تصفح
دخول
تسجيل
نسيتها؟

ظاهرة باب الحارة - 2 , وين العطل , بالمسحوق و لا بالغسالة ؟


ظاهرة باب الحارة - 2 , وين العطل , بالمسحوق و لا بالغسالة ؟

سلامات يا جماعة
بصراحة , فكرت أكتر من مرة قبل ما اكتب هالمشاركة , بس حسيت أني لازم اكتبها بالأخير.
من بداية رمضان قعدت أول يومين على التلفزيون مشان حاول "غربل" المسلسلات اللي عم تنعرض , و تفاجأت أنو السنة الدراما السورية متراجعة كتير عن السنة الماضية , بس الشي اللي شدني كتير كان المتابعة الهائلة لمسلسل باب الحارة.

من أول ما بلش المسلسل و انا مطنشو , بس المصيبة أنو ما بوقف مع حدا لا بالجامعة و لا براة الجامعة إلا و قاعدين عم يحكو عن العقيد أبو شهاب و بقية العضاوات , و عن أبو عصام اللي طلق مرتو الطلقة التانية لأنو قالتلو فشرتShocked Shocked ...
طبعاً هون بتبلش التحليلات و الآراء , عالم بتقول معو حق , الرجال إذا ما قطع راس القط قدام مرتو بتصير القصة شوربة , و عالم بتقول أنو هادا هضم لحقوق المرأة و هنن حالياً عم بيفكرو يأسسو جمعية لحماية حقوق المرأة تحت عنوان " فشرت و نص"...

طبعاً أنا بس بلش هادا الحديث بطفش من السيرة و على أمل أنو يتغير الوضع بس ما في أملSad

الشباب أو المراهقين الجدد ما عد عم يعيطو لبعض غير "سلامات يا رجال" Cool , أو "بليلة بلبلوكي" .. و غيرها من الاقتباسات من المسلسل !!

الأنكى من هيك أنو نهار الأربعا كنا بدنا نحضر مباريات الChampions League ب باب توما و إذ كل المحلات ناقلين باب الحارة بدال المباريات Evil Evil

الأصعب و الأصعب لسه , أنو وصلني من كم نهار على إيميلي رسالة أنو اليوم الذكرى السنوية لوفاة الإدعشريShocked , تقبله الله برحمته و ما بعرف شو !!!!

أخوه لرفيقي (و هو مقيم في دبي) حكى يوم المباراة و سألو عن النتيجة لأنو المحل اللي بيحضر عندو المباريات في دبي ناقل باب الحارة بدالها !!!!Evil Evil

يا جماعة الGroups تبع باب الحارة على الface book ما إلها مولى وعدد أعضاء بالآلاف , حتى الجرايد اللبنانية المصنفة نخبوية عم تكتب مقالات عن هالـ "ظاهرة" , باعتبارها شاغلة لسكان بيروت حالياً !!!
عندي رفيقة بتنط من الستاج على البيت فوراً مشان تلحق الحلقة على القناة الأرضية , و أحياناً بتترك آخر ربع ساعة من الستاج مشان تحضرو !!!!!

كل يوم الساعة 9 المسا , الشام أو بالأحرى الوطن العربي كلو بتلاقيه قاعد على المسلسل , و تاني يوم الصبح بيتحول الحديث تلقائياً و بدون مقدمات ليصير شو صار بالعقيد رجع و لا ما رجع , و إذا مرتو لعصام راح ترجعلو ولا لأ , و آخر أخبار أبو غالب .... أنتو أدرى بالوضع !!!

بقى السؤال , في حدا غيري بسوريا ما عم يحضر المسلسل ؟؟, أو بالأحرى في حدا غيري بيشوف أنو المسلسل السيناريو تبعو تعيس , و الإخراج أتعس , و الشط و المط بالحلقات على قفى مين يشيل , و كل 5 حلقات ليصير حدث شبه مهم, شيلكون عن الأحداث المكررة , و القصص تبع اللت و العجن ؟؟؟؟؟

برأيكم , ليش صار باب الحارة-2 ظاهرة درامية جماهيرية عربية؟ , مع أنو في مسلسلات بتحمل قيمة فنية برأيي أهم بكتير من باب الحارة , متل رسائل الحب و الحرب ل باسل الخطيب و ريم حنا , إلها علاقة القصة بالرجال اللي عم يلاقو رجولتن بهالمسلسل ؟ أو بالنسوان اللي حسو انو حريتهم اللي حصلوها اليوم بتعطي شعور أنو الوضع ممتاز بالنظر لنسوان حارة الضبع , إلها علاقة بقعدات النسوان والحكي واللت و العجن ؟؟

