تصفح
دخول
تسجيل
نسيتها؟

تجربتي معStep 1 ( شوية أمل )


تجربتي معStep 1 ( شوية أمل )

بسم الله الرحمن الرحيم.

الهدف من الموضوع إن في كتير عالم مستواهم عالي جدا بالجامعة وعملو خطة خارقة وكتبوا تجربتهم، أنا على العكس، أنا مستوايي بالجامعة عادي جدا + خطة عادية جدا والحمدلله كانت النتيجة 99 بتوفيق من الله.

معلومات عامة ونصائح :

* أنا مشيت على خطة جامعة دمشق الاعتيادية واللي بتعتمد على إن نبلش بشهر 2 من الفصل الثاني للسنة الخامسة والتقديم بين شهر 2 و 4 ( يتخلل ذلك امتحانات السنة الخامسة ).

* كتب كابلان والهاي ييلد مليانة معلومات بس مو كلها مهمة للفحص، لازم تكون متوجه للمهم وغير المهم أثناء دراستك، وهالشيء بتكتبسبه من خلال حلك للأسئلة والشباب.

* لا تألف وتخترع بالخطة كتير، لإن رح تلاقي نتيجة اختراعك ( حتى لو كان منيح ) بالوجه الثالث، وعم احكي عن تجربة، حيث أني بدلت أحد الكتب بكتاب آخر وكان هالكتاب أكبر شوي بس أحلى من المتقرح ولكن بالوجه الثالث اندبحت وما قدرت راجعه.

* الستيبات تعتمد على حل الأسئلة، لذلك بلش حل قدر الامكان ومن الوجه الأول.

* الفيرست ايد هو مرجعك النهائي لتعرف إن هالمعلومة مهمة والا لاء، بوجودها بالفيرست ايد والا لاء، بس مو قاعدة طبعا.

* كتب كابلان وجدت لتنشاف مع الفيديو ولكن حضور الفيديوهات أمر جيد ولكن ليس دائما، في منهم تضييع وقت وبس بيقرأ قراءة، وبصراحة كل ما بتسأل شخص رح يقلك شيء، اللي اجماع إن لايحضر : patho + Micro + Anatomy

* قدم أبكر ما يمكن ولكن ليس على حساب الجودة، ولكن كملاحظة لن تصل إلى الكمال ولن تصل لمرحلة تقول إنا خلصت على الآخر، رح تتم تقول بس لو معي يومين زيادة كنت عدت كذا كذا.

* حاول إنك تكون بشلة، كتير بتساعدك بالستيب ولاحقا كمان، شلتي كان الها فضل كبير عليي بعد رب العالمين، شكرا لهم فردا فردا.

* حاول تتبع الخطط الصاروخية اللي موجودة بحكيم أو اذا سمعتها من شي حدا، متل المثال اللي تحت تبع أخي mbs، لان أفضل طبعا، ولكن إذا ما اتبعت الخطة الصاروخية ما معناها مارح تجيب 99 واذا عملت الخطط الصاروخية ما معناها رح تجيب 99 أكيد.

* لاتهتم لحكي العالم التثبيطي أبدا أبدا.

* خلال دراستك للستيب رح تمر معك أمور صعبة عليك إنت بالذات و هي نقاط ضعفك لازم تعيدها وتركزها وتعطيها اهتمام أكتر من غيرها متل أنا عندي كان ( أمراض الأوعية - الفيروسات ) هدول عدتهم كتير وأكتر من غيرهم حتى ظبطوا شوي.

* لامانع من حل بنوك أسئلة غير المتعارف عليها بشرط إنك تكون ملحق الواجبات اللي لازم ينحلو.

* لاتأجل أي شيء للوجه الثالث، كلشي اخلص منه قبل الوجه التالت، لان مارح تقدر تعمل شي بالوجه الثالث لان كتير مضغوط وعدد الأيام مهم إن ما كتير يزيد عن الـ 40 يوم لان بتبلش بتنسى ( هيك قالولي ).

* بالوجه الثالث غير من جو الدراسة تبعك واعطيه نوع من الجدية، واليوم اللي بروح ما بيرجع.

* لا تكتئب ازا ما اقدرت تعمل الكمال بالدراسة أو ما قدرت تمشي على الخطة 100%.

* قدم أبكر مايمكن.

