بث مباشر وشبه حي لمجريات مدرج السنة الثانية

فكرة حلوة ...

يا ريت لو تنقلولنا شو عم يصير

خصوصاً انو في عالم كتير ما حتدام ليوم الاتنين الجاية مثلاً

اليوم أخدنا أول شي تشريح رأس و عنق :د.معين عبود..بلش الدكتور بالمحاضرة الساعة 8 إلا دقيقتين..أول شي عمل متل مراجعة سريعة عن عظام الجمجمة :و تحديداً الوجهية :العظم الدمعي و العظم الفكي و غيره.و بعدين بلش بفروة الرأس :اللفافات و طبقات فروة الرأس :الجلد-اللفافة السطحية-ظهارة القحف ، و حكي عن الأوعية الدموية لفروة الرأس الشرايين و الأوردة..وحكي عن الأعصاب ..و بعدين بلش بعضلات الرأس و عطانا أول عضلة وهي العضلة الجبهية القذالية..و البقية بيكملون بالمحاضرة الجاية..
تاني شي كان عندنا محاضرة انكليزي إجت الدكتورة يشار و بحكم إنه مافي كتب ما عطتنا شي بس قالت إنو رح تصور الصفحات تبع المحاضرة الجاية و تنزلون عند العائدي..و سيستمر الوضع على هذه الحالة لحتى تتأمن الكتب بالمستودع..وقالت إنو الدراسة من الكتاب كافية و وافية بالنسبة للامتحان.
آخر شي كان عندنا محاضرة فيزيولوجيا :د.قطان:فيزيولوجيا القلب..ما شاء الله عطانا و ما قصر ..و بلغة عربية فصحى جميلة..بس ترتيب الأفكار و الفقرات كان مختلف نوعاً ما عن الكتاب:حكي على عضلة القلب و الجهاز العقدي الناقل و الصمامات و مبدأ الكل أو لا شيء و كمون الراحة و كمون العمل مع القوانين الواردة فيهون تبع نيرنست و غولدمان...و ما كان في مساحة للوح بالمدرج و لا كان في مساحة عند أبو فراس فاضطرينا نمسح اللوح بالمحارم
وصحتين وعافية

شكرا the promise يعطيك/ي العافية ماقصرت/ي وإن شاء الله تتابعوا هاي الشغلة على طول يعطيكن العافية

أعجبني د.قطّان اليوم

بالفعل طبيب يستحق الاحترام ومحاضرة تستحق الحضور

والله الواحد بلش يحس حالو عبيفوت بجو الطب شوي شوي

شلون شايفين الوضع شباب

عنجد شكرا كتير يا شباب والله كفو

أول شي مرحبا وكل عام وأنتو بخير

اليوم المحاضرات يلي أخدناها كانت أولا النسج مع الدكتور علي حسن وحكى عن النسيج الظهاري والارتباطات بس صراحة ما بعرف اذا الدراسة من الكتاب ولا محاضرات

والمحاضرة الثانية كانت كيمياء حيوية مع الدكتور عماد أبو عسلي وحكى أولا عن الكيمياء الحيوية ماهي وما الفرق بينها وبين الكيمياء السريرية وبعدين أخدنا الشحميات الدكتور عماد ما كمل الساعة ونصف واكتفى بساعة تقريبا

هيك كان اليوم يلي عندو اضافات لا يبخل علينا واذا حدا بيعرف دراسة النسج بقسم الدكتور علي حسن من وين لا ينسى يخبرنا

شكراً كتير وعد ورنيم على الاخبار

بالنسبة للدكتور علي حسن الي بعرفو انو الدراسة من المحاضرات

بس بعد ما فقسو الشباب ما بعرف اذا حيكون في محاضرات اصلاً ولا لأ :D

أنا بعرف من طلاب السنة الماضية إنو الدكتور علي حسن بدو كتاب و محاضرات و أسإلتو بتعتمد على الفهم

بس بظل الوضع مبهم

و إذا في شي جديد خبرونا

علي حسن محاضرات ومحاضراتو بالفصل التاني كتير حلوة

شو يعني ؟!!!

بالنسبة للنسج :

إذا تعبتوا معها شوي بتنجاب فيها علامة حلوة كتير .