برأيكم , الصورة اللي عم يعطيها المسلسل للشام أيام زمان لأي حد واقعية ؟ و إذا كانت مو واقعية ليش المسلسل عم يلاقي هالرواج الهائل ؟؟

AttachmentSize
Abou-Shehab.gif27.01 KB
R27loo-Abou-el3izz.gif31.7 KB
Rja3ili.gif40.68 KB


"وعندما يغتسل قلبي ...أذكرك .."
"تنظرين إلى الأشياء .. فأراها ..."

TechnoMan's picture
by
طالب دراسات عليا


Laughing out loud Laughing out loud Laughing out loud
الصور بتعقد Very Happy أنا معك Twisted Evil هالمسلسل من اسخف المسلسلات اللي شفتها بحياتي .
اه وين أخوة التراب ونهاية رجل شجاع Crying or Very sad لا مقارنة Exclamation
بس للصراحة هالمسلسل عطاني أمل انه اذا عم يقبلوا هيك نص تعيس في أمل شي يوم اعمل من قصصي مسلسل Laughing out loud

drhanadi's picture
drhanadi
طبيب مقيم


أنا كمان معك المسلسل أكتر من عادي وما فيه القيمة الاجتماعية أو الحبكة المهمة فالمسلسل كله يتمحور على أن أحدهم طلق امرأته ... (يا لطيف) وكأنه هذا الشي ما صار بعمره...

وأنا ما شفت منه إلا حلقة وحدة أو حتى يمكن أقل ...

بس يمكن التفسير الأكثر منطقية لهذا الشي من الانجذاب الغريب لهذا المسلسل بالذات ..
هو متل ما بتعرف ... أي مسلسل أو عمل "فني" على التلفزيون هدفه الأساسي هو الإمتاع بالدرجة الأولى وبعدين أي شي تاني يمكن يكون موجود من رسالة معينة من أسلوب فني خاص وإلى غير ذلك ...
وهذا الشي بتصور هو الموجود وبقوة بالمسلسل .. فأكيد العالم كلها عرفانة أنو القصة عادية والسيناريو عادي كتير ... بس بتصور المخرج استطاع أنه يخلي هذا الشي كتير ثانوي لما ركز على بعض الحركات وبعض الألفاظ مثل " يا باطل "، " العقيد " و " الزكرتي" وصفات الشهامة والكفونة وغير شي ويلي الناس بتحبها ... مشان هيك الناس عم تستمتع بهي الشغلة أكتر بكتير من القصة نفسها يلي هي كتير عادية...

وشي أخير .. غالباً (طبعاً مو دائماً) الأعمال المهمة ويلي لها قيمة فنية مهمة ما بتكون جماهيرية .. والعكس صحيح..

سلام..

marabd's picture
marabd


ههههههههههه الصور حلوين ابعتهن للدكتور أوس

أنا ما بحب هالمسلسل و أنا وياك حكينا بهالموضوع

برأيي تعلق الناس فيه جاي من الفراغ العايشين فيه
الفراغ الناتج عن نقص الحرية,الكبت,الجهل,الذل,و انعدام أسباب الفخر و الكرامة و ندرة قصدي انعدام نشوات النصر

لهيك بتلاقي الكل لما فلان بالمسلسل يضرب فلان نط و عيط هي هي هي هي

يعني هالصور المعروضه بالمسلسل صارت متل الدوا الوهمي.
أو شي جرعة بتخلينا ندوق طعم الرجولة و الأصل و الخير و لذة الانتصار على الشر و غيرو و غيراتو ,,,,جرعة وهمية.

warrior's picture
warrior
السنة السادسة


بصراحة انا بكره المسلسلات كره شديد و بصراحة أكتر هيك نوع من السلاسل لا يزيدنا إلا تخلفاً و غباءً ...يعني مع احترامي للمخرج بس الظاهر أنو حابب يعكس صوره عن المجتمع السوري و يشوهه...لشو لنفتخر بعادات بالية و متخلفة متل العادات القديمة..
أنا معارض لنشر مثل هذه التفاهات و على وزاره الإعلام تشديد الرقابه على هالأمور.

The Crash's picture
The Crash
طالب دراسات عليا


الصور بجننو!