* وضعك الدراسي بالجامعة مالو علاقة بنوب بالستيب، وخاصة إذا كنت متلي من جماعة بقرا المادة وجه واحد مع مراجعة لنصف المادة فقط ودائما يجب أن أقص ثلث المادة على الأقل وكل ما يجب بصمه يقص. ( خلال تاريخي بالـ 6 سنين بالجامعة فتت عامل وجهين كاملين فقط لـ 6 مواد ولم أدخل على أي مادة ولم أقص منها، حتى الانجليزي كنت قص منها، القص بيتحول لادمان، أكبر مقابلة بالجامعة قريتلها 4 أيام وتندمت على ذلك، يومين وزيادة)

* الشيء اللي اتفقنا عليه إن لايوجد قاعدة بموضوع تكرار الأسئلة وسهولتها، يعني في عالم قدمت بشهر 3 اجاها دورات وعالم اجاها أسئلة صعبة والشبين كانوا عم يقدموا بنفس اليوم، ونفس الشيء كان بشهر 4 و 5، يعني لاتهتم بموضوع صعوبة الأسئلة والدورات وتربطها بأشهر معينة، ادرس والباقي على رب العالمين.

* الستيب مو متل الجامعة، بدك تحاول تفهم كل معلومة وتنكش عليها.

* الفحص لايتعمد أبدا على البصم، يعني ما بتذكر إني استخدمت ذاكرتي خلال الفحص، والاسئلة أغلبها فهم.

* رح يجيك بلوك أو بلوكين صعبين أكيد ورح تعمل مارك لحوالي الـ 15-20 سؤال إذا مو أكتر، لاتخاف لإن هادا الوضع الطبيعي، أنا للأسف اجاني البلوك الصعب آخر واحد ( البلوك السابع ) وكنت بصراحة رح مووووت من التعب ( بعد 7 ساعات من الجلوس على الكرسي) والنعس وصرت اقرا الكلمة مرتين لاقدر افهمها، لذلك بهدلني البلوك الأخير.

* وزع استراحاتك بشكل جيد خلال الفحص، لايوجد قاعدة للتوزيع، إنت وراحتك وقدرتك على الحل وقديش تعبان.

* أنا كانت أسئلتي شوي صعبة واتأكدت من هالشي من مجال الـ 99 اللي نازل عن المجال اللي منعرفو كلنا بحدود الـ 5 علامات !!

* اسمع جميع الخطط والنصائح وطبق بالأخير اللي بترتاحلو لإن كل واحد الو خصوصيتو واللي بينطبق عليي ما بينطبق عليك، يعني لو حسيت حالك مو ظابط بـ 3 وجوه اعمل 4 وجوه أو 5 أو قد مابدك.

* الـ 99 فيها مستويات وأنا 99 تبعي مو من أعلى الـ 99ـينات بالدفعة، وخاصة نحنا سنتنا العالم صارت تجيب 99 وبعلامات عالية ما كانت موجودة سابقا والجميع بيعرف السبب، وأنا للأسف ما انحظيت بهالشي كتير.

* احجز للفحص مع بداية الوجه التاني، وحدد اليوم بالظبط مع بداية الوجه التالت ( عم احكي بالبرومترك ).

* حط برنامج وامشي عليه ولاتخليه كتير خارق لإن رح يفشل بعدين، يعني خلي شوية أيام احتياط وفراغ.

* أثناء حل الشباب مع شلتك علم الأسئلة الصعبة بنجمة اللي لازم ترجلعلها لاحقا أو بتنتسى، وعلم الأسئلة اللي من برا الفيرست ايد.

* أسئلة الشباب الأخيرة اللي من دفعتك لازم تعملهم وجهين، مرة بالوجه التالت بالفترة تبع الأسئلة ومرة تانية على طريق السفر على الأردن وليلة الامتحان، راجع الأسئلة اللي إنت معلمها على أنها صعبة أو ممكن تنساها، إذا انت سريع ممكن تقرا كلشي.

* أنا استخدمت اسلوب التنزيل على الفيرست ايد لإن أنا بحب إن بالأخير انضب بكتاب واحد وتم وراه ويا أنا يا هو، بس في كتير عالم مانزلت وانما لونت بلون موحد كل الاضافات الموجودة برا الفيرست ايد. زمنيا الاثنين متل بعض واحد بضيع وقت بالتنزيل وخاصة إذا كنت مرتب متلي بالتنزيل وبتحب يبقى شكل الكتاب مرتب وإنك ماتنزل بتضيع الوقت برجوعك للكتب

* الدعاء ثم الدعاء ثم الدعاء، وخلي وقت الفحص كل شخص بتعرفو يدعيلك من قرايبينك ورفقاتك.

