الدموية من الهاريسون! والخمجية لا طعم ولا رائحة!

عنجد هالشغلة أسوأ شغلة بكليتنا واللي بحس إنها حرقة بقلبي..
لأنه لهلأ وبعد ما درسنا كل البواطن.. بيصيب حدا عندنا بالبيت كريب عادي.. ما منعرف متل العالم شو نعطيه أدوية.. وشو هو العلاج الأفضل..
لأنه بالأصل بيعطونا الأمراض بكل تفصيلاتها المملة وأمراض بيجوز بعمرنا ما نشوفها.. وبيمرقوا عالمعالجة مرور الكرام..
رغم أنه هي أهم شئ.. وهي الشئ اللي المريض بدو منا نعرفه..
لأنو إذا عرفنا المرض وشخصناه من النظرة الأولى للمريض ومابعرف شو علاجه بشو بكون أنا خدمت المريض...
فالله يفرجها أحسن شئ....

ليش بس السل...وين الحصبة ووين الالحصبة الألمانية...ووين العقديات ...ووين ووين....

خاصة بطرق المعالجة ل سهام سليمان....

عوجة ورح تضل عوجة...

هنن عرفوا انه السل مرق عليك كتير ومليت منه والحصبة الألمانية والحصبة صارت بديهية بالنسبة الك بعدين شو بدك يهيك أمراض لازم تركز على الفطر الشعي والنوسجات والمستخفيات وفخرية وسعدية وأم الناب (أسماء الديدان) وقتها رح تكون طبيب ناجح قادر على التعامل مع كل الأوبئة النادرة وبتقدر تكون عضو فاعل بتنشيط السياحة لأنه عندنا أطباء قادرين على تشخيص الأمراض المستوردة وغير المستوردة !!
أهم شي بالدم تعرف شو بدك تعطي مريض AML وCLL وHCL ايوا بركي كنت يعيادتك بعد ما تخرجت من كليتك المصونة مالازم تعرف توصف سيكلوفوسفاميد وتحقن ميتوتريكسات بالسائل الدماغي الشوكي !! وكأنه أنا لما اتخرج من كلية الطب فورا رح عالج مريض CML مو لازم أول أعرف شخصه !! بتلاقي بفقرة الأعراض مافي التفصيل الموجود بفقرة الاضطربات الصبغية والعلاج والغباء بالموضوع انه بكل سوريا علاج الخباثات الدموية ببكي ومعظم الأدوية مو موجودة !! وحتى الاضطربات الصبغية وين بشخصوها !! اذا مافي غير جهاز واحد بكل سوريا يمكن والمجهر الالكتروني محطوط بالمتحف يمكن !!
بس ما منقول غير الله يعين المرضى !!

يعني قرينا ما يقارب ال 1000 صفحة بهالمادة وبالآخير ما منقدر نشخص مرض من التاني والله عيب يلي عم يصير بهالكلية ...

و لما أخي مرض بالفترة يلي عم أدرس فيها خمجية والله العظيم ما عرفت شو معه ولا شو بدي أعطيه دوا (مع أنو المرض كان خمجي) , قلتله روح لعند الدكتور أحسن الشي وحسيت بتفاهة الشي يلي عم أقراه وتفاهة الستاجات يلي ساويناها..يعني عأساس نحن هلأ خاتمين الباطنة من بابها لمحرابها ...

لا حول ولا قوة إلا بالله ..... والله إذا ما اشتغلنا على حالنا لتروح علينا ...

المادة الوحيدة المعقولة عنا هي الخمجية
أول شي الدكتورة شرحها ممتاز ,تاني شغلة محاضراتها شاملة ,تالت شي انها بالمحاضرة الاخيرة حذفت لنا كل الامراض يلي ما بنشوفها ببلدنا مثل الشعيات والنوسجات والفطار و........

وقالت لنا انو هي بيهمها نعرف الامراض الشائعة ببلدنا متل المالطية والتيفية وكيف نشخصها ونعالجها و قالت لنا ركزوا عالتشخيص والمعالجة والوقاية وفعلا أغلب اسئلتهاكانت عن التشخيص والمعالجة .

أما باقي الداخلية 4:بالنسبة لنا :الدم والكلية ,يعني شو بدي قول ؟؟!!!!!

نوطة الدم خليط غير متجانس وغير منسق من المعلومات ,ولو ما جبنا محاضراتكم كنا ما عرفنا شي من شي ,بالاول كتير عجبتنا محاضراتكم ,يعني الواحد اذا بيقرا منها بيفهم بس فيها تفصيل كتيير لدرجة انو اذا الطالب بدو يركز على كل المعلومات رح يتشتت تركيزه .

اما بالكلية متل ما رحتي متل ماجيتي :فتنا بالحيط ,أخدنها بآخر شهر وما صار لنا نفس ندرسها متل الخلق لانو معروف انو تلات رباع اسئلة الكلية من خارج النوطة .

يعني الخلاصة :بعد ما منخلص مواد الجامعة لازم نرجع من اول وجديد ندرسها من مكان تاني ,كانو ما تعبنا ولاضيعنا وقت وتعب وحرق أعصاب .