المسلسل بايخ وبالفعل ما الو طعمة..
بدل ما نمشي لقدام عم نرجع لورا..

هن بفكرهن انو عم يذكرونا بأمجاد الماضي والأخلاق اللي كانت فيه، منقوم نحنا منتحسن ومنبلش نحترم بعضنا..
ما بيعرفوا انو شعبنا اذا بشوف إكسير الخير عالتلفزيون، أول ما تخلص الحلقة بدير وشو وببلش جز بهالعباد!!

هاد غير انو كتير مبالغ فيه، وما ممكن صدّق انو الناس من 60 سنة كانوا حبابين، وهلأ لحتى بلش سخلق ناس وسخين ..

لهلأ ما عم تزبط معي، شو هالهدف العظيم من هالمسلسل (غير الربح المادي السريع) اللي خلا صديقنا المخرج وعزيزنا المؤلف يعمل جزء تاني لهالملحمة.. مع انو الجزئين ممكن يختصروا بتمثيلية سهرة مدتها ساعتين بالكتير !!

Leo's picture
Leo

Quote:
سخلق

يخلق Embarrased

Leo's picture
Leo


انا رأيي عكس رأيكون تماما

باب الحارة هو من اجمل المسلسلات الرمضانية

ولو اني ما شفت منو ولا حلقة ولا بعرف مين بيمثل فيه ولا بحياتي عرفت عن شو عم يحكي .....بس هو احلى مسلسل اسألوني ليش؟؟؟

لانو اكتشفت من اول رمضان انو المكتبة عل وحدة وحدة ونص مابيبقى فيها الدومري وبتصير هادية ولا احلى ولمن استفسرت عن السبب قالولي انو باب الحارة بيطلع بهالوقت

بقا الله يخليلنا باب الحارة وياريت يستمر لبعد رمضان Laughing out loud Laughing out loud Laughing out loud

drpinkypanther's picture
drpinkypanther
بعد التخرج


أنا مابقدر تابع ولا مسلسل سوري اطلاقاً..

bigmind's picture
bigmind
طالب دراسات عليا

drpinkypanther wrote:
انا رأيي عكس رأيكون تماما

باب الحارة هو من اجمل المسلسلات الرمضانية

ولو اني ما شفت منو ولا حلقة ولا بعرف مين بيمثل فيه ولا بحياتي عرفت عن شو عم يحكي .....بس هو احلى مسلسل اسألوني ليش؟؟؟

لانو اكتشفت من اول رمضان انو المكتبة عل وحدة وحدة ونص مابيبقى فيها الدومري وبتصير هادية ولا احلى ولمن استفسرت عن السبب قالولي انو باب الحارة بيطلع بهالوقت

بقا الله يخليلنا باب الحارة وياريت يستمر لبعد رمضان Laughing out loud Laughing out loud Laughing out loud

والله بهي صدقتي وأحلى دراسة بين 1-4 Cool

drhanadi's picture
drhanadi
طبيب مقيم


أخيرا حدا حكى عن هذه المهزلة الدرامية....
حقا أنا أأسف على درجة التخلف و الجهل الذي وصلنا إليه و الذي بات يتسلل إلينا من شباك الحارة...
أنا حقا من دعاة حرية الرأي و لو جاء أحد و قال لي أن أخوة التراب مثلا مسلسل جميل لوافقته على أنه جميل و لكني لا أحبه:لكن عدم إعجابي به لا ينفي جمال المسلسل من عدة نواحي

أما هذه المسخرة الدرامية التي تقبع خارج كل حدود الفن فهي من أسخف ما شاهدت على الإطلاق...و كيف سأبدأ؟
أبالإخراج الذي لا يكتفي بالضعف الدرامي و الاحداث المكررة بل ينتقل إلى أخطاء بسيطة جدا من المعيب أن تظهر على شاشة تلفزيون
السيناريو الذي يخلو تماما من أية قصة أو أحداث هامة مجرد حياة عادية مصطنعة بكل تكلف ثم رسم سخيف و سطحي للشخصيات التي تتغير تبعا لهوى الكاتب
التمثيل الذي بالغ بالسوء إلى حد لا يطاق أبدا و ربما يكون هو أسوء ما في المسلسل خاصة بعد غياب العملاق بسام كوسا عنه

