رأيك بصراحة بأول نزوة شعرية لقلمي

يسلم تمك أبو سعيد القصيدة ممتارة كمحاولة شعرية اولى

يا سيدي الله يجبر بخاطرك متل ما جبرت بخاطري
وانتظر الثانية قريبا

روقنا أبو حميد ..خلينا انمخمخ عليا اشوي

لاحظت بعد قراءة القصيدة انها بتعبر عن تجربة عاطفية مرة وطويلة ... وبما انو الكاتب عمره لا يتجاوز العشرين فما بتوقع انو يكون لحق يمر بهيك تجربة استمرت لسنوات حسب ما بتقول القصيدة..... فاستنتجت بحركة صغيرة لا تحتاج الى الكثير من الذكاء انو هالقصيدة ما انكتبت للتعبير عن حالة صاحبها وانما هي وصف لعلاقة خيالية ذات نهاية غير سعيدة اتسمت بالغدر والخيانة فكان في بعض القسوة المصطنعة من قبل الشاعر واللي ما كانت صادرة من القلب فعلا.......
فالقصيدة فعلا ظريفة.... بس نصيحة صغنونة: اجعل شعرك مرآة لروحك ليس لخيالك

بس عن جد القصيدة ظريفة وانشالله بيستمر أداءك نحو الأفضل
لا تتأخر علينا بشي جديد
تحياتي.

برأيك تجربة عاطفية
الحمد لله اني ما تأخرت بنشرها وقتها مافي حدا رح يصدقني حتى لو أكلتلو ورق المصحف
والحد لله انك بتفكر بطريقة منطقية
وشكرا لرأيك

عفكرة صحيح أنا رح ضل حاول اقنع قلمي بالكتابة لكن كل هدا الشي رح يضل ضمن حدود الدين والأدب والأخلاق

يا سلام ... شو هالإبداع يا أب سعيد ...

بس مين قاصد بالقصيدة ؟ يعني هل هناك كناية عن شيء بالقصيدة ؟

يسلم قلمك

وبانتظار المزيد من الإبداع

___________

إلى من مر على توقيعي
الفاتحة على روح معلمي ومؤدبي وقدوتي والغالي على قلبي : جدي
ادعوا له بالرحمة والمغفرة والثبات عند السؤال

في كم تركيب ما فهمت معناهم ....أرجو الشرح.........

<<وبيديك اغتَلتِ براءة بسمتي>>
<<يا من أصمتِ بحسنك الشيب والولدان>> ما فهمت هدا مدح أم ذم؟؟؟
<<وأشيد غَدِيَ بأقصى القلوب>>
<<عدت لتسرقي نبوءة أحلامي>>

في مقطع عجبني كتير:

عُدتِ لتسألي قلبي..
أمن مكان؟؟
آسف يا سيدتي ....
قلبي مسافرٌ الآن
مسافرٌ أرضاً
لن يعرفها مثلك إنسان

بالنسبةل<<صنعني خسارةُ قلبي>> مو المفروض تكون <صنعتني>
<<لو كُنتِ صادقةً ما ذهبتِ>> لو كاتب <رحلت> بدل<ذهبت> كانت أحسن..

هدا اللي عندي... بقراها كمان كم دور وبشوف اذا بيطلع معي شغلات تانية

موفق أبو سعيد.....يعطيك العافية

خود نصيحة من مجرب ......
أحلى شعر نابع من القلب ممكن تكتبو هو اللي بعبر عن الوضع المأساوي للانسان العربي صدقني جرب وشوف
فهمك كفاية ما رح قلك متل شو مشان ما يحذفولك المناقشة
اذا حابب تعرف بقلك بس اذا حكيم حذفلك مناقشتك مالي علاقة

Dr.Bazweer كتب:

أنا رح ضل حاول اقنع قلمي بالكتابة لكن كل هدا الشي رح يضل ضمن حدود الدين والأدب والأخلاق

الأدب والدين والأخلاق .......والسياسة.
عم امزح معك اوعاك تبقى ضمن حدود السياسة يا اما بتصير شاعر كذاب متل معظم الشعراء العرب اللي بيخافوا يطلعوا متر واحد برات الطريق.

