د. سامر آغا ... تحت المجهر

مرحبا دكتور كيفك ؟
دكتور ما شاء الله عندك طريقة بالتفكير الطبي رائعة ممكن اسألك كيف تعلمتها هل كان التعلم ذاتي أو في شخص كان اله دور في مساعدتك ؟
هل تفكر دكتور بالدكتوراه والتدريس بالكلية وبأي مجال من مجالات الداخلية العامة ؟
ماهو التخصص الفرعي الذي تحبه أكثر من غيره ؟
لو عادت بك الايام هل تتمنى لو غيرت شيئا ما في حياتك ؟
قرات قصتك جمالين وبصراحة تأثرت كثيرا ...متى بدأت موهبتك الأدبية تظهر ؟ وكيف نميتها رأيت عندك جانبا فلسفيا عرضته عبر روايتك فهل هناك كتب فلسفية معينة أو فلاسفة معينون أثروا بك ومن هم ؟
صف شخصيتك بثلاث كلمات ؟
لدي الكثير من الاسئلة ...ربما يطرحها غيري وربما أعود لاحقا ان لم أضايقك .
تحياتي لك .

عينة ممتازة و الله
دكتور كيف كنت تقضي وقتك في مرحلة دراستك الجامعيةالسريرية (4،5،6) ، أين كنت تقضي معظم وقتك ، بين أحضان الكتاب ؟؟ أم في المشافي؟؟
شكرا سلفا..

طالب طب

صفه بجملتين ... إحداها بالصفة السيئة التي تراها عند البعض...و الأخرى بالحسنة

السلام عليكم
أنا لا أعرفك سوى معرفة جد سطحية، لكني أود أن أعرفك تحت المجهر.

يا ريت تعرفنا شوي عن شخصيتك ..مراحل الدراسة ..الوصول للطب وسبب دخول هالكلية والسير فيها ..التخرج ..الاختصاص ..السفر (إن تم) .. العمل في البلد ..الخ ..

بانتظار مزيد من التعرف (خاصة أنو اسمي على اسمك )

بالفعل اختيار موفق.. سمعت عنك الكثير، وأرجو أن أتعرف عليك في يوم من الأيام..
وأظن أنك شاركت في أحد أمسيات الإبداع الطبي العام الفائت، أليس كذلك؟
حالياً لا يوجد لدي أسئلة، قد أعود لاحقاً..
أتمنى لك التوفيق..

دكتور، أنت من الأشخاص القلائل الذين -برأيي- يدرسون الطب عن شغف.
سؤالي: كيف تقضي أوقات فراغك؟؟
هل تحبّ مشاهدة برنامج تلفزيوني معيّن؟؟
إن طلبنا منك -كطلاب طب- 3 نصائح، فماذا ستكون؟؟
إن لم تختر الطب، فماذا غيره؟

السلام عليكم دكتور

مشكور جداً على الجهد يلي عم تبذله مع الطلاب بالتعليم والتوجيه، مع إنه مو واجب عليك.

أسئلتي إلك:

1. من أكثر أستاذ في الكلية تأثرت بطريقة إعطائه؟
2. من أكثر الأطباء قرباً على قلبك وتعتبره كأخ ممن كانوا معك في الدراسات العليا؟
3. هل لطبيعة دراستك في الدراسات العليا علاقة بتأخير زواجك؟