أما لماذا يكسب مثل هذا المسلسل شعبية كبيرة؟فالسبب الأول طبعا هو الجهل
ففي مجتمع كالذي عندنا نلاحظ ظاهرة ملفتة و هي أن العمل "الفني" الذي يلقى رواجا إما أن يكون ذو قيمة فنية عالية جدا أو منخفصة جدا
"أحلام كبيرة" حصل على نجاح كبير ربما حصل عليه ليالي الصالحية أو غيره من ذوي الضعف الفني(مع احترامي الكبير لأحلام كبيرة)
و هذا لا يقتصر على العمل الفني السوري فسخافة الكوميديا المصرية في هذه الأيام قد تضاهي لا بل تزيد سوءا و ضعفا (محمد سعد-الهنيدي..)
و حتى في مجتمع كالاميركي مثلا نلاحظ هذه الظاهرة التي تختفي في أوربا مثلا فيلم transformers وApocalyptico حصلا على أعلى المراتب في شباك التذاكر الأميركي بينما لم يحصدا أي إقبال يذكر في أوربا
و قلة قليلة من أفلام هوليوود التجارية استطاعت أن تنافس في كان و البندقية و برلين و حتى تورنتو في السنوات الأخيرة

AngelicSky's picture
AngelicSky
السنة السادسة


شو متوقعين من الشعب؟ طبعا هالظاهرة هي نتيجة طبيعية للوضع المتخلف يلي عايشينه.
و هالطريقة للعرض مو واقعية, صحيح كان في تخلف بس مو بهالشكل القبلي..!
يعني ما عم افهم شو مغزى هالعلاك - مع إحترامي لكل مين عم يتابعه- شو الفكرة؟ شو الهدف؟؟؟
و technoإذا بدك عم تصير مشاكل عالfacebook بتوصل لأرض الواقع و بسبب هالسخافة هي...و إجتماعات لمناقشات الحلقات...
بس مو بس هالظاهرة بسوريا... يعني بأميركا في مهرجان لفيلم حرب النجوم كل سنة بيجتمعوا المهووسين فيه ليتبادلوا أفكار تافهة و مالها طعمة just for fun لكن هون just to waste time and enforce the stupid mentality of arabs

Dania's picture
Dania
السنة الرابعة


ليش يعني كل هالجكر ؟
المسلسل تجاري هدفه الربح و مو شرط يوصل افكار سامية او تكون الو غايات عظيمة
هدف المسلسل التسلاية و الفرفشة و ساعة ضحك بالنهار ما رح تخرب الدنيا
والله انا متابعه و بشوفو حلو و بضحك و بسلي
و اللي عاجبه يحضره و اللي مو عاجبه ما حدا جبره

Quote:
قلة قليلة من أفلام هوليوود التجارية استطاعت أن تنافس في كان و البندقية و برلين و حتى تورنتو في السنوات الأخيرة

الشعب الاميركي work like a donkey طول الاسبوع فعلى الويك اند بدن يشوفو شي بسلي مو شي من اقلام المهرجانات اللي كل التصوير عتمة بعتمة و ما بتفهمك شي من الحوار و بتنام بنص الفيلم
و الله انا مستعد شوف transporter للمرة العاشرة على اني شوف فيلم من تعون كان او البندقية
في النهاية الاعلام بزنس و سلعة بتنباع بدك تبيع شي يحبوه الناس مشان تربح اما الفن للفن فهدا حكي انقرض

Dr_Ayyad
بعد التخرج


الفن لا يموت و لاينقرض أبدا....أما أفلام المهرجانات التي قمت بذكرها فقد يكون بعضها من أجل الفن بحد ذاته لكن ذلك لا ينطبق على كثير من الأفلام التي تستطيع تحقيق الربحية مع الفن

For example, Tarantino, Rodrigues and Gonzales have many movies that both are interesting to watch and "artistic" at the same time.Please how for god sake can a movie like transporter be compared with any of Tarantino's?
You can,however, watch that kind of, I don`t know what u call it, but please don`t put it under the category"Movies" or "art".Surely it's sth else
AngelicSky's picture
AngelicSky
السنة السادسة


تمام أنجيليك , هادا اللي كنت حابب وصلو من فتح هالموضوع.

القصة كلها أنو برأيي ببساطة هادا ما أسمو فن , و لا إلو علاقة لا من قريب ولا من بعيد بالفن , و المشكلة بتبلش لما بيجي حدا ليقلك الفن منحدر و ما إلو فائدة , و بيجي بيعطيك مثال باب الحارة.