* حاول تتدرب على الوقت، أنا كنت خلص البلوك قبل بـ 10 أو 5 دقائق فقط خلال التدريب وهالشي كان سيء ولكن بالفحص من الخوف خلصت أول بلوك قبل بـ 18 دقيقة !!

* لما بتحجز بالليوان قللو عندي فحص ستيب بالبرومترك مشان مايحطك بالناحية المطلة على الديسكو متل ما صار مع البعض وما قدروا يناموا.

* إذا مشيت على الخطة المعروفة ودرست منيح بإذن الله الـ 99 هي القاعدة.

------------------------------------------------

خطة الدراسة :

وجه أول بيتضمن قراءة عامة للكتب وتلوين.
حاول بهذا الوجه إنك تلحق تمشي على البرنامج قدر الامكان، يعني جودة الدراسة هون مو الأهم ( مو مانها مهمة ) وانما الزمن.

وجه ثاني : بيتضمن فيرست ايد وتنزيل وحل UW وحفظ.
وجه تاني شحطة : هاي فترة ممكن تعمل فيها DIT أو تعيد أمور إنت بتخربط فيها وبتنساها دائما ولهلق ما انحفظت معك ( أنا هيك عملت ) أو ممكن تحل نواقص UW أو ممكن تحل شباب منقصهم، إذا كنت ماشي نظامي هالوجه مالو طعمة.

وجه تالت : وجه فيرست ايد بـ 17 يوم وسطي + 17 يوم أسئلة UW + NBME + Shabab ) + وجه أخير 8 أيام

-----------------------
Behavioral science : كابلان + فيديو ( ما عملت لا High yield statistics ولا 100 cases of Fischer ولا HY behavioral science )
أنا كتير عجبني الفيديو عملتو مرة بالوجه الأول(الفيديوهات القدامى) ومرة بالوجه التاني ( الجدد) واخترت بعض الفيديوهات خليتهم على جنب مشان شوفهم بالوجه التالت.

Biochemistry : كابلان + فيديو ( ما عملت High yield molecular biology )
في كتاب اسمو HY Histophathology هادا بأوله تقريبا 70 صفحة Molecular كنت استعين فيه لما شي شغلة ما افهمها من الكابلان وكان خير كتاب بصراحة.

Anatomy: كابلان وتشريح العصبية HY:
تشريح العصبية بقلبو فلسفة مالها طعمة بنوب بس بالمقابل في شغلات مهمة كتير وعم يجي منه، لذلك بدك تقرا بس ما تحفظو من أول مرة لإن في شغلات خير الله بدها كب ومو ضرورية، بامكانك تجرب تقرا الكابلان كمان بالعصبية في عالم مدحت فيه.
شوف فيديوهات الجنين تبع الكابلان أنا كتير عجبوني.

Microbiology :
قريت HY وماحبيتو لذلك قريت معه MicroCards وكان جمبي الـ Ridiculously
Immunology : كابلان ( إذا ضعيف بالمناعة شوف الفيديو )

Physiology : قريت BRS ما عدا القلبية والدم والصدرية Kaplan لان الكابلان في مخططات أكتر وبالفحص كتير مهمة المخططات.

Pharmacology : كابلان + فيديو رائع ( إذا حبيت تنزل من الـ Cards نزل فقط اللي مكتوب بالـ Bold وزيادة ) وبالفحص أسهل أسئلة هي أسئلة الفارما.

Pathology : أنا عملت جوليان الكتاب الكبير وليس النوط ( جبتو من أمريكا ما كان في منه هون ) بس برأيي خليك على الـ BRS لان رح تتدايق كتير بالتنزيل، بس ككتاب بنصح الجميع فيه لان رائع جدا في شرح رائع لامور كتير كنت احفظها حفظ، الدكتور جوليان بيعرف الطلاب وين نقاط ضعفهم ومركز عليهم بالكتاب تبعو كتير. ( ما عملت كل الـ Goljan lectures لان قديمين يعني صرلهم 10 سنين يمكن بس يقال إن كتير حلوين + عملت بالوجه التالت شوي من النوط تبعو، ظراف مابهم شي، بس برأيي مالهم طعمة كتير اذا مامعك وقت)

أنا ماحليت أي سؤال من الأسئلة الموجودة بآخر كل فصل من فصول كتب الكابلان ولا بأي مادة على ما أذكر، لإن كنت اعتبرها بعيدة عن اسلوب أسئلة الفحص بس هي جيدة لتحفظك المعلومة.