مساء الخير عليكم جميعاً..
مبارح حاكتني فرح وطلبت مني كون التالي بزاوية تحت المجهر.. بتمنى ما كون ضيف تقيل دم..
بالنسبة لأسئلة الدكتورة هنادي..
دكتور ما شاء الله عندك طريقة بالتفكير الطبي رائعة ممكن اسألك كيف تعلمتها هل كان التعلم ذاتي أو في شخص كان اله دور في مساعدتك ؟
الحقيقة لما كنت بالصف التاسع قريت مقولة لأنشتاين بيقول فيها:
يمكن لأي أحمق أن يجعل الأمور أكثر تعقيداً لكنك بحاجة إلى عبقري ليجعل الأمور أكثر بساطة...
تأثرت كتير كتير بهالعبارة وما ببالغ إذا قلت أني ضليت فكر فيها شي أسبوعين يومياً..
كان بهداك الوقت عنا أستاذ رياضيات أسمو بهاء الدين حموش كان عندو أسلوب مقنع جداً بتدريس الرياضيات مشان هيك تأثرت فيه كتير وقررت أنو غير طموحي من أني صير طبيب ( الحلم اللي لازمني من وقت كنت بالابتدائي وبسببه كانت كل ألعابي عبارة عن شنتاية طبيب بلاستيك) وقررت صير أستاذ رياضيات.. بس مع الأيام رجعت اقتنعت أني لازم كون طبيب وتحديداً أستاذ بالطب ولازم يجي اليوم اللي رح حاول فيه حقق حكمة أينشتاين وأقدر أعمل الأمور أكثر بساطة...
هل تفكر دكتور بالدكتوراه والتدريس بالكلية وبأي مجال من مجالات الداخلية العامة ؟الحقيقة أنا ما بتخيل حالي بعيادة أو بمشفى خاص.. ما بتخيل حالي غير على مدرجات كلية الطب تحديداً عم درِّس.. وأنا مهتم بالقلبية..
بس للأسف الشديد عرفت مبارح أنو السنة ما في مفاضلة معيدين وأنو السنة الجاية بكون تجاوزت العمر المطلوب.. يعني يبدو أنو فرصتي تلاشت تقريباً بأني كون أستاذ بالكلية...وما في عنا شي أسمو أنو مسؤول بالكلية يعذب حالو ويسأل عن وجود شخص ممكن يكون عندو موهبة التدريس مشان يساعدو بالوصول للمكان اللي بيقدر فيه يساعد ويفيد الطلاب.. الله يبعت اللي فيه الخير..
لو عادت بك الايام هل تتمنى لو غيرت شيئا ما في حياتك ؟
أنا إنسان يبحث عن التاريخ وليس عن المستقبل.. فإن عاد بي الوقت فسأحذف من حياتي كل لحظة لم تذكر الآن في تاريخي...
جمالين هي تجربتي الأولى في الرواية ولقد نضجت هذه التجربة في الرواية الثانية ( حب من آخر نظرة) والتي تحمل أبعاداً فلسفية أعمق بكثير من جمالين..
أحاول ألا أقرأ الكثير في الفلسفة لأن الفلسفة تحديداً يجب أن تكون عذراء ويجب أن تكون فلسفتي الخاصة دون أن يشوبها أي رأي آخر لسواي مهما عظم هذا الرأي..
شخصيتي بثلاثة كلمات: إنسانٌ يفيد ويستفيد...

إلى الدكتور green wave أقول:
كنت أقضي وقت الستاجات بالمشافي بس ما كنت ألتزم أبداً مع الأساتذة ولا كنت ألتزم بالستاج.. وأصلاً ما كان الحضور أجباري ولا كان في ورقة توقيع..
كنت مر على كل الأقسام وأسأل طلاب الدراسات عن مرضى عندهون موجودات وكنت آخدلون القصة وأفحصون...
من يوم اللي دخلت الكلية كنت حابب القلبية وكنت حاول ركز كل اهتمامي عليها...
بنصحكون تحاولو تركزو على اختصاص معين أبكر ما يمكن ولا تشتتو حالكون بكل الاختصاصات .. لأنك كطبيب بكرا ما رح تنسأل غير باختصاصك..