طريقك بالشعر ارسمه لحالك ولا تخلي حدا يرسملك ياه....

الله يا دكتور محمد
بالفعل رائعة من زمان ما قرأنا شي تحفة متل هي

أول شي رح رد على أبو فاروق يا سيدي معك حق المعنى البعيد يلي بقصدو فيها هو المجتمع أو المحيط البشري يلي بيبقى حول الشخص طالما الو معو مصلحة وبمجرد ما ياخد مصلحتو أو يمر هدا الإنسان بمرحلة ضعف ما فورا بيتركو ويبدا بعملية بحث عن غيره
وطبعا ما بقدر عمم هالحكي على كل الناس لأنو في ناس أغلى من الألماس واخترت السخصية الأنثوية لأكتر من سبب منهم بكنير من الروايات يمثل الغدر بفتاة ولأنو الأنثى بتفكر بعواطفها أكتر من عقلها وبتحب المظاهر أكتر من الرجل

أما بالنسبة لموني قصدت ببراءة البسمة حسن النية وعدم المعرفة بالمكر والخداع وجهل الإبتسامة الماكرة (متل يلي بيضحك بوجهك وبيحكي عليك بأفاك)
أما بالنسبة للإعتراف بجمالها بقصد فيه الجمال الكاذب والخادع والذي يبحث عنه الشباب في أيامنا وينسون جمال الروح
وبالنسبة لقساوة القلوب لأنها بغدرها دمرت قلبه الذي لم يكن حصين بل كان عبد لها (يعني تعلم من غلتطو )وأصبح قاسي (لايحب من أول نظرة)
أما نبوءة الأحلام فيعني بداية تحقق أحلامه فعندما تركته سخرت من أحلامه وهذا مقصدي بسرقة الأحلام
أما بالنسبة لصنعني مو صنعتني لأنو دائما الأعمال التي يصنعها الرجال تعظم بشكل أكبر والتاريخ أكبر دليل وبتكون أقوى غالبا طبعا
ومشان ذهبت لأنو الذهاب بكون بإرادة الشخص نفسه لكن الرحيل ممكن أن يخيَّر به أو يجبر عليه

وأنا في سرِّي أبكي
قد أقسمت الانتقام
انتقام الكرام

فأنا الآن إعصار
صنعني خسارةُ قلبي
بما أوقدتِ فيه من نار..

بارك الله بك "أبا سعيد"
وجعل قلمك داعياً للخير والفضيلة

فذا بذوير قد رفض الجراحَ وأشهر في العِدا ذاك السلاحَ
سلاح الصبر قـد بات ينادي خسرت القلب لـكن لا جراحا
فيا أيام غدرٍ لـن تعودي ويبقى صبرنا يشفي الجـراحا

أعتقد أن من المواضيع التي قد تشير إليها القصيدة
رفض قانون الغدر الاستيطاني وسلبه للأرض

فقد غدروا بنا وعندما تضيق بهم السبل يعودون إلينا

لكننا سنرفض تسليم الأرض وسيبقى الوطن صامداً شامخاً كالأسد في عرينه

وإنه لجهاد نصر أو استشهاد

سؤال النصوص:
انثر المقطع الأول
ما إعراب إعصار

The Sun Which Never Sets
i-Sun

الله الله الله الله ..............................

تسلم يا احلى ابو سعيد بالكلية ..

عن جد انطربت .... واعذرني لاني ما قدرت عبر غير بهالكلمتين ......

وموفق انشالله ..... بس لاتقطعنا .. يعني مو للسنة الرابعة

حتى تنزل قصيدتك التانية.

