تصفح
دخول
تسجيل
نسيتها؟

........يا فتاح يا رزاق يا كريم...


........يا فتاح يا رزاق يا كريم...

ملاحظة هامة جداً ......لست مسؤولاً عن رداءة الأسلوب , ولا نتحمل النتائج مهما كانت .....القراءة مسؤولية القارئ .....ايضاً لسنا مسؤولين عن تواضع المنتج...,..محاولة تستحق اولا ...لا أعرف
..............أنا والزمور وأبو النور..................

عنا بالضيعة ما في كراج للسرافيس ...يعني اذا بدك تنزل عالشام ...بدك تستنى السرفيس لحتى يزمر _ بس يزمر لازم تركض_ بأقصى سرعة من البيت للشارع العام...,لا يوجد مشعر في الدنيا بيخليك تعرف ايمتى بينزل السرفيس عالشام غير الزمور.
وانا مضطر انزل عالشام لحتى سافر على حماه من الكراجات....وفعلاً حوالي الساعة خمسة الصبح الوالد عم يفيقني"يالله بابا قوم صلي وشربلك كاسة مته قبل ما تسافر"و فعلا لسا ما صحصحت تمام وعم حط مصاصة المته بتمي إلا بلش السرقيس يزمر....وعينكن تشوف : انا عم دور عالجرابات والوالدة عم تزبط الشنتاية والوالد عم يدور على مفتاح البيت بالشام..وأخي واقف وعم يقلي ""ولك اسرع ...مشان الله استعجل ..رح يروح السرفيس"... والله بوست ايدين الأهل وبلشت اركض باقصى سرعة وبعد شي خمسين متر تذكرت انو نسيت الشنتاية....دورت وارجعت اركض بالعكس والوالد ماسك الشنتاية ولا حقني فيها ركض كمان.. بعد مارتون شاق وصلت عالشارع العام ....والسرفيس بعيد عني خمسين متر وعم يزمر ....وقفلي وقلي السائق ابو النور –ابو النور 70 سنة سائق منتهي الصلاحية من شي عشر سنين ضعف نظر مع سوابق حوادث بالجملة ..تاريخ اسود عالكواع...دبلوم طلعة فوق الرصيف.._ المهم قلي والله يا عم ما صفي محلات ...قلتلو ولما ما صفي محلات ليش عم تزمر؟....قام قلي والله عادة قديمة ما عم احسن بطلها......
رجعت عالبيت مكسور الخاطر وعلامات الغضب والقفشة تملأ محياي....يالله ما صحلي سافر الصبح يالله بسافر المسا مو مشكلة....وفعلاً السادسة مساءً زمر السرفيس وبلشت اركض ...الحمدلله هاد باص نازل عالشام..بس يحرء!!!!!السائق: ابو النور..مو معقول..لك الصبح كان عالسرفيس ...وهلأ عالباص ...سيدي مو مشكلة المهم انزل عالشام....يا سلام ما في معو ولا راكب....هاد المطلوب ....بس المصيبة انو ما في ولا محل فاضي ...معبي خضرة ليوم الخضرة...وعم يقلي يالله طلاع دبر حالك...طيب بدبر حالي بس وين فوق البندورة ولا فوق الخيار ...ولا عالبزاليا ...ولك حتى عالواقف ما في محل .
قلت لحالي ياالله بكرى بنزل الصبح بكير بعد صلاة الصبح وهيك ما بيكون في لا ركاب ولا خضرة...ما كذبت خبر تاني يوم ضبيت غراضي وأخذتهن ورحت على صلاة الصبح وانا بالركعة التانية والإمام عم يدعي دعاء القنوط ...زمر السرفيس ..محسوبكن على شوي رح يركض لو ما انتبه انو عم يصلي ....والإمام صار يزيد بالدعاء ... ما ترك دعاء يعتب عليه..لأهلنا بغزة ولأهلنا بالعراق وبافغانستان..وبالسودان وبالصومال و.......وما خلصنا صلاة إلا السرفيس كان قطع وراح .....والنكهة وين: انو الرفيس اللي راح كان سرفيس ابو النور ...يعني حظ ما في متلو.....
المهم حلفت يمين انو ما عاد اطلع مع هالزلمة طوال حياتي ....بلا طول سيرة سافرت على حماة بعد ما وصلني عمي بالسيارة عالشام...ولما ارجعت المسا قلت لحالي هات لحتى مر على الكراج بلكي بلاقي سرفيس برجع فيه عالضيعة وفعلاً كان في سرفيس واحد ....بس العمى وستين العمى ولك طلع سرفيس ابو النور.......................................
وحتى هذه اللحظة مازال ابو النور الشوفير الأول في القرية وما زلت انا الراكب الذي يبحث عن مكان له في طريق العودة...............

وقف يا زمان

ahmed-aj's picture
by
بعد التخرج


هذه القصة من وحي الواقع 100 بالمية..................

ahmed-aj's picture
ahmed-aj
بعد التخرج


كتير حلوة...
الله يكون بعونك على أبو النور
-----

ملاحظة : لازم كنت تنزلها كتدوينة...مع شوية تنسيق..

Vince Carter


اي وين المشكلة يعني
اشتري ميكرو و ضارب على أبو النور Laughing out loud

person's picture
person
بعد التخرج

Quote:
ملاحظة : لازم كنت تنزلها كتدوينة...مع شوية تنسيق..

Eye-wink

ALMOHANED
بعد التخرج


كتير حلوة

moon lover's picture
moon lover
السنة الرابعة


أنا وعما أقرأ Laughing out loud Laughing out loud Laughing out loud Laughing out loud
بس بعدين تذكرتShocked إنها مو حلقه مسلسل ساخر ولا نكته..........
حقيقه Mad Mad

Green-Foreigner's picture
Green-Foreigner
بعد التخرج


يا أخي الشوف هالمرة كان متل الحكي ....

بس كانت ميسرة معنا الحمد لله ......

ويكتر خيرو ‘‘ابو النور‘‘ انو كان بعد صلاة الجمعة بالكراج....

أمانة تسلملنا عليه كتير كتييييييييييرEye-wink

Kaka-22's picture
Kaka-22
طالب دراسات عليا


لا حول ولا قوة الا باللهSad شو هالبلد هي يا ربيCrying or Very sad

موني's picture
موني
السنة الرابعة

Green-Foreigner wrote:
أنا وعما أقرأ Laughing out loud Laughing out loud Laughing out loud Laughing out loud
بس بعدين تذكرتShocked إنها مو حلقه مسلسل ساخر ولا نكته..........
حقيقه Mad Mad
Rainy Cloud's picture
Rainy Cloud
السنة الخامسة

Green-Foreigner wrote:
أنا وعما أقرأ Laughing out loud Laughing out loud Laughing out loud Laughing out loud
بس بعدين تذكرتShocked إنها مو حلقه مسلسل ساخر ولا نكته..........
حقيقه Mad Mad
Rainy Cloud's picture
Rainy Cloud
السنة الخامسة


روح الله يعينك 000000انا الفيقة قبل ساعة من المحاضرة وركب باص دوار الجنوبي بشعر انو اكبر عقاب بالدنيا
كيف انت ؟؟؟؟

LADY HONEY
السنة الثالثة
ابق على تواصل مع حكيم!
Google+