إلى الدكتورة ربا

الصفة السيئة في طالب الطب التي أراها عند الأكثرية هي أنه لا يعتبر نفسه طالباً ويحمل نفسه مسؤولية أكبر من التي عليه أن يحملها..
يا طالب الطب أنت طالب.. يعني بيحقلك تجرب وتفشل وتجرب وتفشل وتجرب وتفشل...
أما الصفة الحسنة اللي بشوفها فيكون كلكون...
أنكون حابين تتعلمو...
يعني عاملين متل فرخ العصفور اللي مو مصدق إيمتى يتعلم الطيران ويرمي حالو بالهوا بس خايف يفتح جناحيه حتى ما يبينو أقصر من جوانح رفقاتو العصافير.. ومو عرفان أنو الأجنحة إذا ما انفتحت ورفرفت ما بتكبر...

بالتوفيق سامر ...
كانت زكريات طيبة معكم ..وكنت متميز بالهدوء
انا أحييك من القلب ...وبتمنالك التوفيق ...

ومن تحت عدسة المجهر ...أقول لك go on ..

د.عباس ديب

بالنسبة للدكتور أبي والدكتور سامر..
أنا دخلت كلية الطب عام 1995 وتخرجت من كلية الطب عام 2001 وكنت من العشرة الأوائل على دفعتي.. وما بتصدقو إذا قلتلكون أنو من لما كنت سنة أولى طب بشري كنت أشرح لرفقاتي على اجثة وكان يتحلق حواليي أكثر من خمسين طالب ليسمعو الشرح على الجثة..
الحقيقة أنا كان عندي قدوتين بحياتي حاولت أجمعون مع بعض بكلية الطب
أستاذ الرياضيات تبع التاسع بهاء الدين حموش.. ودكتور الأطفال اللي كنت أتعالج عندو من أمراض الطفولة الاعتيادية الدكتور عدنان نصر صالح...
بعد ما تخرجت من الكلية قدمت امتحانات الأمريكي وجبت العلامات الكاملة 99-99 وسافرت على أمريكا وحصلت على اختصاص بمشفى cook county بشيكاغو وبعدين عملت فيه اختصاص داخلية لمدة سنة بس وبسبب ظروف إلها علاقة بالفيزا ما قدرت كمل الاختصاص هنيك.. دخلت اختصاص داخلية عامة بالدراسات العليا وكنت مقرر أعمل بعدو فرعي قلبية بس للأسف لغو الفرعي على وقتنا.. أنا أتقن اللغة الإنكليزية وأتحدث بها بطلاقة وأتقن الفرنسية وأتحدث بها بطلاقة أقل نسبياً من الإنكليزي وهلأ في طريقي لتعلم الألماني...

بالنسبة للدكتورة pearl-3 فأنا أقضي أوقات فراغي بالكتابة والتفكير والتأمل..
لا أحب مشاهدة التلفاز إلا الكوميديا فقط..
أنتقي الأفلام الفلسفية والحائزة على أوسكارات لمتابعتها في أوقات فراغي...
إن لم أختر الطب كنت سأختر أن أكون أستاذ رياضيات...
نصائحي إليكم هي التالية:

ابحث عن التاريخ يأتيك المستقبل..
حاول أن تكون مبدعاً ولو برسم نقطة..
لكل منا دور في هذه الحياة.. وكل دور مهما عظم أو صغر لا يتجاوز فيه إسهامنا في الحياة بأكثر من رشة ملح نرشها فوق البحر... لكن علينا أن نرش رشة الملح خاصتنا ونحن مؤمنون تماماً بأن هذه الرشة هي التي جعلت البحر مالحاً..
بالتوفيق

للدكتور kmg أقول:
أنا بستمتع بحضور محاضرات الدكتور مازن مصري زادة والدكتور محمد شحادة آغا والدكتور محمود شعبان..
أما أكتر أستاذ تأثرت بطريقة إعطاؤه فكان الدكتور عبد الرزاق شيخ عيسى..
أكثر الأطباء قرباً مني فكان بدون شك الدكتور سعود البدر صديقي وأخي ولا أنسى أبو صلوح الحبيب الدكتور صالح القيسي اللي صار هلأ بفرنسا يا ربي يسرلو أمورو ويوفقو
أما بالنسبة لدراستي فالجواب هو لاء.. دراستي مالها علاقة بتأخير الزواج..
أنا بتمنى أني كون مبدع بأي خطوة بقوم فيها وحاسس أني ما رح كون زوج مبدع بهالوقت.. وناطر حتى تنضج قدرتي على الإبداع بهادا الموضوع...

