معاملة خاصة لطلاب الجامعات الخاصة

كلام خطير

والوضع ما بيصير أبداً ينسكت عليه

للأسف هذه الخطوة تعكس الدرجة الكبيرة من الانحدار التي وصل إليها التعليم في جامعتنا العزيزة.

ليس علينا إلا أن ننتظر أربع سنوات أخرى لنشاهد جامعتنا تخلو من كل أساتذتها الذين فضلّو امتيازات الجامعات الخاصة على جامعة دمشق.
وبالتأكيد سيفضلون تعليم طلاب الجامعات الخاصة على تعليمنا للأسف

شو قصدك
يعني الأوائل يلي بالجامعات الخاصة صار فين ينتقلوا لجامعه دمشق
ولا إعتراضك هو على إنوا طلاب الجامعات الخاصة عم بيعملوا ستاجات بنفس المشافي يلي فيها طلاب دمشق

أولا وأخيرا المشكلة مو بطلاب الجامعات الخاصة ولكن بالدكاترة

معك حق دكتور هيرو
انا أخي كان بجامعة دمشق طب بشري
ونقل لعنا عالقلمون لأسباب كثيرة إنتوا أدرى فيها

بس عنجد الله يعينكن

كيف يعني ؟

يعني طلاب الجامعات الخاصة بيصيروا بيحضروا ستاجات مع طلابنا

و الله انا بعرف انو اختيار الطلاب بالجامعات الخاصة السورية ما بيصير ع أساس علامة البكالوريا العالية ولا ع أساس امتحان قبول بس ع أساس اللي معو يدفع ف ما كتير مستوى الطلاب عالي و هدول شو ما جبتلن دكاترة و حسنتلن الوضع بضل مستوى فائدتن أقل

متأكدين من هالشي؟
وبأنو ستاجات؟
وبتوقع يكون رأي للاساتذة بهالحكي، يعني مو فجأة بيصير الأمر!

عفوا في مجال تقوليلنا شو هالاسباب يلي خلت اخوك ينقل لجامعة خاصة...

ايه عم يحضروا ستاجات معنا توليد وجراحة وغيره

والله معك حق

نحنا عنا بستاج الهضمية من كتر القاعة مو كبيرة متل ما بتعرفوا جابولنا شي عشر طلاب من الجامعة الأوربية

مشان يصير في تبادل خبرات

يا جماعة الان جاء دور الهيئة الادارية يلي انتخبناها قبل كم يوم ففرجونا شو ممكن تعملوووووووووووووووو.....

شو ممكن تعمل الهيئة الادراية ؟ اذا وزير التعليم العالي موافق واذا في مصاري عم تندفع ؟؟ وطلع التعليم بصير ممتاز لما تندفع المصاري الغريب انه طلاب الموازي عم يدفعوا وسي عم يدفع بالدولار وعم ياخدوا التعليم تبعنا الزفت ذاته ...متل ما قلتلكم معاملة خاصة لطلاب الجامعات الخاصة

وشو برأيك لازم الهيئة الإدارية تعمل لتحل هالموضوع؟؟؟

والله سبقتيني لاني كنت ناوني نزل نفس الموضوع
يعني كان ناقصنا طلاب زيادة
عل فكرة نحنا بالفئة ما عنا حدا دخيل بس جايينا الدور

بكل بساطة تقديم اعتراض لاتحاد طلبة سوريا

و الله أنا لما سمعت ما صدقت
يعني نحنا مو وسعانين ليجيبو ناس زيادة
هزلت

نحن كمان بيحضر معنا طلاب الرابعة تبع القلمون بالمشفى العسكري( علما انو بالنسبة لطلاب جامعة البعث المشفى العسكري مقتصر على طلاب السادسة فقط)أما طلاب الرابعة والخامسة بيحضروا بالمشفى الوطني )لانو المشفى العسكري افضل من الوطني من الناحية التعليمية .

بالنسبة للعدد نحن عددنا قليل 4 طلاب بالفئة وهن عددهم شي 6-8 ,يعني كلنا على بعض بنصير 12طالب وشكلهم ما بيججوا كل يوم لذلك ما عاملين مشكلة .

بس الشي يلي بيزعل هو عناية الأطباء فيهم ووجود ممن يهتم بهم ويشرف عليهم بالوقت يلي نحن بنحس حالنا كائنات طفيلية على عالم الطب .

ولو يا جماعة
وين نسيتوا كرم الضيافة والأخلاق العربية !!!

واجب الطيف إكرامه واستضافته ثلاثة أيام

بس نحنا كرماء زيادة عن اللزوم .. رح نستضيفهم 3 سنين بدال 3 أيام

ولو !!!!

الطلاب الجايين من الجامعات الخاصة معنا الستاج أفهم منا بميت مرةـ، حطو الفئة كلها بجيبتهم الصغيرة.
هنن يعدو يحكو مع الدكتور و ما يحكو غير مصطلحات انكليزية و نحن كل واحد فاتح تمو شبر!

ليش نحنا عنا ستاجات؟

عنا واحد من اثنين:

1- دروس نظرية بقاعات بالمشفى لطلاب الرابعة والخامسة
2- تضييع وقت لطلاب السادسة إلا ما رحم ربي من الستاجات

أما شي اسمه طب عملي، ما عنا!