ممكن أو بالأحرى مظبوط أنو المسلسل ناجح جداً تجارياً , و بعتقد أنو الأكثر حضوراً في رمضان , بس هادا هو المشكلة , ليش نجح المسلسل , يا ترى فعلاً لأنو شي خفيف و نضيف ؟؟
مع العلم أنو الغالبية الساحقة من الاعمال الدرامية هذه السنة هي شي "خفيف و نضيف" , فليش ما "نجحت" متل هـ"النجاح" ؟

تعودنا من زمان أنو من الممكن جداً - و هذا أحد أشكال الإبداع- أن يكون للفن قيمة اجتماعية إضافة لل Entertainment

بمعنى أن المتعة تترافق مع القيمة الفنية , و التي هي تجسيد عملي لحياة اجتماعية و فكرة وعقيدة و رغبة عملية في الإصلاح أو التوجيه أو ...

ولكن المشكلة في الأيام الأخيرة أنو المسلسلات صارت بكم هائل دون أدنى نوعية , و هذا بحد ذاته مصدر دمار قادم للنهضة الدرامية في سوريا.

لا أنكر أنني من متابعي الدراما السورية , و أعتقد أنها قدمت للدراما العربية ما لايقل بل ويتفوق أحياناً على الدراما المصرية خصوصاً في الفترة الأخيرة , و لكن يبدو أن النهاية جاءت سريعة ... على أمل أن أكون مخطئاً ..

القصة مو قصة جكر و لا قصة انو نجبر العالم ما تتفرج عليه , بس القصة قصة زعل على الوضع الفني اللي كل ما قلنا أنو بلش يتحرك شوي و ينفض الغبرا منلاقي أنو رجعت قصص الBusiness تتصدر أهدافو , و للأسف إذا بدك تعمل بزنس ببلاد نامية أو متخلفة , لازم يكون البزنس تبعك متخلف لحتى يماشي تطلعات هالشعب ..

Quote:
اما الفن للفن فهدا حكي انقرض

مو بالضرورة يكون الفن للفن , الفن هو أحد أهم الأسس في بناء مجتمعات جديدة و النهضة الأوروبية الحديثة أوسع من أني افتح موضوعها هلق , و هي بدأت بالنهضة الفنية, مع العلم بأنها لم تبدأ بفكرة "الفن للفن" فهذا موضوع آخر ..

برأيي أيضا ًأن :

Quote:
الفن لا يموت و لاينقرض أبدا....

قد يترنح أحياناً و لكنه سيبقى وسيلة لإظهار الإبداع , و لنهضة المجتمعات.

على كل هادا رأيي.
و إن كنت أرى فعلاً أن مسلسل مثل باب الحارة قد غطى عقد النقص عند رجال هذه الأيام , و أشعر النساء أنو فعلاً حصلو على حقوق بحياتون ما كانو يحلمو فيها ما خلق نوعاً من الرضى الذاتي و اللذة في متابعة نساء تلك الأيام.
عدا عن المساخر بتفسير الدين اللي عم نشوفها , و الأخلاق اللي عم يظهرا المسلسل كأنو كانت الحارة أقرب للمدينة الفاضلة , بس ببساطة متل ما قال ليو بهالعبارة البسيطة :

Quote:
وما ممكن صدّق انو الناس من 60 سنة كانوا حبابين، وهلأ لحتى بلش يخلق ناس وسخين ..

لأنو هالشجرة اللي عم نشوفا اليوم , هديك جذورا و هادا واقع مافينا ننكرو

يعني ببساطة المسلسل عايش على كذبة , و للأسف الكذب ببلادنا هو البضاعة اللي ماشي سوقها , يبدو لي أن العطل في الغسالة قبل أن يكون في المسحوق.

TechnoMan's picture
TechnoMan
طالب دراسات عليا



ياجماعة هاد كان ألذ واحد بكل المسلسل
الله يرحموا Laughing out loud Laughing out loud Laughing out loud Laughing out loud

jemeni_boy's picture
jemeni_boy
السنة السادسة


ما قرأت الردود لأنو ما شاء الله كل رد بدو نص ساعة قراءة

بس فهمت أنو الردود معترضة على المسلسل

أنا ما رح ناقش فكرة المسلسل ولا زمنو ولا أهدافو

أنا هاد ما بتابعو لا بيهمني

أنا بحب أسلوب التمثيل وبس ... يعني أنا بتابع بالمسلسل شخص معين بكل حركاتو وكل لفتة بيلفتها .. بهدف متابعة أسلوب التمثيل وتقمصو للدور .. بغض النظر عن مين هوة الممثل وشو دورو .