ماشفت Webpath بس اطلعت بسرعة على صور كتاب جوليان.
شوفه خلال الوجه التالت أو مشيه مع بلوك الباثو بالوجه التاني
في بين ايدينا نسخة مختصرة للصور المهمة اللي ماحبب يشوفها كاملة، موجودة مع طلاب سنتنا.

ماعملت DIT : Doctors In Training
اسمعه يا بعد الوجه الثاني ( أتوقع أفضل ) يا بعد الوجه الأول.

ما عملت First Aid: Questions and Answers
حاول تعملو، الأفضل بالوجه الأخير أو مرقو تمريق مع الستيب من الأول.

ماعملت Qbook or Qbank

للأسف ماعملت غير تلت أو أقل من الـ USMLE World UW طبعا هالشي غلط كتير كتير كتير وكانت علامتي ارتفعت كتير يمكن لو عامله، هلق هو بعيد عن مستوى الفحص بس ضروري تعملو لان بيرفع مستواك عالمظبوط، انا ما اقدرت اعمله لان مرضت 3 مرات والأحداث اللي بالبلد كانت عم تلهيني كتير وتضيعلي وقتي والحق عليي اجلت جزء كبير منه للوجه الثالث.

ماعملت NBME اونلاين، عملت واحد فقط واوف لاين، ضروري تعملو، على الأقل واحد.

USMLE Sample ) : ماعملتو، عملت بس الـ Tutorial ليلة الفحص.

لو رجع الزمن شو كنت بعمل أو بغير :

كنت بلشت تنزيل الفارما + الباثو + المايكرو + النفسي والسلوك + التشريح من الوجه الأول، تنزيل الفيزيو والبيو بالوجه التاني.
كنت بلشت حل UW من الوجه الأول، وعيدو بالوجه التاني، والوجه التالت فقط أسئلة أنا معلمها منه والـ NBME بحل منو البلوك 5و6و7و8و9و11و12
الهدف من الحركتين السابقات إن يكون الوجه التاني للحفظ فقط.
كنت عملت DIT بعد الوجه التاني.
First Aid Q&A كنت عملته بالوجه التالت.
كنت حليت أسئلة أكتر.
كنت ببطل اسمع أخبار بالوجه التالت وبنعزل أكتر لان هالشي كلفني تأخير حوالي الأسبوعين.
كنت بلشت من السنة التانية والتالتة اقرأ كل مادة بالصيف من كتب الكابلان، صحيح الكتب رح تتغير بس المعلومات مارح تتغي كتير و رح تكون عليي سهلة لما صير بدي اقرا ستيب بالسنة الخامسة.

بتمنى كون عطيت أمل للي خايف، وقدمت كم معلومة من صميم التجربة الشخصية.

ان شاء الله كون قدمت صورة منيحة للستيب 1 بعيدة عن المثالية اللي طلعت من مناخيري خلال الستيب، أنا زلمي ما بحب المثاليات وما بتظبط معي امشي كتير على الخطة بس بحاول، ولازم تحاول، بس لاتفكر إن رح انك تفشل إذا ما قدرت تعمل الأمور المثالية اللي بيحكولنا عليها جهابذة الستيب.

لذلك الموضوع ليس عرض عضلات وليس من باب الموضة ( موضة أبو الـ 99 لازم يتفشخر فيها ) وانما كما ذكرت هدفي واحد، اللي عم يكتبوا كلهم خارقين مع خطة خارقة وأنا حابب أعطي أمل للعالم وخاصة العالم العاديين بدراستهم بالجامعة.

اللي حابب يشوف أحد الخطط النارية الرائعة :
https://www.hakeem-sy.com/main/node/42294

المعلومات في الأعلى هي تجربة شخصية غير مطروحة للنقاش لان هذا رأيي الشخصي اللي قد يحتمل الصواب والخطأ Eye-wink

بتمنالكم التوفيق جميعا بالستيب الأول، ولالي بالستيب 2.

