تصفح
دخول
تسجيل
نسيتها؟

بدي مشورة كل طالب طب.اذا سمحتو ادخلو


بدي مشورة كل طالب طب.اذا سمحتو ادخلو

سلام
شباب انا هلأ بكلوريا وضل ان شاءالله شي شهرين وبخلص وماني عرفان شو ادرس.
هلأ لو ماطلعلي طب بجامعة دمشق مو مشكلة بفوت جامعة خاصة بس أنا خايف تكون الجامعة الخاصة dooooown ومستواها مو زيادة مع انو اختي طب سنة 2 بجامعة دمشق ودائما بتقلي ان الكلية كلها بصم ببصم وماعم يفهمو شي.
هلأ من ناحية الرغبة بالطب أنا مابطيئو أبداً بس بفكر اني ادرس طب مشان المستقبل بس.
أنا صاححلي فرصة لدراسة أي فرع من فروع الهندسة في جامعة ترتيبها من ضمن 100 جامهة بالولايات المتحدة لأنو عمي professor باجامعة وبيقدر يساعدني كتير.
أنا بعضق الهندسة المدنية وكتير بفكر اني ادرسها بس شو رأيكن مين أحسن الطب "بجامعة دمشق" ولا هندسة مدني بأميركا؟؟؟

أنا حبيت اسئل السؤال لطلاب الطب لأنو متل مابيقولو "أهل مكة أدرى بشعابها".

بتمنى كل واحد يعطيني رأيو بصراحة.

سلام

by
المرحلة الثانوية


لفتني تساؤلك و اسمحلي قلك وجهة نظري:
أولاً- أنا متفاجأة أنك بهالوقت (نهاية نيسان) عم تشغل حالك بالتفكير بأمور متل هي...المفروض هلأ يكون كل تركيزك بالفحص!!
ثانياً- عادةً يفضل نقاش هالأمور بعد النتائج لتشوف بالأول شو طلع معك و على أساسها بتحكي...و مهما كان الفرع يلي بدك ياه لازم هلأ تبذل جهدك بالدراسة لأنو الهدف أنك تجمع المجموع المثالي و تكون حر نفسك بالاختيار..
تالتاً- "و يمكن الأهم بالنسبة ألك" الاختيار بين أميركا و دمشق بيتوقف عليه أمور معيشتك و مستقبلك يلي نحن ما منعرف عنن شي لنقدر نفيدك..
اما بالنسبة للطب فدراسته ممتعة و ما لها تبصيم أبداً...ما جربت الهندسة المدني لأعرف أي أحلا بس بالنهاية شوف رغبتك لشو بتميل لتقدر تبدع بهالمجال
و متل ما قلت الجامعات الخاصة لغيها من بالك..
إن شاء الله كون قدرت فيدك..تقبل مروري..

noumeh


اللي ما "بحب" الطب مارح يصبر عالبلااااء المرافق لدراسته ثم لظروف عمله، ومستوى الجامعات الخاصة ووضعها سيء متل الحكومية مع بعض التميّز وبراءات الاختراع بالاضطرابات الادارية والتنظيمية.
هندسة مدني بأمريكا أحسنلك
اعمل استخارة والله ييسرلك الخير وين ما كان
بالتوفيق

S.AMH's picture
S.AMH
بعد التخرج


فكرة عالهامش: يلي بيقول الطب بصم ببصم هو مع احترامي ما بيعرف شو هو الطب. مفكر الطب هو محاضرات النسج والتشريح يلي عم ياخدها. او حتى محاضرات الباطنة يلي عم ينحت فيها قبل الفحص. كتير ساذجة هالفكرة.

