مع القراءة وبيتوقع حالو يمل بنصحو حل الوورلد + كيو بانك وإن شاء الله بتكون على ضمانتي غطيت الميدستادي وتقدمتلك المعلومات بصيغة حالات سريرية.

الميدستادي ما بدنا ننسى كمان إلى فائدة إنك تقراه إن بالستاجات مهم ولواحد بدو يفوت اختصاص باطنة كمان منيح كتير.

بس متل ما ذكر بسام إن الناس مقسومة 3 أقسام عن هالموضوع، بس واحد ما وراه شي ومعو وقت مفتوح لدراسة الستيب 2 برأيي وبقوة يقرا الميدستادي، أما واحد متلنا بدو يلحق شغلات تانية ومضغوط بالوقت بلاه وبإذن الله مالو داعي، ودخيل ربك يا وورلد.

Dr.mTm's picture
Dr.mTm
بعد التخرج


شكراً كتير أخ بسام وعبد الله ، أجوبة كافية

شكراً مرة تانية وبالتوفيق

black_black
السنة الخامسة

Quote:
طولي بالك لسا في السي اس والستيب 3 و ال downing system ( الله يستر ما يطول ) وبعدها الستيب 4 فور، بس ملاحظة مهمة مشان الستيب 4 إن لازم تبلش تطبخلو عالهادي من بعد الستيب 2، والله يستر ما تحترق الطبخة ونزلكم الموضوع بعد فترة بعنوان:

تجربتي مع الستيب 4 ( بس هالمرة مافي أمل )
الله يستر

Laughing out loud

Ahmed.AlHalabi's picture
Ahmed.AlHalabi
معيد


الف مبروك اب ناصر الوحش
وعقبال الامل بالستيب 4 ^^

M_Shaballot's picture
M_Shaballot
طالب دراسات عليا

Quote:
بس بالنسبة لنوطة مجاهد وابو الحمد وين بقدر لاقيها ...

والله يا أخي استبعد وجودها بالمكتبات، بس شوف حدا من دفعتنا إلا ما تلاقيها عندو، لو كنت بسوريا كنت عطيتك اياها أنا.

Dr.mTm's picture
Dr.mTm
بعد التخرج

Quote:
بس بالنسبة لنوطة مجاهد وابو الحمد وين بقدر لاقيها ...

والله يا أخي استبعد وجودها بالمكتبات، بس شوف حدا من دفعتنا إلا ما تلاقيها عندو، لو كنت بسوريا كنت عطيتك اياها أنا.

Dr.mTm's picture
Dr.mTm
بعد التخرج


يعني اللي بده يقدم ستيب 2 بدون ستيب 1 يقرأ الميدستادي؟

Quote:
الـ Sample :
حلو ضروري كتير، يمكن اجاني منو سؤالين، جبت بأول بلوك 91% تاني بلوك: 89% التالت:90%.

شو هاد؟؟ يبعتوه بعد التسجيل لما متوافر على سيدي؟

abooofaroook
بعد التخرج

Quote:
ن شاءالله الف مبروك حكيم...وعقبال التمتييش Smiling
بس بالنسبة لنوطة مجاهد وابو الحمد وين بقدر لاقيها ...
مبروووووك مرة تانية

هات ايميلك

mbs2380's picture
mbs2380
بعد التخرج

Quote:
يعني اللي بده يقدم ستيب 2 بدون ستيب 1 يقرأ الميدستادي؟

عمورة إذا معك وقت مفتوح اقراه، ما معك وقت كتير اقرا بعض المواد اللي بتحس كابلان ضعيف فيها ( يمكن بقولوا كلية وعصبية ورثوية )، ما معك وقت بنوب وبتمل اقرا بس كابلان ومكن الوورلد منيح وللأمان أكتر ضفلو الكيو بانك.

Quote:
شو هاد؟؟ يبعتوه بعد التسجيل لما متوافر على سيدي؟

هادا بيتنزل من موقع الـ usmle.org دور عليه تحت بند step 2 بيعملو داونلود نظامي وهو متل برنامج، نزلو قبل فحصك تماما لان بحدثو كل فترة للسامبل.

Dr.mTm's picture
Dr.mTm
بعد التخرج


تمام التمام.. هو اللي رح يقرا ستيب 2 بس يكون معه وقت مفتوح
يسلمووو أب ناصر
وبالتوفيق والنصر والستيب 4

abooofaroook
بعد التخرج

Quote:
شغلة تالتة نسبت شو هي.

صدرية-كلية-رثوية من الميدستدي...و لا أحلى Very Happy

_______________________________________________

الحمد لله أخيراً مشاركة محرزة على حكيم... حكيم بالفترة الأخيرة كان ميت Sad

Bellatrix's picture
Bellatrix
بعد التخرج


congratulation Dr.mtm ,we prayer Allah keep u and always with a high digree and match on the best university ...Amyen
I wanna ask u about UW ,which is the edition u solve??
and the Sample downloading is free or i have to register to get it
Regards

Noor Alsaid's picture
Noor Alsaid
السنة السادسة

Quote:
and the Sample downloading is free or i have to register to get it

بدون تسجيل بتلاقيه بالموقع
هي رابط تحميل السيمبل الحالي: http://download.usmle.org/2011/Step2Download.zip
من هي الصفحة بتلاقوه: http://www.usmle.org/practice-materials/index.html

abooofaroook
بعد التخرج


Thank u noor, wish u the best
I did the last UW insa7bet and i guess it was 2010
U can ask any one of my steps folks for a copy
bass wallah i really think it's the time to tense7eb a new copy

Dr.mTm's picture
Dr.mTm
بعد التخرج


thak u Dr.abooofaroook for explaining.
Dr.mtm thank u for ur reply ,but in ur opinion it's enough to solve the last edition
and there's much difference between it and the past one
finally,how can i get a new copy and where can i buy MTB??
Regards

Noor Alsaid's picture
Noor Alsaid
السنة السادسة


مبروك وعقبال الماتشSmiling

Aramis's picture
Aramis
طبيب مقيم


just do the copy that we have and u'll be just fine
regarding MTB, Amazon or Alfa, offer'em

Dr.Aramis : Thank you so much, wish u the best

Dr.mTm's picture
Dr.mTm
بعد التخرج
ابق على تواصل مع حكيم!
Google+