أنا بالنسبة إلي شفت بهالمسلسل إتقان رهيب بالتمثيل, ولفتات وحركات تمثيلية لا تخرج إلا من محترفين, وهاد لحالو بيكفي لحتى تابع بعض الشخصيات.

روان's picture
روان
بعد التخرج


شو سويتي يا خوفي تكوني أنتي الي بتكتبي سيناريوهات المواضيع في حكيم الفترة الماضية(كلها خناقات).
أما بالنسبة لباب الحارة فأنا من النوع الي ما بيجذبني مسلسل
يعني شفت الناس قاعدة بتتفرج, بقعد معهم و غير هيك ما بتابع.

بحب بالمسلسل الكذب الفاضي والتوجيب والاحترام المصطنع.
يعني بيجي أبو النار غارة على حارة الضبع فبقوم أبو عصام هو والعقيد بحديث درامي بفقع من الضحك ,فكل جملة فيه بتشمل (بعد إذن شواربك. لو سمحتلي العقيد , بتمون أبو عصام, شو تاج راس الحارة, أمرك معلمنا) لك الجماعة رايحين بعد شوي يندقوا قتلة وهم نازلين يوجبوا ببعض وينفخوا ببعضهم وخود من هالبروتوكولات الفاضية .

مسلسل العام القادم: حارة المزة أتستراد والعقيد الركن أبو شنكل

Dr.Falcon's picture
Dr.Falcon
السنة الخامسة


بس حابب ألفت نظر أن الدراما السورية برأيي لا زالت بخير و أن الظاهرة هذه إنما نتجت عن مقاطعة إعلام "بعض الدول العربية" للإبداع السوري....حتى بالفن!!!!

AngelicSky's picture
AngelicSky
السنة السادسة


والله المسلسل مسلّي ..

يعني بصراحة ماني عرفان ليش محمليها زيادة "حتى المسلسل حتعملوا فيه أهداف اجتماعية وثقافية" يعني معلش كمان الواحد لا يزودها .. بالعكس المسلسل حلو ومضحك وأحلى من كتير مسلسلات بتقوم مهموم وحاسس الدنيا كلها مشاكل ..

عيشوا حياتكم يا طلاب الطب "نداء لا تزعلوا مني"
أنا ماعم بقول أنه المسلسل توب أو لازم تتابعوه بس لا تحملوها زيادة بنفس الوقت ..

Laughing out loud Laughing out loud Laughing out loud Laughing out loud Laughing out loud Laughing out loud Laughing out loud Laughing out loud

DR-MAK


و ليي أنا ما بحب هالمسلسل بس بضطر شوفه كل يوم مرتينMad .
هادا انا مسجلة دورة سواقة و بركب بالباص تبع المدرسة الساعة 2 بتكون عم تطلع و شاعلين تلفزيون بالباص و الكل عم يتفرج بما فيهم الشوفيرCrying or Very sad Crying or Very sad "الله يجيرنا"
و منكون بالمدرسة وقت بتطلع الساعة 3 مدري 3و نص و كمان بالمدرسة بيكونوا شاعلين التلفزيون و الكل عم يتفرج، حتى العالم درس الميكانيك ما عاد حضرته مشان يشوفوا باب الحارة براة الصف قام صار أستاذ الميكانيك يغير وقت الدرس على وقت باب الحارة مشان العالم يفوتوا عالدرس Laughing out loud .

SINA's picture
SINA
طالب دراسات عليا

TechnoMan wrote:

بقى السؤال , في حدا غيري بسوريا ما عم يحضر المسلسل ؟؟,

منيح لقيت مين ينضم للقائمة معي

" نحن جماعة المتخلفين عن مشاهدة أعظم مسلسل تشهده الساحة العربية ولا فخر ..Mad .. "

---

موضوع هام و طريقة طرحه جميلة و موفقة ..

prettyflower's picture
prettyflower
بعد التخرج

sorry, this is the first time to read this topic, i though you were talking about what's happening in the series so i wasn't interested..
Quote:
في حدا غيري بسوريا ما عم يحضر المسلسل ؟؟

hello!

dr.tabban's picture
dr.tabban


وقت قلت انو منتدى حكيم هو شكل خفي من أشكال حب الظهور ما حدا صدقني ...
لاحظوا يا جماعة كيف كل واحد فينا صار بدو يورجينا مثاليتو وانو هو ما بيهتم بهالترهات اللي معظم الناس مهتمين فيها ...
يا أخي اللي حابب يقول شي كان يبدي رأيو وبس من غير ما تقيموا هالمسلسل واللي بيحضر هالمسلسل ...يعني أنا من حوالي أسبوع صرت تابع هادا المسلسل مو لأنو كان تافه لا بس أنا ما كان جاي على بالي تابعو وهلأ صار عندي فضول اني تابعو بس ما في داعي هيك اقعد ورجي مثاليتي لغيري
وبحب ذكركم بهالقول :لا تدع يقين ما عندك لشك ما عند الناس...