نصيحة:

مثلا اخدتو بحث النسيج العضلي

بتابعوا مع الدكتور نظري و بتدرسوها منيح ..هاد الحكي لسه ما بتكونو أخدتو الجلسة بالعملي ..بعدما بتاخدو الجلسة بالعملي ارجعوا ادرسو البحث بالنظري مرة تانية رح تلاقو اسهل .. و أمتع ..

هالشي حاولو تساووه بالقسمين د.سطلي

و د.علي حسن

طبعا د.سطلي كتاب ما عدا بحث العظمي و الغضروفي نزل على وقتنا نوطة

د.علي حسن محاضرات ..بس الاساس عنده الفهم ..

انا هيك ساويت بالفصل التاني و كتير استفدت ..

بالتوفيق !

تعريف النسيج الظهاري ..و الذي يكون إما ساتراً أو مبطناً.
يعتمد التصنيف في الخلايا الظهارية على:
1-شكل الخلايا:مسطحة ،مكعبة ،أسطوانية ، هرمية.
2-عدد الطبقات.
ثم تحدث الدكتور عن الظهارة البسيطة و أنماطها :
-المسطحة:ولها نوعان و وظائف.
-المكعبة:وصفها و أماكن وجودها و وظيفتها.
-الأسطوانية:وصفها و أنواعها:
1-أسطوانية بسيطة ذات الطبق.
2-أسطوانية بسيطة مهدبة.
-المطبقة الكاذبة:وصفها و أنواعها:
1-الأسطوانية المطبقة الكاذبة المهدبة.
2-ذات الاستطالة الهيولية المجسمة.
بالإضافة لوظيفتها.
-الظهارة الانتقالية (المتبدلة):وصفها و أنماط الخلايا التي تحويها ووظيفتها و أين تشاهد.
ثم تحدثنا عن الظهارة المطبقة و غيرها ..أي كل ما يتعلق بالنسيج الظهاري بالإضافة إلى الارتباطات اللي ما بيخلص الحكي عنها بس عموماً مو صعبة.

حكينا على نسب مكونات الجسم و الأهمية الحيوية للشحميات و تصنيف الشحميات:الطليعة -البسيطة -المعقدة ، كما تصنف إلى :
بنيوية ،غير بنيوية (تخزينية).
حكينا على الشحميات الطليعة و الحموض الدسمة:الحمض الدسم مم يتألف و أنواع الحموض الدسمة:مشبعة و غير مشبعة..بالإضافة إلى ذلك تحدثنا عن بعض الحموض الدسمة الموجودة في جسم الإنسان.
كما يوجد بعض الحموض الدسمة الأساسية التي لا يستطيع الإنسان صنعها بنفسه و منها :حمض زيت الكتان، حمض بذر الكتان .
وهناك حموض دسمة طويلة السلسلة و يوجد أيضاً المواد السمة الطليعية أو المشتقة و تحدثنا عن أنواعها.. كما تحدثنا عن عملية الهدرجة.

شكرا إلكم كلكم يعطيكم ألف عافية يا ريت تضلوا هيك على طول

السلام عليكم

ما تاكلو هم..
في عالم لح يتولوا مهمة كتابة محاضرات النسج.. وان شاء الله بيكونوا قدها وقدود..

---------------------------------------------------------

Coming soon:

مشروع إعادة إحياء الدفعة النارية

حتى ذلك الوقت (يومين على أبعد تقدير) أرجو ألا تفتتحوا منتديات لمناقشة المواد... فسوف يتضمن المشروع الاتفاق على ذلك..

فائق احترامي

بالنسبة لليوم أول محاضرة كانت تشريح للدكتور معين عبود وحكى عن عضلات الرأس وهي العضلة الصدغية والعضلتان الجناحيتان الأنسية والوحشية وأخيراالعضلة الماضغة وذكر الدكتور كل شي من الكتاب مع اضافتين لاحظتهون وهنن أولا العضلة الماضغة تتألف من ثلاث رؤؤس حسب مرجع أجنبي وتنشأ الألياف الوسطى التي لم تذكر في كتابنا من الثلث الخلفي للقوس الوجنية zygomatic arch وذكر أيضا أن مجاورات العضلة الماضغة العصب والوريد والشريان الوجهي والغدة النكفية وأن العصب الذي يعصب الغدة النكفية هو العصب الوجهي .