" تذكروني عندما تحتفلون بالنصر "

الشهيد هادي الجندي.

http://www.youtube.com/watch?v=9hkBE3L-Two

Dr.mTm's picture
by
بعد التخرج


الله يجزيك الخير ,,,,أنا مع كل النصائح يلي كتبتها

shadowmaster
السنة السادسة


الله يجزيك الخير ,,,,أنا مع كل النصائح يلي كتبتها

shadowmaster
السنة السادسة


مبروك العلامة ... وكتير حلوة فكرة كتابة تجربتك مع انو بعيدة عن الكمال
غريب كيف الزمن عم يتغير ... لما كان جيلنا من كذا سنة عم يقدم الستيب 1 كانت طريقتك يلي عم توصفها انها مو مثالية, كانت تعتبر صاروخية بهداك الوقت ... ما كان في Uworld وما حدا يعرف شو هاد ال NBME ولا Goljian ولا Q&A ولا حدا بشوف فيديوهات ... سبحان الله ..ما بعرف اذا فعلا الفحص عم يصير اصعب وبدو شغل اكتر او الطلاب عم تكتر فذلكتها !

Nostradamus


مبروك العلامة
و انشاء الله ستيب 2 بعلامة حلوة كمان

The Musketeer
السنة الأولى


مشكور زعيم
وعقبال الماتشت
قيد القراءة

anooosa's picture
anooosa
السنة الخامسة

Quote:
* لا تكتئب ازا ما اقدرت تعمل الكمال بالدراسة أو ما قدرت تمشي على الخطة 100%.

* لاتهتم لحكي العالم التثبيطي أبدا أبدا.

اياك من الاكتئاب لأنه مدمر جدا , لح تمر عليك ايام كل رفقاتك سابقينك بالبرنامج, أو كلهن بيعرفوا معلومة انت بيعمرك ما سمعت فيها , أو قصرت عن برنامجك شهر مثلا( مافي حدا بيمشي على خطته بلا تقصير) , او خطتك ما حدا ساواها من قبلك, اذا انت عم تبذل جهدك و مقتنع بخطتك لا يهمك شي.

كمان ملاحظة بالنسبة لعدد ساعات الدراسة: بالنسبة الي بالوش الاول و الثاني كنت ادرس مثل خلال السنة(حوالي 3 ساعات يوميا) و بالوش الثالث مثل دراستي بشهر الفحص (حوالي 6 ساعات) , الملخص انو عدد الساعات بيتعلق بطريقة دراستك وما في رقم محدد, في ناس بتدرس 12 ساعة باليوم خلال شهر الفحص=> لازم تدرس 12 ساعة بالوش الأخير وهكذا ...

وأهم شي ما دام عملت جهدك فشو ما اجت نتيجتك فهي حكمة من رب العالمين و ما الها علاقة بجهدك, قد تشوفها سيئة و يكون فيها خير و قد تكون عالية و ما فيها بركة

.b's picture
.b
بعد التخرج


ماشاء الله ،،،الف مبروك وعقبال بقيه الستيبات Cool

my best's picture
my best


شكراً كتير عالنصائح

The black star's picture
The black star
بعد التخرج

Quote:
حاول إنك تكون بشلة، كتير بتساعدك بالستيب ولاحقا كمان، شلتي كان الها فضل كبير عليي بعد رب العالمين، شكرا لهم فردا فردا.

عفوا
Eye-wink

Dr. Agha
بعد التخرج


شكرا لمروركم جميعا.

Dr.mTm's picture
Dr.mTm
بعد التخرج


ألف مبروك معلم, و عقبال الستيب 2 و الماتش Very Happy

NEUTRINO's picture
NEUTRINO
السنة الثالثة


يعطيك العافية! Very Happy وألف مبروك! Eye-wink

Quote:
الـ 99 فيها مستويات وأنا 99 تبعي مو من أعلى الـ 99ـينات بالدفعة، وخاصة نحنا سنتنا العالم صارت تجيب 99 وبعلامات عالية ما كانت موجودة سابقا والجميع بيعرف السبب، وأنا للأسف ما انحظيت بهالشي كتير.

كيف يعني الـ 99 مستويات؟ Rolling Eyes
وشو هو سبب العلامات العالية يلي بيعرفها الجميع (الا حضرتي يبدو)؟ why

Angel Anas's picture
Angel Anas
السنة الثالثة


شكرا لكم جميعا، وعقبالكم إن شاء الله.

Quote:
كيف يعني الـ 99 مستويات؟

بالثري ديجيت.