شكرا يا دكتور عباس..
كنت فعلاً مثال لرئيس المقيمين المتفهم واللي ما جمعني فيك غير الأوقات الطيبة..
انشالله بتتوفق بالمعيدية وبتكون متل ما بتتمنى

تحياتي لك سيدي الكريم

أود أن ألتقي بك يوما في محاضرة من محاضراتك ..
و أتمنى لك كل التوفيق ..

لاااااااااا تقولوها !!
دكتور سامر

عنجد اختيار أكتر من رائع .. والله يا فرح عرفتني تنقي

دكتور سامر من النادرين اللي بالفعل انبسطت لما تعرفت عليهم وكان الي الشرف باني أتعامل معهم وان شاء الله يكون الي بأعمال قادمة حلوة كتير ..

دكتور سامر .. ماهي العوامل التي تعتقد أنها قد توجّهك نحو الاختصاص اللي بتحبه, بمعنى: كيف فيك تعرف الاختصاص اللي بتحبه؟!

لي أسئلة أخرى لاحقاً عزيزي .

___________

يا ربي كن معهم انصرهم ولا تخذلهم ,, ياربي إنا مظلمون فانتصر

إلى dr.caesar and dr.normy أقول بأنه تشرفني معرفتكما وأتمنى أن نلتقي قريباً في أفضل الظروف
وإلى د.روان أشكركي من كل قلبي على إضافاتك الجميلة والتي تختلف في صيغها ومعانيها كما تختلف المعاجم في إعطاء معنى اسمك فهو تارة اسم من أسماء الجنة وتارة اسم من أسماء الروح وتارة المرأة التي تطيل النظر إلى ما تحب محدقة...
وكلها معانٍ جميلة.

شكراً يا دكتور محمد, انشالله رب العالمين بيحميك بسفرتك.
بالنسبة لسؤالك دكتور: الاختصاص يلي بتحبو لازم يحقق 3 شروط:
1- أنو ما تكون بتكرهو
2- أنو يتوافق مع ظروفك المادية والاجتماعية
3- أنو يكون بيشبهك.
يعني كل اختصاص في صفات بيتشابه فيها مع شخصية كل واحد منا
أما شو هية الشخصية اللي بتتوافق مع كل اختصاص فبحكيها بيني وبينك مشان ما يزعل منا حدا من شباب الاختصاصات ويعتبروه موضوع شخصي

وصلتني رسالة من الدكتور ABU AZEEZ على الخاص خيرني فيها الدكتور أبو عزيز بين الإجابة عن أسئلتو على الخاص أو على العام, وأنا فضلت يكون جوابي على العام
طريقة طرح الأسئلة كتير ذكية وبدي عبِّر عن إعجابي بصراحتو. وإليكم الأسئلة:
. ما هي الغلطة التي تعتقد أنك ارتكبتها حتى حرمت من الفيزا بعد عودتك الأولى إلى الشام؟؟ هل من سبب مباشر فنتجاوزه؟؟ أم الموضوع مجرد حظ عاثر؟؟

2. رحلتك إلى أمريكا لم تكن بالقصيرة .. لم لم تثبت وجودك هناك كما فعلت هنا .. ؟؟ و أنت تقول أنك من العام الأول أثبت وجودك في كلية الطب. هل يمكن أن يكون السبب هو عشق مجتمعنا للكلام .. و تفضيل الغرب للعمل الصامت؟؟