لاحول ولاقوة الا بالله

بسيطة كتير إذا خمج تنفسي أوغمنتن و إذا خمج هضمي باكترم مع سيتامول أو بروفن
وبعد يومين إذا ما طاب بتفكري

والله جد ما عم امزح ...

هي الطب بهالبساطة
بس نحنا عنا الدكاترة عاى قد ما بيفوتونا بالحيط بنصير بنخاف نتحرك وليش يا حزركم .... مشان متل ما صار مع الأخت .. بعمرنا ما نحكم زلمة

المشكلة بكل بساطة بيلي عم يدرّس. أنا برأيي مو كل طبيب اختصاصي فهمان الاختصاص يلي هو فيه ممكن يقدر يدرّس. لأنو تعليم الطب بيفرق 100 طاق عن ممارسة الطب.

أنا بحترم كل الأطباء يلي عطونا كممارسين للطب، والأطباء السوريين ما بينقصن شي عن كل دكاترة العالم، بالعكس ببعض الاختصاصات عنا نخبة أطباء العالم فيه، لكن هذا ما بيعني إنو يجي هذا الطبيب ويدرّس طلاب الطب هذا الاختصاص.

حضرت دروس سريرية عن طريق DVDs بالدموية، وكان يلي عم يدرّس مو مختص دموية، كان طبيب مختص داخلية عامة، لكن مؤهل لحتى يدرس طب. الكورس كله كان 4 ساعات، وتعلمت فيه أكتر من يلي تعلمته بـ 500 صفحة دموية علمنوها ياهن بالكلّية.

بجد، وضع طالب الطب بعد السنة الخامسة مأساوي، وما بتصور أبداً إنو بالشي يلي تعلمناه بالكلية والمشافي، لح نقدر نواجه فيه مريض بعد التخرج. يعني حرام ننعطى شهادة طبيب. لأنو لح نروح النّاس تبلّكي بين إيدينا. وإذا الواحد ما طلعلوا اختصاص وتعلمه منيح، يروح يكب حاله. طبيب بالاسم بسسس! وأكبر دليل يلي عم يصير عنا من أخطاء طبية ما هبّ ودبّ بالأرياف يلي بيشتغل فيها ناس مو مختصين، والناس دراويش مو فهمانة، وما في قضاء بيحاكم طبيب أخطأ.

أكيد ما كانت القصة كل هالقد بسيطة لحتى فكر أعطيه هدول !! .... بس الحمد لله مرقت على خيررر بعد ما حطيت ببالي شي مية تشخيص تفريقي بخوف ..

مأساوي جداً

يا جماعة كتير بكير من هلأ تحكموا على حالكم. لس معو الواحد بالسادسة فرصة يتعلم, و كمان بكون مجبر ينزل يداوم ليتعلم سريريات أكتر.
صحي كنا بهالخمس سنين مزروكين زرك بالنظري, بس والله في ناس ما تتكنس من الستاجات يلي فيها استاذة مرتبين, وفي ناس عين تراها بالاسعاف, وفي ناس مامنشوفها إلا وئت الفحص أو بالمدرج أو بالمكتبة طوال الوئت عم تقرا Text book.

أنا ضد فكرة القراءة من Text book و مع الاقتصار عالكتب الصغيرة, وتوفير وئت القراية من المراجع الكبيرة للمشفى, و بعد كل حالة بشوفها الواحد بالمشفى يفتح الHand book أو Pocket Pcو يقرا عن الحالة ولما ما يفهم, بيقدر يرجع للكتب الكبيرة...
محاضراتنا, و textbook, و ستاجات, و نظري... شو هالتركيز الطبي يلي معتمد عالنظري كلله و شو هالحياة.

أنا بعترض عالعنوان, ياريت لو كان.. الخمجية, الدم من الأسد و لاّ المواساة؟..ياجماعة الطب مريض و طبيب وحالة بعدين معلومات الكتب..
و الله أعلم.

عفواً دكتورة الهدف كان المثال فقط

يا جماعة الحوار كتير رائع ....
لحتى يكون واضح أكتر هصيغ الموضوع كالتالي:

المشكلة:
نحنا طلاب الطب رح نتخرج و لسا ما بنعرف نتصرف بالحياة العملية

السبب:
برأيكم ... الأساتذة يلي عم يفوتونا بالتفاصيل ويضوعونا بكتر المعلومات.