الناسك الحزين's picture
الناسك الحزين


الحقيقة إن نجاح المسلسل أو فشله يقاس بعدد المشاهدين و الضجة التي يحدثها وتأثيره على مختلف الفئات العمرية و الثقافية
وليس فقط الرسالة التي يحملها أو الأفكار التي ينشرها

وباب الحارة ناجح جدا في جماهريته و ووصوله لفئات عمرية وثقافية مختلفة دون خدش حياء أو ابتذال
اما عن الرسالة والفكرة فليس من الضروري أن من يحب المسلسل سيتصرف كما تفعل شخصيات المسلسل ولاأعتقد أن المسلسل يروج لاضطهاد المرأة لأننا كلنا نعلم أن هذه مرحلة مضت ولن تعود

واستغرب الانتقادات للإخراج والأداء التمثيلي مع أنهما أجمل ما في المسلسل حيث أبدع بسام الملا في بعث أجواء الحارة القديمة ونسج شخصياتها وهذا الحضور القوي للشخصيات اضافة للمسة المخرج الفنية هي سبب التفاعل الجماهيري مع المسلسل وإلا بماذا تفسرون شعبية المسلسل في الجزائر والخليج و فلسطين وحتى لبنان 14 أذار

إن اتهام الاغلبية الساحقة من الشعب العربي بانعدام الذائقة و الابتذال هو اتهام في غير محله وينم عن نرجسية

ويعترف معظم المنتقدين انهم لم يتابعوا المسلسل فأين الموضوعية

هناك نقاط سلبية ولا شك وقد ذكر معظمها ولن أكررها
ولكن ماذا عن الكثير من الإيجابيات
وماذا عن قيم المروءة و الشهامة ومساعدة الفقير والإحترام المطلق للوالدين وكبار العمر أو أصحاب الرأي والحرص على السمعة الحسنة
كل هذه القيم ماتت أو أوشكت وهذا من اسباب نجاح باب الحارة

واخيرا نجح المسلسل في حصد كثير من الردود على حكيم وأثار نقاشا أخر والمسلسل الفاشل لا يثير أي اهتمام أصلا

alfarok


يا سلام شو فاضيين
رد صفحة كاملة على .... مسلسل!!!

هزلت......

Dr.Judge

TechnoMan wrote:
, أو بالأحرى في حدا غيري بيشوف أنو المسلسل السيناريو تبعو تعيس , و الإخراج أتعس , و الشط و المط بالحلقات على قفى مين يشيل , و كل 5 حلقات ليصير حدث شبه مهم, شيلكون عن الأحداث المكررة , و القصص تبع اللت و العجن ؟؟؟؟؟

معكـ حق 100%، مع إني بشوفه أحياناً و بصراحة انعل قلبي منه، بس حدا بيضيع مباراة مشان مسلسل؟ حكم يا زمن Rolling Eyes

و إ>ا حدا لاحظ المواقف التافهة اللي بيخلو الأبطال يوقعوا فيها مشان تطول القصة، كل المسلسل بيتلخص بـ 15 حلقة و بس،الحق عليهون ما أخدو رأيي قبل ما يعملوه Cool Cool

Bellatrix's picture
Bellatrix
بعد التخرج


تحياتي زميل فاروق
في البداية أنا لم أقل أنني مترفع عن مشاهدة هذا المسلسل,على العكس فقد شاهدت كثيرا منه نظرا لأنني أرفض أن أنقد شيئا لم أطلع عليه
أنا أكره عمرو دياب لكنني أملك كل ألبوماته و طبعا إذا فكرت في ذلك ستجدني أبعد ما يمكن عن التناقض و أقرب إلى الموضوعية

Quote:
الحقيقة إن نجاح المسلسل أو فشله يقاس بعدد المشاهدين و الضجة التي يحدثها وتأثيره على مختلف الفئات العمرية و الثقافية
وليس فقط الرسالة التي يحملها أو الأفكار التي ينشرها