3. لي أصدقاء (أصدقاء طفولة) كثر في الدراسات .. من سنتك و السنة الأصغر .. كانوا يتحدثون عنك على أنك رسول الرحمة الذي جاءهم لينقذهم من جهل الأساتذة ولؤم طلاب الدراسات العلاكين ...
ثم و فجأة .. تركتهم .. و التفت إلى طلاب ما قبل التخرج !! و أصبح زملاؤك في الدرجة الثانية في سلم أولوياتك !!
أنا أعرف تماماً أنك مازلت تقدم الكثير لطلاب الدراسات .. و لكن ألم تلاحظ أنك تفرط في أحد الاتجاهين على حساب الآخر ... ما السبب في ذلك؟؟
هل هي الشهرة الأكبر التي يحققها لك الطلاب الصغار..؟؟
أم أنها كلمات الشكر الخفيفة على لسان الطلاب الصغار .. الثقيلة أحياناً على لسان المقيمين ..؟؟

و بناءً على هذا السؤال .. أسألك .. هل تنتظر جزاءً .. و لو كلمة ؟؟
و سؤال آخر مرتبط: هل تقدم ما تقدم لوجه الله؟؟
ماذا يعني الله (جل جلاله) في قاموس أفهم طالب دراسات في كلية الطب؟

4. تخرجت بتفوق .. أتيحت لك كل الاختصاصات .. تركتها .. ذهبت إلى الولايات بعد رحلة تحضير طويلة و عذاب غربة عام .. ألغيت الفيزا .. فعدت بخفي حنين ..
سجلت باطنة دراسات على أمل أن تتابع قلبية بحكم معدلك العالي .. صدر قرار بدخول لطلاب فرعي مباشرة .. فكانت النتيجة أن تحرم دفعتان من تحت الاختصاص.. كنت أنت واحداً منهم ..
عقدت العزم على مسابقة المعيدين .. فألغيت المفاضلة ..

ماذا فعل سامر آغا حتى يستحق كل هذا العذاب ؟؟
هل تؤمن بالعين (الحسد)؟؟ إذا كان الجواب نعم؛ ألا تشعر أحياناً أن الشهرة تأتي بنتائج سلبية أحياناً؟؟

اشتغلت معك مرة واحدة ..ما رح انساها لإنها كانت أحلى نشاط بحياتي ..بكفي إنك كنت عم تشتغل معنا من غير ما نحس إنك أعلى منا بدرجات ..
سؤالي:
لو اعتمدت على ما يأخذه كل طالب في الكلية وفي الستاج ..هل تظن أنك ستكون بارعاً في التحليل كما أنت الآن ؟؟
هل اعتمدت نظام الهندسة البشرية "سؤال ليش؟؟"منذ بداية دراستك أم بعد التخرج؟؟

إجابة على أسئلتك دكتور أقول:
الحقيقة أنا ما ارتكبت أي خطأ لما رجعت على الشام بعد ما عملت سنة الداخلية بأمريكا. وإذا كان رفضي أني -أنا الوحيد لأهلي واللي تعبو عليي كتير وربوني وكبروني- عيش بأمريكا أكتر من سبع سنين بعيد عنهون حتى أقدر أرجع بأمان بدون ما يكون في احتمال أعصى بسوريا هو غلطة.. فيمكن هي هية غلطتي اللي بفخر أني غلطتها.
لحد الآن ما بعرف شو السبب المظبوط بس يبدو أنو غلطة موظفين بالمشفى اللي كنت فيها وهو عبارة عن خطأ إداري بحت.
أما بالنسبة للحظ العاثر يلي أنا بتمتع فيه بجدارة فبحب وضحلك شغلة:
في فرق بين الحظ وبين التوفيق. فالحظ هو حصول الأمر يلي منشوفو نحنا منيح لألنا واللي مو شرط أبداً يكون منيح.. والتوفيق هو حصول الأمر يلي بيلاقيه الله أحسن لألنا وبالتالي هو أكيد الشي المنيح..
فالمحظوظ هو اللي بيحصل على كل الأشياء اللي بيتمناها وبيشوفها منيحة لألو مع أنو مو شرط تكون فعلاً منيحة على المنظور البعيد وبالتالي يمكن ما يكون موفق
أما الموفق فيمكن ما يصير أي شي من يلي بيظنو منيح لألو بس بالحقيقة بيكون الله عم يعملو الشي يلي بيشوفوالله منيح وهو الأكيد منيح
أنا بعتبر حالي مو محظوظ أبداً وحظي عاثر جداً وبتمنى أني كون موفق لأنو الخيرة فيما اختاره الله