الحل:
وهنا أيضاً برأيكم ... ننق و نسق ونسب الأساتذة ليل نهار ... وننتظر الحل يطلع من عندون ... أو نزت حالنا عندون بالمستشفى لحتى يبيضوا علينا أكتر ويفوتونا بالحيط أكتر .... (و اللي نزل بيعرف كيف أنو حتى طالب الدراسات بيبذل كل جهدو ليطلع طالب الطب حمار ... العفو منكم ... ليش..؟؟... لأنو متعلم هالطريقة من أساتذته)

أنا برأيي الخاص (ومعليش ما حدا يدعموا إذا بدكم .... بس رجاءاً ما حدا يعمل منو مسخرا)

السبب هو نحنا (بغض النظر عن الأساتذة ... بحكم أنو عوجا وما في داعي نفوت بتفاصيلهم)

كيف يعني نحنا... ؟؟

نحنا يلي كنا نقعد بالصالونات بكل المناسبات وبدون مناسبات ..!! نسب ونشتم هالكلية والأساتذة ونظام التدريس و أنو ما عم يخلونا ندقر مرضى و ما عم نشوف مرضى إلا بالأحلام والدكاترة عم يخبصوا و المرضى عم يموتوا .. والأسئلة دورات والعلامات شلف والكتب قديمة والمعلومات غلط ......و و و

معليش لا حدا يقول أنا ما بحكي هيك .... صفون شوي و تذكر شو حكيت العيد الماضي لما سألك صهرك عن دراستك .....

معليش كيف بدك بعد كل هالحكي هالعالم يلي هنن بالدرجة الأولى أهل أو أصدقاء يثقوا فيك كطبيب..؟؟

وبدك ما تنسى إنك كطبيب محور اهتمام العالم و أحاديثهم .... يعني هاد الكلام يلي عم تحكوا عم يتناقلوا العالم بسرعة الصوت ..... مع شوية ملح و الكثير من البهار الحد.

لا حدا يقول ما عم تحكوا هالحكي ..

أنا مرة شافني واحد كان رفيقي بالثانوي وقال لي:
من حقا انتو الدكاترة ما عندكن جثث بالمشرحة
من حقا انتو الدكاترة ما بحياتكم شايفين مريض
من حقا انتو الدكاترة ما بتعرفوا شو هاد المجهر
من حقا انتو الدكاترة ما بتداوموا وبتناموا طول السنة وبعدين بتشتروا دورات وبتنجحوا
من حقا انتو الدكاترة ما بحياتكم كاتبين اسم دوا
من حقا انتو الدكاترة بس تمرضوا يتروحوا لعند دكتور لأنو ما بتعرفوا حتى تحكموا حالكم ..
و إذا بتسألو منين جايب هالحكي (طبعاً أنتوا بتسألو بكل جدبة .... شو بعرفك ..؟؟)
بيقلك ولو ما ابن عمي عم يدرس طب و رفيقي و ابن جيران خالتي و و و

طيب طيب ... بلاها هي ....

إذا تجرأ واحد من هدلون وجازف بحياتو و قال لحالو مو معقول يكون لهالدرجة طالب الطب غبي ... يعني عالأقل ما حيكون أغبى من الصيدلي يلي بالحجر الأسود ...
وبعد كل هالتفكير الطويل قالك ببساطة .... إبني نازل حلقوا شو أعطي دوا؟؟
أو قالك إبني مسهل شو ساوي ؟؟
إبني ما عم يطول شو طعمي ؟؟ بدوا فيتامينات ؟؟
والله مسهل ... والله عم يجعني بطني .... والله ما بعرف شو .....

بتقوم إنت شو بيصير فيك (مع احترامي للجميع) بتحمر و بتخضر و بتصفر
وبيخطر ببالك كل شي أخدتوا بالباطنة والأطفال و حتى الجراحة .... يعني بيمرق ببالك شي خمس ست تالاف صفحة خلال تلات ثواني وهذا إذا ما كنت كمان مكمل على حالك وقاريلك أربع خمس مراجع.
وببلش مخك ياخدك و يجيبك ....
لقوم أعطي شي دوا تقوم تعند الزمرة الجرثومية يلي عندو وتتسبب بتلوث بيئة دوائي
لقوم أعطي صاد والزلمة يطلع معو سالمونيلا قوم ساعد الجرثوم عالتفريخ أكتر
ليقوم الولد يكون عندو مشكلة غدية .... شو لازم اطلبلو تحاليل
مو لازم إعمل فحص براز لكل واحد مسهل .....

بالأخير بتعرف شو بيطلع معك .....
ببتذكر قول الإمام الشافعي ... نصف العلم لا أعلم ...
وبتقول ما بعرف وبترجع بتسب الأساتذة و الكلية و هكذا دواليك....

الحل برأيي:
أعد ثقتك بنفسك أولاً
لا تقول ما بعرف من خوف .... قولها فقط لما بتكون ما بتعرف ... أصلا ما في داعي تقولها ... فيك تقول حالتك معقدة شوي بيكون أحسن إذا بتستشير غيري ... بدون ما تلقمو ياها إنك ما بتفهم ....
تذكر أن لا تقوم بأي فعل أو وصف أي دواء خطر مهما كنت متأكداً (لأنو أصلاً الحالات المعقدة ما حدا بيجي بيسألك إلك عنها .. )
و تذكر أنو طالما إنك متأكد إنك ما عم تضر المريض فأنت عم تفيدوا ... لو بتوصفلو شوكولا (على قول كونارد فيشر)

أخر شي ... رأي الناس فيك هو مرآة لرأيك بنفسك.