وباب الحارة ناجح جدا في جماهريته و ووصوله لفئات عمرية وثقافية مختلفة دون خدش حياء أو ابتذال

لا أعتقد لا أنا و لا techno قلنا أن المسلسل غير ناجح جماهيريا
على العكس نحن نقدنا ذلك,و هذا أمر برأيي من السذاجة إنكاره
لكن بالمناسبة إن "فنانة" مثل نانسي أو هيفا تحققان أكثر شعبية أكثر من سمزناتة ضوء القمر لبيتهوفن,يعني أنا ما عملت إحصائية بس هيك بتوقع ما؟,...
هل هذا يعني -لا سمح الله- أن نانسي أفضل فنيا من بيتهوفن؟
هذا في معرض حديثك عن الجماهيرية
أما إذا أردت أن تخبرني عن حرية الرأي فلك هذا
و أنا قلت سابقا أن للمرء أن يشاهد ما يشاء و لكن إدراج هذه الأعمال تحت بند الفن فهذه جريمة
على العمل أن يحقق نسبة دنيا من المعايير الفنية حتى يكلق عليه اسم فن
و لننتقل كما تريد زميلي إلى نقد مختصر للمسلسل:
1.التمثيل:بلا شك هو الأسوء, و باستثناء بعض الأدوار التي لعبها الشاب الأعمى (صطيف) و ربما عباس النوري فإن المسلسل يفتقر إلى أدنى درجات التمثيل الفني.(معتز) مثلا يثير الضحك من طريقة مشيته و تصرفاته المبالغ فيها إلى حد الكوميديا و الهزل.(أم عصام)تغير من أسلوبها بين ليلة و ضحاها و كأنها إنسان آخر.و التصرفات الدقيقة الخاطئة كثيرة في كل حلقة إن لم يكن في كل مشهد
2.الإخراج:اختيار خاطئ للكاميرا من حيث أخذ لقطات close-up في غير مواضعها.غياب عناصر من أهل الحارة 1 بدون أي مبرر.
3.السيناريو:هل هناك حاجة لذكر كم من الأحداث قد أقحمت إقحاما واضحا لتمطيط المسلسل؟
رسم ساذج للشخصيات (طيب-شرير)و كأننا بشي مسلسل بوكيمون(يستثنى من ذلك شخصية أبو غالب و التي أيضا عرضت بأسلوب مباشر جدا و ساذج)

Quote:
وماذا عن قيم المروءة و الشهامة ومساعدة الفقير والإحترام المطلق للوالدين وكبار العمر أو أصحاب الرأي والحرص على السمعة الحسنة

هل من هذه القيم العظيمة اعتبار المطلقة شبه إنسان؟
و ما هذا الاحترام المطبق للوالدين الذي هو أشبع بشكل بشع من الطاعة العمياء التي لا تدري أين تمشي؟و هل طاعة الأخ أو بالأحرى الرضى بضربه و بطشه واجب أيضا؟
ثم إذا كان كل ذلك جيدا....لم ظهرت هذه الشجرة السيئة من ذاك الأصل "الجيد"؟
أعتذر عن الإطالة و أرجو أن تحمل مشاركتي فائدة ما

AngelicSky's picture
AngelicSky
السنة السادسة


e7trna ya 2r3a mn wen bedna njdlek Laughing out loud

Dr.Syrian's picture
Dr.Syrian
طبيب مقيم


we will always love
الإدعشري

jemeni_boy's picture
jemeni_boy
السنة السادسة


سلام.....
صراحة...أنا ما بشوف مسلسلات على التلفزيون.....كم مسلسل شغل ER,Friends,Prison Break.....بالإضافة لمسلسلات الـ Anime على الكمبيوتر بمشي حالي.....لهيك ما رح أنقد بالمسلسل وأحداثه وأهدافه....
الشي الوحيد اللي مضايق منو أنو كل الشباب صار موضوعهم الأساسي باب الحارة....كأنه ماعاد في موضوع تاني ينحكى فيه....
يا جماعة.....حتى لو كان مسلسل رهيب بالأفكار والتمثيل والرسالة كمان...معقول نضل طول النهار نحكي ونناقش باللي صار واللي رح يصير؟؟؟....

Fouad's picture
Fouad
بعد التخرج
ابق على تواصل مع حكيم!
Google+