Quote:
وشو هو سبب العلامات العالية يلي بيعرفها الجميع (الا حضرتي يبدو)؟

هاي بشرحلك اياها برسالة خاصة، لان الموضوع خطر ينحكى فيه عالعام.

Dr.mTm's picture
Dr.mTm
بعد التخرج


أعتقد بأن هذه المشاركة هي أجمل ماقرأته من مشاركات تتكلم عن الستيبات... Cool

والله شي بيرفع الراس والأمل كمان Eye-wink

.
.
ألف ألف مبارك ان شاء الله .... ... وعقبال التتمة ....Surprised

Miss Cuz's picture
Miss Cuz
بعد التخرج


شكراً أبا ناصر

the.encyclopaedia's picture
the.encyclopaedia
طالب دراسات عليا


أخت رزان وعزيزي أبو حميد .. شكرا لمروركم وإن شاء الله عقبالكم جميعا يارب.

واجبنا نحاول نفيد اللي بعدنا متل ما فادونا عالم كتير على الموقع من زمان.

Dr.mTm's picture
Dr.mTm
بعد التخرج


مبارك أخي عبد الله

وإن شاء الله من أعلى لأعلى

أبو حمزة النووي's picture
أبو حمزة النووي
السنة السادسة


ألف مبروك عبد الله ..
هناك بعض الأفكار في خطتك تصلح لأي عمل يحتاج إلى تنظيم ..
يعني ما بس طلاب الستيب بستفيدوا منها ..
بالتوفيق.. وعقبال الستيب 2 بعلامات أعلى

الحور العين
السنة الثالثة


الله يبارك فيك أخي خالد، وإن شاء الله أعلى العلامات بالستيب 2 .

شكرا كتير رهف لكلامك.

شكرا لمروركم جميعا.

Dr.mTm's picture
Dr.mTm
بعد التخرج


شكرا كتير الك زميل ع المشاركة اللي حقا رائعة لانو فعلا استفدنا منها بالرغم انو مالها موجهة لنا مباشرة لكن بالفعل هي طريقة عمل بامكان اي طالب الاستفادة منها واكيد العلامة اللي حصلتها كثمرة لها التخطيط اكبر مشجع لننهج ع طريق هيك خطة،Very Happy الله يجزيك الخير وان شاالله عقبال الستبيات البقاية باعلى العلامات

D.H.A's picture
D.H.A
السنة الثالثة


الف مبروك أب ناصر Eye-wink ..وعقبال احلى ماتش
و الله يجزيك الخير ع الموضوع

M_Shaballot's picture
M_Shaballot
طالب دراسات عليا


D.H.A : شكرا كتير لحكيك، وان شاء الله كون قدمت شي مفيد.

M_Shaballot : لك عراسي والله أحلى أبو حميد والله يسمع منك، ترا أنا بين الأيادي ها Eye-wink

Dr.mTm's picture
Dr.mTm
بعد التخرج


God bless you guys
Keep doing that, and spread your experience, as it is the most importent thing to be perfect to ace the exam
Keep it going

Hot sauce's picture
Hot sauce
طبيب مقيم


مبارك ال99 و عقبال الماتش
بالتوفيق للجميع

Al Durra's picture
Al Durra
بعد التخرج


سؤال زعيم ؟

هلق هدول " شوية قمل " بيمشي معهم الديتول و لا مستعصيين شوي Eye-wink

the.encyclopaedia's picture
the.encyclopaedia
طالب دراسات عليا


معلمينا Al Durra و Hot sauce شكرا لكم ولدعمكم السابق.

the.encyclopaedia: هادا القمل مافي غير الله بيقضي عليه Eye-wink

Dr.mTm's picture
Dr.mTm
بعد التخرج


مبروك دكتور الـ99 وعقبال الستيب 2 والماتش

وشكراً جزيلاً على مشاركتنا بخطتك وعلى (شوية الأمل)

Pink-Foreigner's picture
Pink-Foreigner
السنة السادسة


مبروك ال٩٩
و شكرا كتير

F..O
السنة السادسة


ألف مبروك ..وعئبال الستيب تو انشالله
شكرا عشوية الأمل Very Happy

Dr.Laila's picture
Dr.Laila
السنة الرابعة


شكراً أبا ناصر على الأملايات. Very Happy
الله يوفقك و ياخد بيدك Eye-wink

Ahmed.AlHalabi's picture
Ahmed.AlHalabi
معيد
ابق على تواصل مع حكيم!
Google+