رغم أني ما فهمت قصدك بعبارة( عشق مجتمعنا للكلام وتفضيل الغرب للعمل الصامت) رح قول بأني خلال وجودي بأمريكا كنت المقيم الوحيد يلي بيعلم طلاب الطب الأمريكان وكان الطلاب من غير استاجات بيجو مع رفقاتون ليحضرولي..
بس المشكلة كانت باللغة وما كنت أقدر عبر عن كلشي بدي قولو مشان هيك ما كان أدائي متل أدائي بإعطائكم.. أضف إلى أنو الدوام كان من الخمسة صباحاً للخمسة مساءً ما كنا نلاقي فيه وقت لناكل فما بالك بتعليم الطلاب..

يا عزيزي بالنسبة لمحاضرات طلاب الدراسات فكانت المشكلة فيها تقنية مو بسببي يعني المحاضرات يلي كنت أعطيها الصبح الساعة 8 صباحاً كان الطلاب يكونو فيها نايمين وأنا بعذرهم وكل مرة يكون في 10 طلاب غايبين وترح عليهم تسلسل أفكار المحاضرة لأنون بيكونو مناوبين ومحاضرات الساعة 12 كانت تجي بعز وقت شغلون.. فنظام الشغل عنا هو يلي خلاني لائي الفائدة اللي عم يجنوها ليست كما يجب ويلي خلاني قصر من ناحيتون
أما بالنسبة لموضوع الشهرة فبحب قول:
إن كانت الشهرة هي معرفة الناس.. فعلكة سهام معروفة أكتر مني بمليون مرة
وإن كانت الشهرة هي إفادة الناس فأفيد شيء للناس هو حبة البركة على الرغم من ضآلة حجمحا وسواد لونها...
وأنا ما بتمنى كون علكة بتم حدا يبصقها لما بتخلص حلاوتها.. أنا بتمنى كون حبة بركة تلاقي طريقها لتفيد كل خلية من خلاياكم.
وأنا بفضل كون عود قصب عم بيسند نبتة غضة طرية على أني كون ناي معلق على جدار بيت أهله أصماء( مقتبس عن جبران)
وبحب من كل قلبي نظرة الشكر يلي بشوفها بعيونكم وهي اللي بتهمني واللي بشوفها قبل ما أسمع الكلام. اللي بيهمني من كلمة الشكر أنها بتخليني أعرف أني على الطريق الصح..
ولو كان الجزاء والثواب والمكافأة ولو بكلمة ما بيهم.. كان رب العالمين خلق بس النار وما خلق الجنة..
أما إن كان اللي عم بعملو لوجه الله أو هو مراءاة للناس أو سعي وراء كسب ما فهذا أمر بيني وبين ربي
أما ماذا يعني الله (عز وجل) في قاموس أفهم طالب دراسات في كلية الطب؟
فالله (عز وجل) هو رب القاموس ورب الفهم ورب الطلاب ورب الدراسات ورب حروف الجر ورب كل الكليات ورب كل العلوم.. وهو ربك.. وهو ربي الذي لولا إيماننا المطلق بوجوده ووحدانيته لصرنا جميعاً زبائن دائمين عند الدكتور يوسف لطيفة في عيادته...

بالنسبة لآخر سؤال: فسبق وشرحتلك الفرق بين الحظ والتوفيق...
أنا إنسان غير محظوظ بس هادا ما بيهمني طالما حاسس أنو هادا اللي عم يصير معي لا هو عذاب ولا هو بسبب الشهرة( مع التحفظ) ولا هو حسد, يلي عم بيصير معي هو توفيق رباني لإنسان ناطر ليشوف شو رح يصير بالحلقة الأخيرة وهو متأكد أنو النهاية رح تكون سعيدة... لاني واثق أنو رب العالمين بيحبني..