وبيرجعوا بيلومو الطلاب وإهمالهم! والله العظيم شي بيتقطع عليه القلب.. بكل مشافي العالم في برنامج محدد للستاجات، وبكون دوام المشفى باليوم أقل شي 6-7 ساعات، نحنا عنا، إذا كنت لسا ما مليت وفقدت الأمل، بتروح على المشفى لحالك، بتفوت لعمد المرضى لحالك، بتاخذ قصة مرضية لحالك، بتحاول تفحص لحالك، بتخبص لحالك وما بتتعلم، بتحاول تشوف إضبارة المريض منشان تشم لأنو ما حسنت تدوق، بيقولولك ضايعة (هيك صار معنا اليوم)، بتروح لعند السكرتيرة بتحط م وبترجع عالبيت بعد أقل من نص ساعة. أما إذا فقدت الأمل، فلح تجي من باب المشفى لعند سكرتيرة القسم وتحط م وترجع.

عفواً من كل واحد بيقول خلونا نحنا نشتغل ونعلم حالنا بحالنا وهيدي هي سنة الحياة، لأ مو هيدي هيي السنة الحياة، أو هيدي هية سنة الحياة بس عنا بكلية الطب بجامعة دمشق، أنا بحقلي طالب بحقي، وأنا مو مطلوب مني كطالب أتواسط عند أساتذة وجيبهم ونظم دورات سريرية وجولات واتشرشح واتبهدل قبل ما آخذ الموافقات أو أعمل الشغلة بالسر كأني عم اسرق، أنا مو مطلوب مني شي من هاد بنوب، الطلاب يلي بيعملوا هيك عم يعملو شي فوق طاقتهم لأنو جامعتهم قصرت بحقهم، وكل واحد بيقول هيك لازم تعمل وتكون قد حالك، ما معه حق، أنا قد حالي بمحلّي، مو لما صير محل مجلس الكلّية وخطط لأنفع حالي وانفع زملائي! النشاط الطلابي مطلوب بكل جامعة، لكن بأي جامعة، لما يتعدى النشاط الطلابي على مصلحة الأساتذة، فلازم يكون معلوم إنو طلاب هيدي الجامعة أحسن من أساتذتها!

نحنا طلاب الرابعة عم نداوم بحمص ومقسمين لفئات كل فئة فيها 4 طلاب أو أقل ماعدا بستاج الأطفال بنكون أكتر من هيك ، ومتل ما قال ama مو عاملين مشكله
لأنوا دوامنا يومين بالأسبوع
أما طلاب الخامسة عنا عم يداوموا بالشام بمشفى تشرين ، يعني الطلاب موزعين بين حمص والشام مشان ما نعمل زحمة
بعدين إذا بمشافي الدولة ما تعلمنا وين بدنا نتعلم
هو المفروض إنو أي جامعة خاصة تعمل مشفى راقي ومحترم وفخم متل مشافي الدول الشقيقة ، بس للأسف لحتى تكون جامعتنا عملت مستشفى بنكون نحنا تخرجنا ، ووالطلاب الجدد هن يلي رح يتهنوا

أشكر لك صدقك ، بس أي جامعة فيها طلاب شاطرين ومتميزين وطلاب مهملين ، مو متل ما قال رفيقك انوا علاماتنابالبكلوريا ما بتأهلنا ،معظم طلاب الجامعات الخاصة ،بالذات طلاب الطب ، علاماتن بالباكلوريا عالية بس شهاداتن مو سورية ، مشان هيك ما انقبلوا بالجامعات الحكومية ، وأنا أخي من يلي خالفن الحظ وطلعلوا طب بالموازي ، بس بعدين ترك لأنوا نحنا مو متعودين عالشنططة والفوضى الموجودة بهالبلد الغالية ،

أنا ما بسمحلك تقول هيك أحمد
أنا لما اشتغل كل شي لحالي اتعلم لحالي اقرا مراجع لحالي فوق هم محاضراتي وضيع ما بين العربي والانكليزي وكون مطالبة بمعدل يأهلني لاختصاص و لغة وعلم يأهلني كون طبيبة ولما انتظر حدا يقلي يا فلانة هيك بجسوا الكبد وما لاقي هالحدا واشتغل لحالي وبالنهاية اطلع قادرة ولو بنسبة 15 % فأنا سوبر ممتازة وما حدا من الجامعات الخاصة أحسن مني لأني أنا ركضت ورا العلم مو هو راكض وراي وعم يتقدملي على طبق من فضة
لو كل أستاذ عمل معنا ولو لمرة واحدة متل ما عم يعمل مع طلاب الجامعة الخاصة ما كنا هيك بعدين أنا بعرف مستوى طلاب كليتنا طلاب كليتنا قمة بالذكاء والطموح وللأسف أسلوب دكاترتنا قلة الثقة بالنفس هي اللي بتخليهم ما يظهروا قدراتهم وأهم شي الخوف اللي بيزرعوه بقلوبنا من سنة أولى ...
لهيك أنا ما بسمح لحدا يقول عن أي شخص انه أحسن مني أو منكم .

الأسبوع الماضي بمشفى الأطفال ما حصلنا الشرف بالتعرف على الدكتورة" المسؤولة" عنا ...ولما سألنا عن السبب كان الجواب انو حضرتها عندها دورة لغة انكليزية ومو فاضية لطلاب السادس ...والأحلى من هيك رئيس القسم يلي بيهمو يشوف خلقتنا على 8.30 على التمام وأي تأخير راحت الميم...ومانو سائل بالمرة اذا جناب الدكتورة لهلأماشرفت ....
فإذا الكلام صحيح انو هدول الدكاترة سيظهروا للعلن عند قدوم طلاب الخاصة ..فشو بدي ساوي ...يالله رح ضل بالبيت وعمرو مايكون ستاج ...ولك يض.......خلينا ساكتين أحسن..............

مستحيل .

أصلا بالبداية ما كان لازم يترخص لأي كلية طب قبل ما يكون في مشفى تعليمي خاص فيها

يعني كأنكم مابترفو بالاختراع يلي اسمه.........

مصاري