شكلك معاني عمي أبو حميد لحتى شبعاااااااااااااان معاناة

أنصحك بإعادة التجربة ((لا أقصد الشعرية كوني لا أفهم في الشعر كثيراً ))

ولكن العاطفية حتى تكتبلنا قصيدة أخرى أحلى وأحلى

جزيت خيراً

بالنسبة لشرح المقطع الأول فالبكاء بالسر لايعبر عن الضعف يعني هل من المعقول أنه لايوجد أي شخص لم يذرف دمعة واحدة وانا قصدت البكاء في السر يعبر عن الندم والإعتبار وحفظ الدرس والانتقام فمتل ما قلت انتقام الكرام وردت طريقة الانتقام بعد كم سطر
أما الاعراب فبشوفك بالعملي وبناقشك فيه
أما بالنسبة دكتور حمدو فصدقني يا أخي مافي لاتجربة عاطفية ولا هم يحزنون
(قال تجربة عاطفية يابي)

عنجد شكراً دكتور

بالنسبة لأسئلة النصوص فمزح

أم المقطعين فمن أكثر ما أعجبني في هذه "النزوة الشعرية الأولى" كما ذكرت

وبالتوفيق يا "شاعر الأطباء"

بس ليش ما عم يصدقوا أنو مو تجربة عاطفية

شكرا لرأيك وانشاء الله بكون عند حسن ظنكم الشعري
تحباتي الحارة والباردة لكل أصدقائي

جاي على كلية الطب بالشام تحب و تتمعشق ولاك ، والله لطالع جوز عيونك

والله حلوة ، أنصحك ألا تترك قلمك حتى لا يجف حبره

على راسي بنو عذرة كلهن

خاب ظني يا أبو أكرم كنت بعتقد انك آخر واحد ممكن يفكر ويظن هاد التفكير
لأنك أكتر واحد بيعرفني
بس مافهمت (على راسي بنو عذرة كلهن) شو عم تخبص

لك شبنا أبو سعيد ، عم نمثل دور الأقارب

يطعمني حجة والناس راجعة .......
يعني العالم اللي ردوا كفو ووفو ..... بس عنجد القصيدة كتيير حلوة ومابينحزر عليها إنو أول محاولة .... وأكيد لازم تكرر المحاولة ....إنشاء الله موفق

الله يسامحك ..
بكفي انك قرأتيها وشكرا لرأيك وانتظري القصيدة القادمة ....
تحياتي ....

من أروع الصداقات , تلك التي يمكن أن تبنيها مع قلمك
لأنها تسعدك ..
و تـمتع غيرك

اجعله أقرب إلى قلبك ليعطيك أكثر و دون مقابل ..
بانتظار المزيد
بالتوفيق ..

خليك بطبك احسن

أول شي ... بتمنى منك بالمرات القادمة تكتب ببداية الموضوع انو " كل ما سيذكر لاحقا هو مادة شعرية فيرجى الانتباه لهذه النقطة " لأن حسيت انو عم بقرا صف كلام
تاني شي ... بالنسبة للحكي اللي انذكر بالموضوع يعني أنا ما بعرف شو هالحب العاصف اللي بخلي المحبوبة تسخر من حبيبها و تشمت فيه و تصير تنظرلو نظرة دونية ... فهاد مو حب
هلأ بالنسبة لأنو حضرتك عملت شي مشان تسبت خطأ وجهة نظرها فهاد بعبر عن عقدة نقص كبيرة انوجدت و كانت ولا تزال عندك لأن متل ما منعرف عقد النقص ما ممكن تكمل ...
فأياً كان الشي اللي عملتو ما رح يكون شي كامل أو مالك عاملو عن قناعة فأكيد ما رح يكون بالنتيجة المطلوبة...

بهنيك (موني) على ذكاءك واستنتاجك ... بهنيك و بهني بلدك فيك .. بظن انو نحن عم نحكي عن واحد عمره عشرين سنة عالأقل مو عن ولد عمره عشر سنين ..
من وين طلعت بهالاستنتاج بقا ؟!؟ و بلكي هو كان مفكر انو هي بتحبو بس هي مالا هون منوب بقا ممكن يطلع معو هالحكي ولو انو ممكن تصير هيك شغلات و بسن أصغر من هيك كمان و أنا حسيت انو هي صايرة مع كاتب الموضوع .. ليش لأ ...

بظن لازم تتم تحاول مع قلمك لحتى تقنعو ... و ان شاء الله يقتنع معك بالأخير ..

أوافقك الرأي

يعني بدك تقنع حالك بشي مو مزبوط !!!؟

بتم هاد رأي أنا و لنا عودة ........