بالنسبة للانكليزي فاليوم كانت المحاضرة للدكتور كاظم وابتدأ الدكتور المحاضرة بالتعريف عن نفسه وقال أتو هو من العراق و قال أنو هو بدو يحاول يطورنا باللغة وأنو اللغة مو بس قواعد متل مو نحنا متعودين بل بالنسبة لنا كأطباء المستقبل هي محادثة هاد يلي اسمعتو و كمان بالنسبة للكتاب قال عن مكتبة ممكن نلاقي فيها الكتاب بس للأسف ما سمعت شو اسمها . بعتقد هاد كل شي مهم اذا في شي نسيتو ذكروني

هي مكتبة دار المنجد عند وزارة التعليم العالي (A-Z)

شكرا يعطيكم العافية

بس ياريت تخبرونا شو اسم الكتاب وشكرا

اسم الكتاب :"THE LANGUAGE OF MEDICINE IN ENGLISH"
من LONGMAN و اسم المؤلفين :Ethel Tiersky , Martin Tiersky .
و كان حق الكتاب السنة الماضية على قول الدكتور 190 ل.س

لا حدا يعذب حالو يا شباب
اليوم شكينا على دار المنجد,سألنا عن الكتاب,قلنا صاحب المكتبة بتلاقو بالحلبوني بمكتبة "نور الشام".
رحنا عليها وإذ بلاقي كتاب بنفس الاسم "MEDICINE IN ENGLISH" لكن غير الشكل تبع كتابنا ,شفت أول وحدة طلعت غير كمان ,يعني مو هوّة
يلي بيلاقي شي محل تاني يا ريت يخبرنا
سلام.

حلو يعطيكن العافية

طيب والعمل هلأ من وين رح نجيب هالكتاب الحلو

أف شو داومتو نحني بحمص لهلأ ولا شي

بتمنى كون صديق لكم

لو سمحتوا .. شو أخدتوا اليوم ؟؟

السلام عليكم..

اليوم أخذنا محاضرة نسج استمرت ساعة ونصف.. أنهى في الدكتور النسيج الظهاري.
تحدث الدكتور في بداية المحاضرة عن وظائف الغشاء القاعدي، ثم تحدث عن وسائل الاتصال البنيوية (نوعين فقط هما الاتصال البؤري وأنصاف الجسيمات الواصلة حيث أنه تحدث سابقاً عن باقي أنواع الاتصال).. ثم انتقل للحديث عن الوظيفة الغدية للنسيج الظهاري وتصنيف الغدد بحسب طريقة تحرير المنتج، وبحسب آلية الإفراز.. وذكر العديد من أنواع الغدد والأمثلة عليها.. بالإضافة إلى إعطاء أمثلة عن المناشئ الجنينية المختلفة للنسيج الظهاري (من الوريقات الثلاث) والأمثلة عليها..

ثم أخذنا محاضرة كيمياء حيوية استمرت 45 دقيقة وكان يفترض بها أن تستمر ساعة ونصف
تابع فيها الدكتور بحث الشحميات (وأظن أنهاه).. تحدث فيه عن البروستانوئيدات والإيكوزانوئيدات والبروستاغلاندينات والترومبوكسانات والليكوترينات والسفينغوزيدات والبلاسمالوجينات والسفينغوميلينات والسيروبيوزيدات والغانغليوزيدات والكولسترول والستيروئيدات والحموض الصفراوية.. والعديد العديد من الأسماء الكيميائية الساحرة ..

شكراً جزيلاً

شي جميل

شكراً بشار ..

حاكم انا التاني ما اجيت اليوم ..

مع اني فئت .. بس قلت بلاها خليني بالبيت احسنلي

وأنو عبقول ليش المدرج اليوم ما كان منوّر

-
-
-
-
-
-
-
-
-
-
-
-
-
-
-
-
-
-
-
-
-
-
-
-
-
-
-
-

شاطر بتمسيح الجوخ ما هيك

لأني ما أجيت
شكرا جزيلاً
الله يخليهن لأهلهن!، الله يسعدن ويبعدن

لأني ما أجيت
شكرا جزيلاً

الله يخليهن لأهلهن!، الله يسعدن ويبعدن

إي حبيبي عميل حسابك بكرة بدك تجي وبكير كمان
عندك محاضرة انجليزي يا تقبرني!!