طبعاً أنا أؤمن بالعين والحسد لورودها في القرآن.. بس أنا مؤمن أكتر أنو هدول وسائل قليلة من وسائل كتيرة بيستخدمها رب العالمين مشان يختبرنا على شي أو يعاقبنا على شي
وإن كان رب العالمين بهالمصايب المتوالية عم يختبرني فانشالله رح أنجح بالاختبار وإن كان عم بيعاقبني فعقاب الدنية رح يعفيني من عقاب الآخرة وشو بدي أحسن من هيك.

بدي أشكرك مرة تانية دكتور أبو عزيز وعذراً على الإطالة

شكراً يا دكتورة براءة على الإطراء وشرفني كتير وأسعدني شغلي معكون.. وانشالله بيكون في نشاطات أكتر بالمستقبل..
بالنسبة لسؤالك : الجواب هو لاء.. المشكلة بمحاضراتنا هية أنو بتعطينا معلومات كتير بس ما بتعلمنا كيف وصلو لهالمعلومات..
أنا كنت كل ما قريت شغلة بالمحاضرات حاول فكر شلون خطرت ببال هادا الباحث الأجنبي هالفكرة.. يعني كان يعنيني شلون وصلو للفكرة أكتر من الفكرة نفسها..
الكتب الأجنبية بتعلمك طريقة التفكير والكاتب بمعظم الكتب الأجنبية بيحاول يحترم تفكيرك.. مشان هيك بنصح باعتماد ولو كتاب أجنبي واحد حتى ولو كان صغير لأني ما بدي ياكون تاخدو المعلومة بدي تاخدو طريقة التفكير..
أما الهندسة البشرية وسؤال ليش فهو سؤال ملازمني من وقت اللي دخلت الكلية على الرغم أنو ما كان عندي القدرة الكافية أو الوقت الكافي أو المراجع الكافية لجاوب على كل أسئلة الليش.. وبتصور أموركون هلأ مع الأنترنت والكومبيوتر لازم تكون أسهل مع أنو الجواب لكل ليش عم تسألوها لازم يكون من مهام أساتذتكم

إختيار موفق ورائع بكل ما تعنيه الكلمة من معنى.....
وددت التعليق لكي ألقي بالسلام عليك دكتور سامر..
لك مني كل الإحترام والتقدير..
لقد قدمت لنا من وقتك الكثير الكثير وعلمتنا كيفية عشق الطب وليس إتخاذه كمهنة فقط...
فنحن نفخر بأن قدَّر لنا الله وجودك في مسيرة حياتنا الدراسية.. وستبقى بصمة طريقة تفكيرك المميزة دائماً وأبداً محفورة في أذهاننا وستذكرنا دوماً بك لنتلفظ بدعوةٍ صادقة لك في ظهر الغيب....
دمت ذخراً لهذه الكلية..
طالبتك (ينبوع الأمل)..

الله يعطيك ليرضيك ..

شكراً على إجاباتك الصريحة ..

أثبت لي أن الواثق مما لديه لا يخشى شيئاً ..

أنا استفدت من الإجابات .. و أتمنى من الجميع أن يسأل ما يفيد الطرفين.

Salam Alaykum
I don't know you personally but from what I have seen you are a really distinguished person who aims at making a difference in the life's of others around him.
I want to appreciate your efforts and work that I and doctors like me were not able to pay back to our mother university and country. SO thank you for letting students know that there is something about medicine other than learning book by heart and taking exams. Thank you for giving students example about how to respect each other and showing them that cooperation in the key towars success. Thank you for being a fighter and trying to make the best of things around you.
My question to you : If you get a second chance now to go and contniue specialization in the US(from where you left: PGY1) would you take it or would you turn it down?

By the way don't feel bad one day if you need to open a private clinic (because you may have to to support you family in the future) working in the university in our country is not likely to be enough to make the ends meet.
GOOD LUCK