أول شي أنا حابب اعتذر منك على تأخري لكن انا بعد ما نزلت القصيدة (و انا مصر سميها قصيدة ) نزل كم تعليق وما عدت وفتحت الموضوع من جديد لكن اليوم احد اصدقائي سألني اني كيف ما رديت عليك لحد الان بعد كل هالحكي فأنا الآن بعتذر لأني خليتك تعيش كل هالفترة بنشوة التفوق أما الان فاسمع ....
أول شي انت حكمت انها مجرد كلام ياسيدي انا مستعد اني اقبل هاد الحكي بس يكون حكي جبران أو نزار أو درويش أما يعني طالب طب سنة تانية متلي متلك و مابعتقد اني سمعتك عم تلقي قصائدك بمجمع اللغة العربية حتى تحكم باهد الحكم ولنفرض انو حكمك صحيح انا بعد ما كملت قراءة تعليقك تبين لي انك ما عرفت تقراء ورح خبرك الأسباب
انت بتقول انها مو حبيبة وهاد الحكي صحيح لأنو هي كا كانت بتحبو بالأساس و انا ما وصفتها بالحبيبة بل وصفتها ب (سيدتي ) وحتى لما خاطبها فقلها (يامن) وليس يا حبيبتي لأنو هاد الحب الي كان كان بأساس من طرفه فقط
وبظن انو المجتع مليء بهيك ناس في كتير ناس قلبها طيب بتنخدع بسرعة بالكلام المعسول
وبتوقع انو هيك استنتاج ما في داعي اني وضحو لأنو بديهي لكن بعتذر اني ما وضحت بعد ما نزلت القصيدة كنت مفكر نحنا طلاب جامعيين مو ابتدائي لازم ارفق شرح مفردات

أما حول شكك في ادعائها حبه من قبل ممكن تقلي ليش أنا قلت
بالله عليك
كيف غدرتني ؟
أم ميثاقك الغدر
ووفاؤُكِ النسيان
هاد الشي بيدل على انها وعدتو بوعود وعلقتو بأحلام وآمال وبعدين تهربت
بس برأيك مع هاد الشي (مالا هون منوب )
وهاد بيدل على انو قرائتك مريضة
يعني لاقمك ياها بالمعلقة

أما قولك حول اني عملت شي برر عقدة النقص كما تزعم فيا ريت ترجع تقرا
قد أقسمت الانتقام
انتقام الكرام
أن أبقى يقظاً
فطناً
يعني انتقامو بكون انو يصبح حذر ولا يوقع بالجورة مرتين
أما اصراره على تحقيق احلامه فهدا الشي ما بعني حتى يخليها ترجعلو وأكبر دليل انو لما رجعت رفضهاأم لو كان قبلها وقتها رح وافقك بها الشي
واذا انت بتظن انو كل انسان بيحاول يثبت وجوده ويحقق حلمه بعد مرحلة مر فيها كانت فاشلة خليت الناس الي كان بيظن انها كانت معو تنفر من حولو وبعدين بثابر وبيوصل وقتها عندو علة نقص فسمحلي هنيك على هاد التفكير لأنو وقتها لازم نقول عن كل عالم وكل مخترع ويمكن عن العالم عندو علة نقص و انت ما بتعرفني شخصيا حتى يحق لك ان تفكر في الحكم على شخصيتي من أول نزوة شعرية عابرة على فرض الشعر بعبر عن الشخصية

أما بالنسبة لرايك حول انها تجربة عاطفية فهدا رايك احتفظ فيه انت حر
وبالنهاية انا بعرف حالي اكتر منك مع فائق احترامي الك
وتحياتي...

بعتقد طلبت رأيك بالشعر وليس اعطاء نصائح لمسيرة حياتي
مع فائق احترامي....

اف اف شو صاير هون يا جماعة
طولو بالكون والله مو قصة يعني مانا محرزة كلا شئفة قصيدةلحتى تتئاتلو عليها وإنتو زملاء ما لازم تعاملو بعضكون هيك خلص يلا تصالحو وبوسو شوارب بعض