Nostradamus


حلو انك عم تفكر بمستقبلك من هلأ وخاصة انو الجامعات الامريكية بدها شغل ومراسلات قبل بفترة ولازم تعرف كيف بدك تدبر امور معيشتك وما الى ذلك في حال قررت تنتسب لاي جامعة هنيك.
الطب فرع حلو كتير وممتع ومجاله واسع لكن مسيرته اطول من باقي الفروع. عموماً مناهج الطب بتعتمد على الفهم والبصم معاً الا في كليتنا ومع احترامي لكل من يخالفني الرأي فالطب عنا بيعتمد على البصم في اغلب الحالات لدرجة انو السؤال بالامتحان بيختلف جوابه حسب الدكتور الي حط السؤال ومارح قول اكتر من هيك. لذلك فاذا كان بدك معدل لحتى تختص بالبلد فلازم يكون عندك ذاكرة مساحتها كبيرة والحظ كمان بيلعب دوره ببعض المواد اما الفهم فهدا اجتهاد شخصي بيعتمد على مدى شغفك بالمادة وعلى براعة بعض الدكاترة رغم ندرتهم. الطب كمان بيحتاج لصبر وتفرغ شبه كامل وهدا مو بس عنا بكل بلدان العالم فلازم تاخد هالموضوع بعين الاعتبار. برجع بقلك انو الطب فرع اكثر من رائع بده محاكمة جيدة ومخيلة مفتوحة وعقلية تطرح الاسئلة ولا تقبل باول جواب متوافر.
بالنسبة للهندسة المدنية فحسب معلوماتي الضحلة الفرع بيحتاج لجهد كبير ومخيلة ومنطق وشغف ومجاله العملي يختلف حسب الدول فهو ممتاز في مناطق ومزري في مناطق اخرى وهي النقطة لازم تفكر فيها خاصة اذا بدك ترجع تشتغل هون. مابعرف اذا نفس الشي بينطبق على جامعات الولايات المتحدة كلها ولكن حسب تجربتي بمدارس امريكية واختلاطي مع طلاب جامعات هنيك فبرايي الموضوع بيستاهل تعطيه مقدار زيادة من الاهتمام واكيد بيقدر عمك يشرحلك اكتر عن الوضع وعن اسلوب التعليم والدراسة.
بالنهاية نصيحتي الك وبحكم تجربتي اختار الفرع الي انت مهتم فيه ولا تضيع سنين حياتك على شي ممكن تندم عليه، وما تخاف من المستقبل.. انك تكون مهندس ناجح افضل نسبياً من طبيب فاشل. الحياة مارح تعيشها غير مرة وحدة فليش ما تكون انت صاحب القرار والمتحكم فيها لانك اولاً واخيراً انت الي رح تتحمل مسؤولية هالقرار Smiling
مع تمنياتي بالنجاح والتوفيق في الامتحانات النهائية  

over-the-counter's picture
over-the-counter
السنة السادسة


الأهم الآن هو الامتحان ثم الامتحان ثم الامتحان ثم الامتحان ثم الامتحان ثم الامتحان .....
لا تشغل بالك الآن إطلاقاً بما هو أبعد من معركتك الأساسية في حزيران ...
لكن لكي أعطيك جواباً شافياً : المهم هو أن تدرس ما ترغبه أنت و ما تشعر أنه بوسعك أن تبدع به ... من يختار طريقه بعناية و حرية و قناعة و عن رغبة سينجح حتماً في الدراسة و سينجح بالتالي في عمله بالمستقبل ...
ليس المهم أين تدرس في أمريكا أو دمشق أو بورتوريكو ....الخ .. المهم أن تطارد حلمك أينما كان طبعاً بعد أن تحقق مرادك في الامتحان القادم ..
بدك هندسة مدنية .... نيّالك ... Eye-wink
موفّق .. Eye-wink

MARSHAL's picture
MARSHAL
بعد التخرج


بدهاش سؤال ...اضحك بعبك

MH the best's picture
MH the best
بعد التخرج


هندسة بأمريكا، قولا واحدا!!! انت بتحب الاختصاص وبتقدر تدرسو بجامعة محترمة ورح ترجع تعمر بلدك، والنتيجة رح تكون احسن من انك تدرس اختصاص مانك طايقو، بجامعة انت اساسا شاكك بقدراتها...

dr.tabban's picture
dr.tabban


الطب بدو شخص رغبانه ورايده ليحسن يتغلب ع صعوباته وضغطته ويتحمله
إنت بتقول أنو معليه تتحمل سنوات كلية الطب وبعدين المستقبل جاهز
هالحكي غلط ، لأنو الطب حياة متكاملة مستمرة معك لاخر يوم ....
إن حابب هندسة وصاححك فرصة بجامعة محترمة ، فعليك بها Surprised Very Happy
الله يوفقك Surprised

Green-Foreigner's picture
Green-Foreigner
بعد التخرج


دروس الشي يلي حابو ويلي هو من حكيك هندسة بجامعة اميركية
بس نصيحتك الك,لا تفكر بهالشي من هلأ, احسن ركز على البكالوريا تبعك لانو اذا ضليتك عمتفكر وشاغل بالك يمكن اخر شي تصير عمتختار بين معهد هندسي ومعهد طبي.
بالتوفيق

mbs2380's picture
mbs2380
بعد التخرج


على فكرة، البوست من سنة 2012.. الزلمة بيكون هلق قرب يتخرج، بس يا ترى شو درس!

Ahmed.AlHalabi
طبيب مقيم


على فكرة، البوست من سنة 2012.. الزلمة بيكون هلق قرب يتخرج، بس يا ترى شو درس!

Ahmed.AlHalabi
طبيب مقيم
ابق على تواصل مع حكيم!
Google+